اخوان .. الاول وثقت فيه و خانني .. و الثاني حبني وما حبيته وجرحته بس يبي يتقدم لي !!

بدش بالموضوع على طوووول لاني ماعرف اسوي مقدمات ومن هالسوالف 💡

على ايام مراهقتي كنت حيييييييل بريئه .. من البيت للمدرسه ومن المدرسه للبيت

عندي خالتي ساكنه بديره ثانيه عشان جذي احنا يالعيال نتواصل مع بعض بالماسنجر والايميل .. بحكم انه عادي عندنا ان البنات والاولاد من العايله يكلمون بعض .. بس بنفس الوقت انا ما كنت اكلم عيالها بالتلفون ابد بس بالماسنجر والايميل احس انه اسهل وما اتوتر ولا شي

واحد من عيالها بنفس عمري هذا بالذات ما كنت ادانيه ماااا احبه كان وايد دفش معاي ماعنده اسلوب وكله يهاوش ويجرحني بكلامه لدرجة ان كــل مره يكلمني فيها ابجي بسبة اسلوبه معاي

جاني بيوم يعترفلي بحبه .. وانا طبعا كنت حااااااقده عليه هههههههههههه .. لقيتها فرصة عمر وقلت لازم استغلها .. قلت له اووه للأسف انا عندي حبيب ههههههههههههه والله بكل غباء قلت له جذي بس اهو ما صدقني .. حاولت اقنعنه قلت له كيفك صدقت ولا ما صدقت بس هذا اهو الصج ومو شرط يعجبك كلامي .. اهني الولد شك بالموضوع .. قام يسألني عن حبيبي الخيالي وانا اخترعت لي شخصيه و قمت اجاوب على اسئلته .. تنرفز وااايد و قام يقول لي اهو بشنو احسن مني؟ اصلا هذا يلعب عليج ما يحبج انا الي احبج و ابيج وحبيبج هذا لو يموت ما يقدر يسوي الي انا اقدر اسويه لج و و و و و… انا قلت له شنو انت ما تفهم عربي؟ قلت لك انا احب فلان واهو يحبني يعني وجودك هذا ماله داعي .. وبعدين اذا عبالك اني ممكن بيوم اخونه واخليه عشانك خلك متأكد اني مثل ما خنته راح اخونك .. اهو هني قام يخربط بالحجي و قام يغلط علي و قال لي كلام مو حلو .. بس حرام والله احس اني جرحته حيييييييييل احس انه كان يبجي

بس مع ذلك استانست اني قدرت انتقم منه هههههههههههههههه بس اهو سبني و قال لي كلمه حدها مو حلوه وبحياتي محد قالها لي وااايد حزة بخاطري
كنت احس انه مراهق غبي وما عنده ذوق وما يعرف طريج الذرابه و خبل وما عنده مستقبل و وو و

عقب تقريبا سنه جاني اخوه الكبير يعترفلي بحبه!! عاد هذا كنت وايد احترمه و احبه .. مع ان فرق العمر كبير بس لما نسولف ويا بعض ما احس بفرق العمر و اقدر اسولف معاه بكل شي و وايد ارتاح له .. وكنت وايد احترمه لانه يهتم بدراسته واحس انه يهتم بمستقبله.. لما اعترف لي بحبه ما كنت ابي ارفضه .. وبنفس الوقت ما عرفت شلون اوريه اني موافقه عليه .. سكتت وما عرفت اتصرف .. اهو فهمني اني راضيه فيه .. و حبيته اكثر لانه يفهمني حتى وانا ساكته .. كانت اخر سنه لي بالمدرسه و اهو اخر كورس بالجامعه .. صار يوعدني اننا نكون لبعض وانا وعدته اني انطره .. وعدني ان بعطلة الصيف يتقدم لي وانا فررررررررررحت فيه وكنت اعد الايام … و فجأه اختفى ما صرت اشوفه بالماسنجر .. ادزله ايميلات اسأل عنه وما يرد علي .. طبعا ما سألت اخوانه استحي اسألهم عنه .. قلت ان شاء الله ما فيه شي يمكن ان ايميله انباق .. و حافظت عالوعد و قعدت انطره وانا مجابله دراستي

غاب عني تقريبا شهرين .. بيوم من الايام دشيت غرفة امي لقيتها تكلم خالتي وهي مستاااااااانسه .. صكت التلفون جان تقول لي ان ولد خالتي هذا تزوج وان مرته حامل !!
ردت فعلي كانت غريبه احس ان الكل لاحظها لاني قمت اسأل من متى تزوج؟ متى لحقت تحمل؟ و اصلا منو هذي؟ حتى صوتي تغير و طلعت رحت غرفتي بجيييييييت من القهرررررر .. و رسبت بالمدرسه مع اني كنت شاااطره بس والله اثر فيني وااايد الله يسامحه..

استغفر الله حتى بلحظه فكرت ان اخوه اشتكاله وهذا حب يهينني مثل ما اهنت اخوه وينتقم له مني.. الله اعلم .. بس ليش تسوي فيني جذي؟ ليش يا ولد خالتي انا ما استاهل تسوي فيني جذي .. ليش تجرحني ليييييييش

والحين مرت على هالسالفه تقريبا 7 سنين .. خلال هالفتره ولد خالتي الاول كان يتواصل معاي من فتره لفتره يسأل عن احوالي و يتطمن علي .. خصوصا بالفتره الي كنت اسافر فيها .. يخاف علي بس عبالي انه خوف اهل عادي .. بعدين الولد تغير الحمدلله تدين ومع ذلك ما ينسى يسأل عني ويتطمن علي

الحين بعد كل هالسنين رد يعترفلي بحبه .. بدون ما يجيب طاري الموقف القديم .. بس كان خااااااايف من ردة فعلي .. صراحه ما تدرون شكثر استااااااااااااااانست كنت شوي و بتشقق من الوناسه .. ما كنت اتخيل ان حبه صادق واني كل هالسنين في قلبه .. حسيت بتأنيب ضمير اني جرحته بيوم .. اتمنى انه يسامحني

قررنا انه يخطبني رسمي بهالاسبوع .. بس تووووووني اتذكر اخوه .. شنو بيكون موقفه؟؟ و شنو بيكون موقفي جدامه؟؟ انا عمري ما قلت له كلمة حب بس وعدته ان اكون له .. ولا خنت الوعد بس اهو الي خانه .. ولا حتى سألته عن السبب ولا كلمته و بعدت عن حياته ولا ادري عنه من سبع سنين ولا فكرت فيه .. مثل ما استهان فيني استهت فيه وبعته بتراب مع انه جرحني بالصميم الله يسامحه