عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
يا اخواتي انا مشكلتي جايز انها بسيطه بنظركم
لكن من قل تجربتي وخبرتي بالحياة ابي مشورتكم
ابي رد فعلي يكون حكيم احس اني واقفه حايره اخاف اتصرف اي تصرف غلط
بداية اعرفكم على نفسي انا عمري 23 وعندي بنت عمرها 3 سنوات وحامل في الشهر الرابع
مشكلتي هذي الايام مع الحمل مزاجي صعب ونفسيتي تعبانه مره مره دايم صياح وكتمة وضيقه
وزياده على هذا ان المشاكل كثرت بالناس اللي حولي مثل اهلي وصحباتي وخواتي
فصرت احبس نفسي بالبيت الا اذا تكرم زوجي -اللي ما اشوفه الا ساعه باليوم- وطلعنا,
هو موظف دوامه طويل وعنده اشغال هنا وهناك غير الوناسة وتوسيع الصدر مع الشباب والقهاوي والشيشة
طبعا انا مقدر ادخلكم بالمشكله على طول
لازم اعطيكم شوي تفاصيل عن حياتي عشان تقدرون تفيدوني وتساعدوني
اللي خلاني اكتب لكم موضوعي هو موقف حصل قبل اقل من ساعه
هو رجع من دوامه الساعه 6 وانا مجهزة السفره وتغدينا
وكل الوقت عافس وجهه ومكشر ويشتكي من التعب والدوام والقرف
طبعا انا صدقته وقلت له مايستاهل الموضوع هدي نفسك ونام نص ساعه واطلع كمل اشغالك
وظل عافس وجهه ويتنهد ومكشر
خلصنا الاكل وجلسنا ويشتكي من صداع
قلت له خلاص كنسل مشاويري اليوم خلها بكره عادي “انا كنت طالبه اغراض من البقاله ومحتاجين سباك يجينا اليوم والمفارش يجيبها من اللاندري”
فلما شفته بهالحال قلت له كنسلهم اليوم دامك تعبان وخلها بكره وطار من الفرح
وشوي قام وراح يكلم بالتلفون بعيد عني
ولما رجع خمس دقايق ولبس ثوبه وقال في امان الله على اساس عنده شغل
لكن سبحان الله نغزني قلبي
ورحت اطل عليه من الشباك لقيته هو وصديقه يطلعون مجموعة معسل من شنطة سيارته ويحطونها بسيارة صديقه
واللي كلمه بعيد عني هذا صديقه يبي يتفق معاه يمره!! انا فهمت الملعوب كله
طبعا لا فيه صداع ولاهو تعبان ولا شي!
لكن شكلهم متفقين على طلعه مع الشباب اما عالبحر او بالشاليهات
وماخذين المعسل معاهم وناوينها سهره من بدري
وسوا لي هالفلم كللللللله عشان اعفيه من طلباتي
وعشان يمديه يطلع بدري معاهم
علما ان لي كم يوم محبوسه بالبيت ولا فكر فيني ولا في بنته
بس فكر بوناسته بس قدر يكذب علي ويسوي نفسه قرفان من الدنيا والشغل عشان ما اشك بشي
بس ربي فضحه قدامي
مافكر يقول بطلع زوجتي الحامل التعبانه ولا بنتي المسكينه لا!
بس قدر يتفق مع ربعه يسوون سهره ويفلونها ومعسل هذا غير اللي مدري عنه
طبعا هو مايدري اني شفتهم وعلى اساس اني مصدقه ان عنده شغل وتعبان
وان الفلم اللي سواه مشى علي
سبحان الله من دخل من باب البيت لين طلع وهو مشتغل تمثيل وعلى باله حبكها صح
الحين انا كيف اتصرف معاه؟؟ وش اقوله؟؟
لا احد يقولي اسكتي واصبري او طنشي
تكفون وشلون اسكت وهو تاركني بهالحاله وهالنفسيه وتعب البيت والحمل والبنت حتى اهلي شايفني صرت ماعاد اروحلهم ولا صديقاتي ومالي الا الحبسه بالبيت
شلون اسكت عنه وهو مخطط ومدبر له خطة طويله عريضه ومقطع نفسه بالتمثيل
عشان يسهر مع الشباب مدري وين
والله لو بيدي رحت انا ووسعت صدري ولا اهتميت فيه
لكن مابيدي حيله غير اني انحبس بالبيت واحرق دمي
علموني شلون اتصرف معاه
كيف اواجهه ابي اتصرف تصرف حكيم مو تصرف طايش يمكن ينقلب علي!
