عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
كيفكم كروشات .. وكيفكم يالي فكيتو البقشات 😳
اول شي اسأل الله تعالى بقلب صافي أنه يسهل لكل حامل مابقى من حملها وولادتها ..
كما اسأله سبحانه أنه يرزق كل محرومة بالضنا الي يقر عيونها ويفرح قلبها ..
ويرزق كل وحده انجبت بر أولادها اللهم آمين يارب العالمين ..
……………….. (( قصة ولادتي بولدي أسامة )) …………………..
ولله الحمد والمنه ولدت في يوم 21/7/1432هـ وكان يوم خميس …
زي ماقرر لي الدكتور بعملية قيصرية نظرا لوضعي لأنه البيبي كان مره فوق وعشان ضيق الحوض
ولدت بمستشفى سليمان فقيه عند الدكتور وائل يسري وببنج نصفي 😥
طبعا بالبداية كنت مرعوبة من حكاية البنج النصفي وماخليت أحد ماسألته ولا بقي موقع بالنت
مااتصفحته ولامقطع باليوتيوب الا شفته 😳 كله خوف ورعب ..
جا يوم الخميس وطبعا أنا مجهزة اغراضي من قبلها بأسبوع وكلمت زوجي ع اساس يجيني يوم الاربعاء
عشان يكون معايا لأني عند اهلي بجدة وانا من سكان المدينة المنورة 😥
كان موعد عمليتي الساعه 11 الصباح وانا طلعت من البيت الساعة 9 ونص ع اساس لو كان فيه
اجراءات او حوسه تعرفو المستشفيات الخاصة كيف .. وصلنا ورحنا لمكتب الدخول واتفاجأنا انها تقول
مافي غرف تنويم فاضية كله فل 🙁 💡 >> أنا صار وجهي زي دا .. يعني حسيت انه فندق مو مستشفى .. المهم جلسنا نستنى ع الكراسي انا وزوجي وبنتي وماما وبابا ..
طبعا نسيت اقولكم انه بنتي كل يوم ماشاء الله تنام من 4 الفجر لحد 2 الظهر وسبحان الله اليوم دا
نامت زي كل يوم بس صحيت 9 ➡ كأنها حاسة وانا قلبي بيتقطع عليها لأنها من حملت زاد
تعلقها في المهم مالكم بالطويلة اخدناها معانا وكل شويه تقول ماما يلا طلعي اوسي كأنه جيب
افتحه واطلع اخوها 😐 وقعدنا نستنى لحد 1 الظهر وانا المفروض عمليتي 11 الصباح بعدها
بابا عصب وراح لمدير المستشفى وللدكتور وقال تشوفولنا حل احنا مالنا علاقة ليش توترونا كدا
من جد انا نفسيتي تعبت مرره من الانتظار وزوجي من خوفه ساكت ولا تعليق حسيت كأنه
هو الي بيولد ههههههههههه بعدين جا الدكتور وقال حندخلك طوارئ نعملك تخطيط للبيبي
ع بال مانحضر غرفة العمليات وفعلا قعدت لحد 2 ونص ع التخطيط والساعه 3 دخلوني غرفة العمليات
وماما حياتي على اعصابها تنصحني وتهديني وهي مرعوبة .. وجاني اخصائي البنج وجلسوني
ع السرير وخلوني ارخي راسي مره حسيت بطني اتعفصت وضربني الابرة بصراحة ماحسيت بشي
ابدا الا ببرودة خفيفة وبعدها تنميل بأطراف رجلي وبعدها صرت مااحس بنصي الي تحت نهائي
وجابو الستارة وحطوها وبدا شغل الدكتور وطبعا أنا سامعه كل شي يدور بس كانو حاطين لي الكمام
عشان يريح اعصابي ومااتوتر .. وكان دكتور البنج عند راسي وأنا كنت استغفر وادعي لأهلي
وللمسلمين وبعدين حسيت بضغط على صدري سألت الدكتور يول معليش لازم نضغط ع البطن
عشان يخرج البيبي ودكتور البنج من فوق يساعدهم والله حسيت انه قلبي حيوقف للأنه البيبي
سبحان الله مره فوق تحت صدري وبعدها بشوية سمعت صوت بكاه وصرت ابكي وجابو لي الدكتور
وقال لي جبتي ولد زي القمر وكان لسى معلق بالحبل السري من بعيد شفته وحسيت لونه غريب
واسأل الدكتورر يقول طبيعي لأنه فترة بالموية المهم حمموه ولبسوه وجابو لي هو وحطوه ع صدري
وبوسته وانا ابكي والدكتور يضحك علي يقول ليش تبكي وبعدين شالوه وجلسو يخيطو الجرح
وانا بعدها حسيت براحه مو طبيعيه .. بعدها خرجوني ع الغرفة أخيرا بعد مافضيت وحدة .. وجا بابا
وزوجي واخواني الثلاثة ولما شفتهم كمان بكيت مااعرف طاح علي بكا 😥 وانا اصلا من الناس الي
دمعتهم قريبة مرره ومااقدر امسكها بعدين صرت انام واصحى وانا اسأل عن ولدي ماجابو لي هو للغرفة
وكلهم يقولو دحين يجيبوه بعدين سمعت بابا يكلم جدتي ويقول البيبي شرب شوية من الموية
وحطوه بالقزازة وانا صرت مرره ابكي ابغا اشوفه وزوجي نزل واطمن عليه وصوره وقالو لازم يكمل 24
ساعة بعدها يخرجوه وكان حبيبي حاطين له انابيب للتنفس بالانف وبيده ورجوله ابر كان يحزن
وبدا يفك عني البنج ع الساعة 6 شوية شوية والحمد لله بديت بعدها احس فيهم تمام وكنت نايمة
مسطحة من غير مخدة عشان الصداع والحمد لله ماحسيت بأي مضاعفات من الي كنت اسمع عنها
للبنج النصفي والساعه 11 الصباح من ثاني يوم جابو لي اسامة وفرحت بشوفته .. يارب لك الحمد
بس أكثر شي تعبني هو مغص مابعد الولادة موتني طلق حامي مره ع المسكنات عشان اقدر انام
وسلامتكم .. هذه قصة ولادتي والي عندها اي سؤال عن البنج النصفي أنا حاضرة
وفي الختام اشكر كل فراشة ساعدتني وواستني فترة حملي ❗
