أعترف انا ام انانية و غير حنون

السلام عليكم
كيف حالكم يا امهات
الحقيقة حابة حد يساعدني بهالموضوع
انا احس اني طفشت من بنتي ،، احس انها معاي بكل لحظة بكل كبيرة وصغيرة حتى مافي لحظاات خاصة بيني وبين ابوها لانها دايما واقفة لنا بالمرصاد،، يعني دايمة تكون موجودة معنا و لما اقول للأب خلينا نجلس شوي لحالنا يسكت و يطنش (احسه ياخذ عني فكرة اني انانية و ما احبها) ،، حتى لما ساعات نحطلها رسوم علشان تشوفه بمجرد انها تحس انها لحالنا تجي تشوفنا ايش نعمل ولما اقولها اطلعي برا و سكري الباب ترفض تظل واقفة على راسنا ،، بس لو هو محد اقولها اطلعي برا تطلع و تقفل الباب و لو هو محد احطلها رسوم تظل تشوفها ما توقف على راسي الا لو حست انه جلس معاي..و هي على فكرة تغار مني حتى لو يعطيني أي شي هي تغار تبي كل شي لها و تجلس تبكي ماتبيه يعطيني اي شي
اذكر لمن كان عمرها سنة ونص كانت تبكي و تغار لو نجلس جمب بعض تبي تجلس بالنص بيننا ولما جربت خليتها بالنص وبعدين قمت رحت الصوب الثاني بحيث اكون جمب الاب هي قامت و جلست مرة ثانية بالنص يعني السالفة تغار والله تغار لا تقولولي تبي تجلس بين الام والاب تبي حنانكم الاثنين ..لأ هاذي بنتي والله اعرفها والله تغار مني ماتبيني اكون معاه ..
.و مرة بنفس العمر اذكر أنا دخلت الغرفة و هي و ابوها لحالهم مجرد شافتني ادخل دفعتني لبرا و سكرت الباب علي ما تبيني اشاركهم قعدتهم …هاذولا مثالين والله مانسيتهم و في مواقف غيرها تحصل وتحصل كليوم…لو يعطيني قطعة اكل من الصحن تغار و تبي اللي اعطاها لي حتى لو عندها نفسها ..لو اعطيها اللي عندي و يعطيني غييرها ترمي اللي عندها و تبي القطعة الثانية اللي عندي .. …
المصيبة انها جدا مشاغبة بوجود الاب يعني لما يكون موجود تاخذ راحتها ع الاخر وتتعبني وانا احب الهدوء و أكره افوضى…ما احب الفوضى والمشاغبات والصراخ كل حين تنط و تخرب و تصرخ وتكسر وتركب فوق الاب و ترفسه و تركب فوق الغنفات و تنط و ترمي العابها و تعمل فوضى فضيعة بدون مبالغ هو بارد لا يعصب ولا شي والله يابنات حتى وقت الاكل تنسد نفسي من كثر ما تشاغب و الادهى هو يسايرها بالمشاغبة بدل ما يمنعها و تعالي شوفي الحوسة والأكل المكبوب ع الارض و ثيابها اللي توسخت أكل ..حتى وقت الأكل مافيه جد كله لعب بهزل مع ابوها ما أقدر اكل لقمة أكل بهدوء………..
بس لما هو يكون مو موجود تكون مؤدبة و لو تعمل حركة كذا واللا كذا انهرها والله تسكت وتتأدب …
ع الاقل لو تجلس هادية معانا والله عادي بس سلوكها مو منطقي يخلي الواحد يطفش منها حتى امي و أبوي لما يشوفوها تشاغب بهالشكل يتعبوا منها … ابي فترة راحة و هدوء خاصة لما هو يكون موجود
الحين احس اني طفشت منها وللأسف الشديد احس اني كرهتها مدري صحيح هالشعور واللا لا؟ اتمنى اكون غلطانة.. احسها لاصقة فينا و جالسة لنا على راسنا احس خلاص طفشت منها ما أبي اشوفها معانا ما ابيها تشاركنا جلستنا ابي أجازة منها أبي ارتاح شوي…استغفر الله لهادرجة انا ام قاسيةة؟
للعلم هي الآن عمرها 3 سنوات و ابوها مرررررةةة مدلعنها من يوم جبتها و ياما نصحته لا تعمل كذا راح تصير دلوعة وراح تلزق فيك وماراح ناخذ راحتنا و هو مايسمع و الحين هو بنفسه يقول انها صايرة له مثل الذنب لانه من يكون موجود ماتخليه لحاله لو يقوم تلاقيها وراه وراه بس هو ما يتضاق منها حتى لو تشاغب و تركب فوقه و تأذيه هو بارد يسكت عنها و الادهي كلما أفاتحه بالموضوع اقوله انه احنا لنا حق نجلس لحالنا شوي يعني مجرد اننا نجلس نسولف شوي بعيد عنها و عن مشاغباتها أحس الموضوع مايعجبه…و اشوف بعينه نظره تقول “انتي ام غير حنون و أنانية وماتحبيها” … وكذا مرة لمح لي بأسلوب غير مباش
ساعات اقوله شغل لها الرسوم اللي تحبها و تعال نسولف شوي بعيد عنها يوافق وانا ادري انها راح تجي تلحقنا و لما اقوله خل نقفل الباب ابي اجازة منها بس 10 دقايق…يروح يطنشني ويحاول يتهرب مايبي يقفل الباب احسه يتضايق من طلبي …..و لو ماقفله ثواني إلا و اشوفها تفتح الباب تظل على راسنا وو إما تدخل تشاغب و لو عصبت عليها و قلتلها أطلعي سكري الباب تطلع و ترفض تقفل الباب وتظل واقفة عن الباب على راسنا ماترضى تروح تبي تكون مثل الحارس علينا تشوفنا ايش نعمل و اي نحكي…
والله يابنات تعبت منها صرت أحسس منها لدرجة ما احبها تشاركنا الطعام ولا الجلوس معنا مع اني ما كنت كذا بس احس من شدة الضغط صرت بجد انانية
الحين صارلي اسبوع طفشانة منهم الاثنين و دايم اعصب عليهم احس خلاص والله ماعدت أطيقتهم لدرجة اقوله لما تروح بيت ابوك وتاخذها معاك نزلني بيت ابوي ابي ارتاح منها صرت اقولها له بوجهه مايهمني شو ياخذ عني فكرة سيئة…مع العلم اني كنت ما اروح بيت ابوي الا و هي معي .. بس الحين ما ابي اشوفها أبي ارتاح منها .. و أحسه هو الثاني طفش مني من كثر ما انا صايرة عصبية عليهم
افكر اطنشهم الاثنين شكله مافي أمل .. افكر اعيش بعالمي لحالي اخليهم مع بعض بكيفهم وانا خليني بعالمي مع اني احتاج لهم الاثنين بس بنفس الوقت احتاج بعض الراحةوالخصوصية…
انجدوني يا امهات وصلت لحالة صعبة والله اكره اني اكون بهالانانية والقسوة مع ابنتي بس غصب عني و بصراحة الومه هوعلى هالنتيجة احسه هو اللي فتح لها هالابوب بدلاله لها…
عارفه ردود الكثير منكم راح تكون قاسية بس انا محتاجة لمساعدتكم بليز ارفقوا فيني و راعوا ظروفي ..