عالم البنات النسائي كل ما يخص المرأة العربية من ازياء وجمال والحياة الزوجية والمطبخ
بسم الله الرحمان الرحيم
السلام عليكم ورحمة الله وبركاته
والصلاة والسلام على خاتم الأنبياء والمرسلين نبينا محمد وعلى آله وصحبه أجمعين ومن تبعه بإحسان إلى يوم الدين أما بعد
أبقى أتركن مع هذا الموقف شوي
نجود : شفتي يانوف فستان وعد بعرس نايف يووووووه يفشل كأنها قاطعه ستارة سواقهم وجايه يع
نوف: ههههههه الله يقطعها لا وبعد شعرها نافشتنّه من قدام تقلين مركبه مظله بكشتها
نجود: مسكينه تحسبه تطور ههههههههه
نوف : الله لايبلانا الناس وصلت القمر وتعدته وهي للحين بموضة المظلات هههه
نجود : خخخ أي موظه أول مره أسمع بها
نوف: شفتي كشتها من قدام هذي موضة المظلات هع هع هع
نجود : إيه ههههههههههههه الله لا يبلانا
ريم : ورى ضحكاتكن واصله لآخر الدنيا شركنّي معكن عساه خير
نجود : هذي وعد بعرس نايف هههههههه تحفه مسكينه
نوف: ههههههه قعدت يومين أضحك عليها خخخ
ريم : أستغفر الله ورى ماتتركن البنت بحالها وش دعواكن بها هاه وإلا عشانها ماشاء الله جميله وأخلاقها ذوووووووق أستغفر الله متى بتتركن الغيره الله يهداكن بس
نجود : طررررررررررراخ طاحت من الضحك أقول يالمفتيه ضفي وجهك قالت جميله هع هع الجمال إذا شاف وعيده يطير هع هع
نوف: نجوده خلينا نغير المكان أفضل أخاف تجينا عدوى التعقيد يالله لك الحمد بس
نجود: على قولك ياغلاي فلنذهب
ريم: الله يشفيكن من الذنوب والله إنكن علي غاليات بس وش نقول
قال تعالى
(( وغركم بالله الغرور))
هذا المشهد ومثله كثيررررر دوم يمر علينا مجالس ناكل فيها لحوم بعضنا البعض مجالس بخورها الرياء وزينتها الكذب وطعامها لحوم الخلايق
مجالس ليه نروحها وحنا عارفين بلاها بكل بسااااااااااطه نتسلى ورى التعقيد ترى الدين يسر وإذا كان عندنا ذنب واحد وش يصير على الأقل حنا أحسن من غيرنا فلانه تسوي وعلانه تفعل
ونسينا أو تناسينا بأن الحجر الصغير فوق الحجر الصغير يصير جبل وأساسا الغيبه مهيب ذنب صغير الغيبه من الكبائر ومن أسباب عذاب القبر
عشان كذا راح نروح لرحله بسيطه بسميها رحلة إقناع وإقتناع نحدد فيها أسباب الغيبه وطرق معالجتها والطريقه الصحيحه للنصح
أول حاجه ليه حنا نغتااااااااااب وش السبب الرئيسي للغيبه
(((عدم وضع مخافة الله أمام أعيننا ))) فلو حنا خفنا عقاب الله وخفنا من جبروته وقدرته علينا ماكان تجرأنا على تعدي حدوده
قال تعالى (( وماقدروا الله حق قدره والأرض جميعا قبضته يوم القيامه والسماوات مطويات بيمينه))
وطيب وش العلاج لهذا السبب
إذا حبيتي تغتابين قبل ماتحركين لسانك تذكري بأن الله تعالى قادر يشله ويمنعك من الكلام ومن اللي يقدر يرد الضر عنك إذا الله أراد أنه يضرك ويشل لسانك هاه من قبيلتك عشيرتك هلك ناسك غواليك من قولي من ؟؟؟؟؟؟!!!!
وإذا حبيتي تعصينه وتغتابين تذكري بأنك بملكه ومالك مفر من أقطار هذا الملك 000
وإذا فكرتي بس تجربين روحي شوفي عاد وثمود وش نهاية طريقهم قال تعالى ((( وما قوم عاد منكم ببعيد)))
وإذا بتكملين وتغتابين الله يعينك بصراحه تحديتي الجبار وعصيتيه وأنتي الضعيفه
خلينا نكمل وندور باقي الأسباب
السبب الثاني
الغيررررررررره
وبيني وبينكن مهوب أكثر الناس اللي تنأكل أعراضهم هم الناجحين بالحياه أو بينا حنا النساء الجميلات واللي حياتهن سعيده مررررره واللي واللي 000000
فإذا كانت بنت جميله لازم ندور عيب بها مثلا لازم تشوفين إذا وحده مدحت وحده وقالت ماشاء الله بنت فلان جمييييييييله تقول الثانيه أهم شي الأخلاق وطوووووووووووط حش ونش بهالجميله بس لأنها غارت منها
العلاج أول شي من اللي وهبها الجمال أنتي وإلا هلك وإلا من؟؟؟؟؟؟؟
اللي وهبها الجمال ربي وربك ورب كل شي بحكمته وعدله000
فليه تحسدينها بشي ربك اللي أعطاها إياه بحكمته فلو أنتي رضيتي بالله ربا أكيد راح ترضين بحكمه وتقديره لك لأنه وش يدريك إذا كنتي بجمالها راح تأمنين الفتن
وترى الحسد هو السبب وراء تكذيب أبو جهل لمحمد صلى الله عليه وسلم وتكذيب اليهود نبوة محمد صلى الله عليه وسلم
فالعلاج في هذي الآيه قال تعالى (( ولا تمدن عينك إلى مامتعنا به غيرك ))
السبب الثالث
مع الخيل ياشقراء
الناس حشت بفلانه بتحشين والناس رفعت فلانه بترفعينها والله وأنتي ماله أبو جدك داعي بالسالفه لكن عشان ماتكونين منبوذه بوسط شلة الدمار
هع الله يشفيك لو كنتي كذا حالتك ياغلاي مره صعبه لأنك ببساطه إمعععععععععه معاهن معاهن عليهن عليهن طيب ليه وين شخصيتك وإلا مكانتك عندهن ماتسوى شي وقدرك عندهن غيبة فلانه وعلانه وافقتيهن حياك ماوافقتيهن بألفين طقاق فيك وتنطردين برى الشله
الحل وين شخصيتك أنتي لازم تثبتينها ولازم تثبتين وجودك كوني قايده في الخير مهوب تابعه في الشر وعمر جدهن لا يعزنّك مادام معزتك ماتجي إلا بمعاداة فلانه وغيبتها يالله العافيه إعتزلي هالمجالس أنفع لقلبك وأزكى واللي تحبك بصدق بتحترم قرارك وماترضى عليك ومن ترك شيئا لله عوضه الله خيرا منه وأنتي اليوم معهن بكره كلهن ضدك لأن هالأشكال مالهن حبيب ولا لهن صديق
وترى حتى بالدين مايحل لك تقعدين معهن قال تعالى (( ولا تقعد بعد الذكرى مع القوم الظالمين)) وهذي من فتوى إبن باز الله يرحمه بأنه مايجوز تقعدين مع اللي يغتابن عليك نصحهن إن إستجابن فحسن وإلا عليك مغادرة المجلس حتى يخوضوا في حديث غيره
والسبب الرابع
إنتقاااااااااااااااااااااااااااام
يعني فلانه سابتك أو فلانه طاقتك أو علانه مرسبتك أو بنت فلان مفرجه عليك نص الساحه هذاك اليوم أو المديره كاشه كشتك بالطابور أو فلانه مسويه الكون حزب ضدك بجمعة العايله و000000
فأنتي فجأه صرتي قويه وقررتي تأخذين حقك بالحش والنش والإشاعات ومايظل قاصي ولا داني وإلا وعرف بعيب فلانه وعلانه اللي بينك وبينها ثار والسبب إنتقام
أول شي بسألك فيه قبل الحل أنتي بهالطريقه قدام نفسك وش تشوفين هل تشوفين بأنك قويه وماشاء الله عليك ورديتي لها الضعف ضعفين ومدري وشو عنتر الغفله صايره
وهل ترتاحين وتحسين بأنك أخذتي كامل حقك منها!!!!!!!!!
أشككككككك لأنك ماأخذتي منها حقك بالعكس عطيتيها زادك والطريق موحش وطويل عطتيها حسنااااااااااااااااااااااااتك وخذتي سيئاتها!!!!!!!!!!!!!!!!!!!!!!!!!!!
الحل قولي بوجه اللي ظلمتك حسبي الله ونعم الوكيل وأفوض أمري إلى الله إن الله بصير بالعباد
ساعتها راح تهزينها من دااااااااااخل وراح تحس بخطاها وتتمنى أنها تعتذر منك وحتى إن كابرت فأنتي أخذتي حقك منها وخليتيها تندم على سواياها
وأنتي إذا فوضتي أمرك للجبار هل تتوقعين إنه راح يضيع حقك !!!!!
لا والله فإنه سبحانه لا يعجزه شي فالأرض ولا في السماء وهو السميع العليم ولينصرنك بنصره من حيث تيأسين ومن حيث لاتحتسبين سبحانه
فدعوة المظلوم ليس بينها وبين الله حجاب ولينصرنها سبحانه ولو بعد حين
فقارني كيف تبين تأخذين حقك وبأي طريقه؟؟؟؟؟؟؟؟؟
السبب الأخير
فضااااااااااااوة وقت
ماعند أبو جدك سالفه قمتي حشيتي بفلانه وعلانه وإكتسبتي عشرات الآثام فوق إثمك
أولا ضياع وقتك في شي مهوب مفيد وياليته بس مهوب مفيد إلا كبيره من الكبائر
ثانيا زيادة غفلة قلبك بسبة كثرة ذنوبك
وغيرهاااااااا كثير لو نسألك ليه ماتحفظين قرآن أو تسمعين محاظره أو تقرين كتاب تعللين والله البيت والعيال والزوج والشغل واللي يسمعك يقول كوندليزا رايس من كثر الشغل تكفين يالمهمه هع فالغيبه والمجلات والطلعات ماقلتي مشغوله
الحل من ترك نفسه للفراغ شغلته نفسه بالمعصيه
يعني نفسك إذا صرتي أنتي فاضيه لازم تعطيك معاصي تسوينها وتذكرك بها
فخليك مفيده لك دور بالحياه روحي تحفيظ سمعي شريط ديني على الأقل أقري سطر من التفسير باليوم مره صلحي بين الناس علمي عيالك سوره صغيره سوي طبخه وديها المسجد يوزعها الإمام على العمال
خلك مفييييييييييييييييييييييده لأن العمر قصير قصير وحنا غافلات يالله العافيه
يتبع الطرق الصحيحه للنصح في مجالس الغيبه
بناااااااااااات رجاء لا وحده ترد إلى من أكمل رجااااااء عشان الموضوع مايتقطع
عن
شاهد أيضاً
انواع الاحراجات!!!! لا يفوتكم هع هع ….
أنـواع الإحراجات اللي تصير لأي أحد منا.<< ——————————————————————————– أنـواع الإحراجات اللي تصير لأي أحد منا…. …