الكل يدخل ويشارك برأيه وخصوص الأرامل

أول شي أسأل الله العلي العظيم ان يفرج هم كل من دخل صفحتي وقرأموضوعي هذا

بدخل بالموضوع على طول لأني ماحب المقدمات

ليه الارامل شريحه منسيه بمجتمعنا؟؟؟؟

الارمله اللي ضروفها صعبه ومالها أحد ليه المجتمع والحكومه ماتلتفت لها؟؟

أنا اكتب موضوعي ومعاناتي وابي صوت كل ارمله مغلوبه على امرها يوصل

للكل وياليت يوصل للجهات المسؤله

وين تروح الأرمله اليتيمه اللي ماعندها سكن ولا وظيفه ؟؟

وشلون تصرف على عيالها ؟؟

لا تقولون لي يطلع لها راتب من الضمان الأجتماعي

وش تسوي 850ريال فقط في حياة أسره

بتسد الايجار او بتسد الفواتير او بتجيب مقاضي للبيت

ولا تقولون لي لكل فرد يصرف نفس المبلغ من الاسره

انا مثلا كنت متزوجه غير سعودي ولما توفى طفلي ماله اي شي ولا يصرف له المبلغ باعتباره غير سعودي

يعني المبلغ يصرف لي انا وبس

بالله وش تسوي 850ريال فقط في كل امور الحياة والمصاريف اللي ماتخلص

واسمع ان في اراضي وبيوت توزع على الارامل وكله كلام غير حقيقي لاني ماشفت شي

لاني صارلي اكثر من سنه اسأل عن كيفية الحصول على ارض منحه من الحكومه وكل يقولون مافي شي

انا ماكتبت الموضوع علشان تفهمون انها طراره وشحاذه لا والله

انا كتبت لاني حفيت مالقيت وظيفه

كتبت علشان ابي سؤالي يوصل للكل ليه ماتعامل الارمله معامله خاصه ويتم توظيفها بدون شروط مراعاة لظروف اللي حدتها تدور الوظيفه

تعبت وانا ادور وظيفه ومالقيت

كل شروط في شروط

الواجب الارمله تتوظف واكبر شهاده عندها هي شهادة وفاة زوجها واعظم خبره لديها هي انها ام لاطفال ايتام برقبتها

انا متخرجه من ثانوي ودرست 3سنوات بالجامعه يعني فاهمه ومتعلمه ليه مالقيت وظيفه؟؟

ليه كل شي بالواسطه؟؟

ليه مافي مراعاة لظروف الارمله؟؟

والله في متزوجات وازواجهم اغنياء وهن غنيات ومتوظفات بأعلا رواتب من باب التسليه وضياع الوقت

واللي يموتون من الجوع ومايشترون ملابس علشان يوفرون مولاقين وظيفه لو بألف ريال

تسد جزء من حاجاتهم

ليه الأرامل منسيات بمجتمعنا ؟؟

ليه الايتام محد يفكر بمستقبلهم؟؟

لاتقولونلي الحكومه ماقصرت عنهم لاني اتكلم من واقع تجربه مره

مانبي كلام مزيف نبي الواقع المر

الواقع اللي عشته انا وعاشته معي كل ارمله حقوقها مهضومه

مااتكلم عن اي ارمله طبعا

الارمله اللي ترك لها زوجها ثروه وخير ماراح تحتاج لشي

اتكلم عن الارمله اللي نتفتها الظروف من كل جهه

الارمله اللي لما تنام تبكي خوف على اطفالها من بكره

مانبي شي الا الوظيفه

مانبي لا بيت ولا ارض

نبي نضمن وظيفه نستند عليها ونامن من غدر الظروف