عالم البنات النسائي كل ما يخص المرأة العربية من ازياء وجمال والحياة الزوجية والمطبخ
أتمنى من جميع من يمر على موضوعي و يقرأ مشكلتي إني ينصحني بأي معلومة يملكها
أنا عندي مشكلة تعبت منها كثيييييييييييييييييييييييييييييييير و مو لاقية لها حل و لما ضاقت بي الدنيا قررت أطرحها في هالمنتدى الرائع اللي ياما ياما ياما استفدت منه
ما أبغى أطول عليكم بالشرح و التفاصيل باختصار أنا أعاني من ارتفاع في هرمون الشعر الزائد (هرمون الذكورة) و طبعا هالشيء سبب لي نبوت الشعر الأسود الخشن على الذقن و الشارب
طبعا كلنا بنات و عارفين شقد هالشئ يسبب إحراج شديد و أزمة نفسية حقيقة للبنت و معاناة لا يمكن إنه يتخيلها غير اللي مر بها ” بعيد الشر عن كل بنت تقرأ موضوعي”
تخيلوا يا بنات و أنا أعتبر لسه عروسه حتى ما أخذت سنة من تزوجت، و ابتليت بها المشكلة و الله صرت حتى أستحي أرفع وجهي بوجه زوجي، ما أقدر أطلع أي مكان ما أقدر أحضر أي مناسبة و السبب التعليقات و الأسئلة المحرجة اللي أواجهها، جربت كل أساليب الحف تقريبا ما فيه شئ خفف من هالمشكلة
سألت و بحثت و تقصيت كل الأطباء يقولون ما فيه شئ يخفف من أعراض هالمشكلة الا جلسات الليزر ، و على الرغم إني متخوفة من الليزر بس شسوي أمري لله، و ما دام ما فيه حل ثاني لازم أستسلم..
المهم توجهت لإحدى المستشفيات الكبيرة عندنا هنا -أنا من الأحساء بالمنطقة الشرقية- اللي سمعت إنه فيه عندهم جلسات ليزر و انصعقت بسعر خياااالي للجلسة الواحدة.. و أنا ما عندي إمكانية لتغطيته مستحيل خاصة إني مش موظفة يعني على الله و على وظيفة زوجي الله يحفظه لي!
الله يخليكم يا بنات ساعدوني، نصحوني، وين ممكن أسوي هالجلسات، يقولون فيه مشاغل تسويها بس أنا خايفة حيل و أبغى مكان مضمون، ما أبغى يترك علامات بوجهي أو تطلع بقع سوداء تشوه بياض بشرتي و تصير المشكلة مشكلتين!
كلما سألت ما أحد أفادني و لا أحد دلني، أبغى مكان هنا بالحسا مضمون يعملها بسعر مناسب مقدور عليه، احنا لسا متزوجين و حالتنا على قدنا زي ما أنتوا عارفين الزواج و ديونه و لا أبغى أكلف على زوجي و أطلب منه شئ فوق طاقته و الله أحس إني خجلانه من نفسي بس شسوي المشكلة تتفاقم يوم عن يوم، و الحمد لله على كل حال
سامحوني حبيباتي على الإطالة على الرغم إني وعدتكم إني ما أطول عليكم بس الكلام جر بعضه على ما يقولون..
أنتظر ردودكم بنصيحة معلومة أو حتى دعوة.. الله يجزيها الجنة كل اللي ترد علي
خالص ودي..
