العيش البيتى خطوة خطوة بالصور لعيون الزهرة المالقة

الاول انا عامله مقدار 5 كيلو
المقادير
5كيلو دقيق
5اصابع زبده 100 جرام
معلقتين كبار سمن بلدى
معلقه كبيرة خميرة فوريه
معلقتين سكر
رشه ملح
لبن فاتر
ماء فاتر للعجن

الطريقه

انخلى الدقيق وشيلى منه مقدار طبق للاستخدام اثناء الخبيز وضيفى عليه الملح

ضيفى عليه السمن

افركى السمن كويس جدا فى كل الدقيق لحد لما يتوزع على الدقيق كله
هنا السمن اختفى كله فى الدقيق

جهزى الخميرة وحطيها فى السكر من قبل ما تبداى الشغل خالص ولما تخلصى السمنه فى العجين ضيفى الخميرة والسكر

ابداى ضيفى اللبن شويه شويه ومش تضيفى تانى الا لما الدقيق يشرب اللى حطتيه الاول

انا اضفت لتر لبن

وده شكله لما اضفت اللبن وبدات اعجن

العجينه طريه بس لسه محتاجه ميا
سخنت ميا فاترة زى دمع العين وهى دى اللى هستخدمها للعجين

ضيفى الميا شويه شويه واعجنى
هتلاقى العجين لازق فى ايدك كده

اوعى تضيفي دقيق عشان يمسك كده هتقعدى تضيفى دقيق وميا لحد لما تنتهى بعشرين كيلو مش خمسه

كل ما تعجنى كل ما الدقيق يتشرب والعجينه تتماسك وتسيب ايدك

كده العجينه انتهت وسابت ايدك

امسكى حته صغيرة بايدك وحركيها وافرديها لو لقتيها شديده ومش طريه ومش بتتمط معاكى

ضيفى شويه ميا واعجنى تانى

لما تضيفى الميا وتيجى تعجنى هتلاقى العجينه طريت تانى وطردت اللبن ولزقت فى ايدك

عشان كده ضيفى الميا شويه شويه بايدك مجرد رش على العجين

واعجنى لحد لما تلاقى العجين مش شديد معكى وسهل في ايدك

وده الشكل النهائى بعد ما خلصت عجين

العجين تماسك ومش بيلزق
دى ايد فرح كانت بعجن معايا وبصراحه عداها العيب وقزح
مرضتش اصور لكم العجين هى حاطه رجلها فيه
الطيب احسن
سبيه فى مكان دافىء يخمر وغطيه
انا غطيته بالكوفره عشان يخمر اسرع

وكده بعد ما خمر

حجمه اتضاعف وملى الطبق
جهزى المكان اللى هتحطى عليه العجين
انا معنديش مكان ففرشت ورق مجلات ورشيته بالدقيق
اىا كان السطح اللى هتحطى عليه رشيه بالدقيق وابداى كورى العجين(قرصى العجين)واعمليه كور صغيرة اكبر من كرة البينج

ولما تخلصى المقدار كله
حضرى قطعه قماش واغسليها وخليها مبلوله وغطى العجين عشان وشه مش ينشف وسبيه شويه
لحد لما يخمر تانى

لما يخمر وحجمه يكبر سخنى الفرن

انا شيلت الشبكة والرف العلوى فى الفرن وغسلت الرف اللى على النار مباشرة عشان اخبز عليه
بيبقى اسرع من الطاسه والرغيف بيستوى

حضرى مكان تفردى عليه العيش ورشيه بالدقيق وابداى افردى الرغيف مدور بالنشابه

فى ماكينه بتفرد العيش وبتطلعه طويل عندنا فى مصر

بعد ما تفردى العيش بالنشابه افرديه رقيق وبعدين حطيه بين ايديك وحاولى تكملى فرد

الخطوة دى مصورتهاش مش عرفت

حطى الرغيف على ايدك وحكى ايدك التانيه فوقه ايديكى مفروده وابدئى حركى ايديكى يمين شمال هتلاقى الرغيف بيتفرد وبيتخلص من الدقيق اللى عليه

حطى العيش فى الفرن وسبيه يستوى

العيش عشان يقب لازم النار تكون عاليه الى حد ما بس حاسبى احسن يتحرق ارضيته

لو وش الرغيف مش احمر واللى تحت احمرت اقلبيه

لما تطلعى العيش حطيه على بعضه علطول وغطيه عشان يفضل طرى
لو عاوزاه ناشف سبيه فى الهوا ينشف