الصيادية على طريقة ماماالطريقه الصح

مرحبا فراشات …..
أستغرب من بعض الوصفات اللي تقدم طريقة الصياديه مع احترامي للجميع ..شي السمك مقلي .. شي يحرقوا سكر عشان يطلع الرز بني 💡 بصراحه عدموا تاريخ هذا الطبق الرائع في الأصل من ينبع
عشان كذا جبت لكم اليوم الصياديه على طريقة ماما وهي أصلاً الطريقه الصح تاكلي منها ما تشبعي صدقوني رووووعه وبيضي فيها وجهك قدام زوجك غير يقلك ياسلام
شوفوا حبيباتي الطريقه مالها مقادير معينه بس الصياديه تعتمد في الأساس على الكشنه وهي اللي تخلي الرز بني اذا كانت مزبوطه فالطبخه تكون مزبوطه نبدأ :
(1)كميه من البصل المقطع تقطيع عادي مو مفروم مره عشان ما يتعب في القلي يعني من 6_8 حبات يقلى في زيت غزير على نار هادئه مع التقليب من وقت للثاني لين ما يصير لونه غامق يعني مو ذهبي زي ما نحمره لبعض الطبخات لا يكون بني غامق ونصفيه على طول في صفايه عشان ما ياخذ لون زياده من الحراره ويسود (أنا عارفه ممكن ما يزبط معاكم من المره الأولى زي حالاتي مرات ومرات عشان زبط وبيني وبينكم أحياناً أخذ من عند ماما الله يخليها ليا جاهز ومصلح مافيه أكشن بس بصراحه يستاهل التعب)
( 2)السمك أفضل نوع للصياديه الناجل.. أوالهامور اذا مافي ..جيبيه مقطع جاهز من المحل يقطعه لكِ
(3) جيبي الكشنه وخذي مقدار وحطيه بالخلاط الجك يعني تقريباً ربع الخلاط أو أقل شويه وحطي عليه مويه نصف الخلاط ومن 1_2حبه طماطم ومن 2_3فص ثوم وممكن أكثر حسب رغبتك واخلطيه وبعدين حطيه بالقدر وأتركيه يغلي شويه عشان تطلع نكهة البهارات فلفل كمون كزبره ناشفه وشوية قرفه شوية زنجبيل وشوية خولنجان بودره والملح وحطي السمك وحطي عليه المويه الحاره اللي تغطيه يعني شويه مو مره /وسيبيه يطبخ ربع ساعه وماتتركيه أكثر لأنه السمك ما يطول بالاستواء .
(4) شيلي السمك على جنب كذا خلاص هو جاهز يوضع في صينيه حابه تسخنيه قبل الاكل سخنيه وخلي معاه شويه مرقه للتسخين
(5)صفي المرقه من الشوائب ومن الشوك ان وجد وحطي عليه الرز وقبل ماتنشف عنه المويه بشويه سيحي قلم زبده وخليه يقدح شويه وحطي عليه شوية هيل وصبيه على الرز وقفلي النارواتركيه ينكتم شويه ……جهزي السلطه الخضره والطحينه أو بالحمر تاخذي نقيع الحمر وتحطيه على السلطه العاديه …..جربوها ماراح تندموا وسيبوا الوصفات الثانيه وبلغوني كيف طلعت وانا انتظر ردودكم
وبالعافيه
ملاحظه
الطريقه جداً سهله وعشان تسهلي عليكِ كشني البصل قبلها وممكن تسوي كميه وتخليها لكذه مره و عشان يومها مايكون عندك شي غير باقي الخطوات
يمكن أنا كثرت الخطوات عشان أسهل عليكِ الطريقه لكن والله ولا شي اذاكانت الكشنه جاهزه ماتاخذ منك شي وأي سؤال أو حاجه مو مفهومه أنا جاهزه

تحياتي للجميع:(