عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته ..
اسعد الله اوقاتكم ..
حلقه من سلسلة مشاكل مشاغل حائل اللي ماندري متى تجي الحلقه الاخيره ونخلص ..
بقولكم موقف صار معاي بالتفصيل .. ويشهد الله علي اني مازدت ولا نقصت بحرف واحد ..
وغرضي الوحيد من كتابة المشكله هو التنبيه لا التشهير ..
من امن العقوبه اساء الادب .. وخصوصا عندنا بحايل ..
الموقف هذا صارلي قبل يومين وتحديدا بيوم الخميس 23 / 7
كان زواج اخوي في قريه تبعد عن حايل 100 كيلو
وطبعا زي كل عائله عندهم زواج حجزنا صبابات عدد 2 ومفتشه وحده عند الباب على الجوالات وكوافيره ..
واتفقنا مع مشغل (نوره) في حي الجامعيين يأمنون لنا كل ماسبق ذكره ..
دفعنا عربون 500 ريال والمطلوب 1000 فقط ( طبعا بس مفتشه وحده وصبابتين)
والكوافيره فلوسها بلحال يعني اعطيناهم نص المبلغ كعربون ..
جاء يوم الزواج .. ومر العصر مااحد جاء منهم .. دقيت ردت علي صاحبة المشغل وقالت هم طلعوا لكم من زمان
بس ضرب الكفر معهم .. وانتظرنا وطبعا انتم عارفين الوضع بالقرى
المغرب يجون اغلب المعازيم ولازم نكون بكامل اناقتنا بالاستقبال .. يعني المفروض الساعه 6 ونص المغرب نكون جاهزين وهذا اللي اتفقنا عليه معاهم ..
بس اللي صار انو جت الساعه 7 وحنا ماتحرك فينا ساكن ومازلنا بالانتظار ..
ثلاث ارباع المعازيم وصلوا ودخلوا ومااحد فتش لا على جوالات ولا شنط ولا شي ..
جو الساعه 7 سألت الكوافيره وقلت ليش تأخرتوا والشهاده لله كانت صادقه وقالت كنا عند ناس ثانين يعني لاضرب عليهم كفر ولا يحزنون ..
بدت الكوافيره تصلح امي وبعدين خواتي الصغار جت الساعه 10 وانا للحين ماطلعت للمعازيم
وهذا زواج اخوي اللي لي سنه اخطط له .. تخيلوا رقصوا العالم وقلطوا على العشاء وانا لسى اتمكيج واصلح شعري !!!!!!!!!
وياليت المشكله وقفت لهنا وبس ..
والصبابات مااشتغلوا زي ماهو مطلوب منهم تصب فنجالين وتقعد ساعه !! وفشلونا قدام ضيوفنا !
واللي صب القهوه هم حريم جماعتنا يعني لو ماجبناهم ابرك !!
جو قبل نهاية الزواج يبون باقي فلوسهم 500 طبعا انا دفعت للكوافيره فلوسها كامله صحيح تأخرت ومكياجها مو ذاك الزود ولا حتى استشوارها عينكم ماتشوف كشة خواتي الصغار اللي لو غسلناها بتايد ماانتفشت كذا !! بس الموضوع كله مو بيدها والتمسنا لها العذر على اساس انو مافيه وقت ومالها ذنب بالتأخير واهم شي عندي انها ماخدعتني وصدقت معي..
بس الباقيات انا رفضت ادفع لهم الباقي (500 ريال) وماانلام يعني زواج اخوي وماطلعت للمعازيم الا بعد الساعه عشر
وهذا غير الربكه اللي سووها لنا وفرحتنا اللي خربوها علينا .. واساسا المعازيم كلهم دخلوا بدون تفتيش
يعني على أي اساس ادفع ؟؟ وشي ثاني انها حتى المعازيم اللي ماجوا الا بعد 8 مااحد فتش عليهم ..
يعني تسألهم معكم جوال بدون ماتفتش بنفسها وطبعا اغلب الحريم قالوا لا ودخلوا عادي ..
والصبابات ماصبوا يعني بالله علي أي اساس ادفع والقهر انها صاحبة المشغل تكذب علي وتقول ضارب كفر
وهم يصلحون حريم ثانيات !!!!
يعني كل هذا طمع !! مافيه مسؤوليه مافي وفاء بالوعد !
المهم قلت لا ماراح ادفع الـ 500
جت امي وماتبي مشاكل وقالت لهم كم فلوسكم قالوا 1000 ريال
امي ماكانت تعرف شي بحكم اني انا اللي كنت احجز وادفع .. وامي حرمه على نياتها وماتبي المشاكل قامت دفعت الالف كامله مع اني دافعه نصها لهم عربون !!
سكتوا واخذوها وانا مادريت باامي .. بعد يومين امي سولفت علي وقالت تراني دفعت لهم قلت كم ..
قالت دفعت لهم 1000 .. انا انهبلت قلت مالهم الا 500 بس
دقيت عليهم وقلتلها قالت خلاص تعالو خذوها .. راحت امي هي واخوي ويوم جوها قالت لا انا يوم حسبت طلع هذا حسابي كامل ,, ومالكم شي عندي .. ودقيت عليها قالت اعلى مابخيلك اركبيه وضحكت ضحكة استهزاء وسكرت التليفون بوجهي ..
يعني خربوا عرسنا وفرحتنا وسرقونا ..
انا اللحين مابي فلوسي ومابي شي منهم .. اللي ابيه هو اني انصح العالم منهم ..
واكون انا اخر ضحاياهم .. وماابي احد ينخدع فيهم مثلي ..
واللي فرحانه بعرس اخوها ولا اختها لاتخرب فرحتها باانها تحجز من هالمشغل ..
والله ثم والله ماكذبت بحرف واللي صار وكتبته ابي انصح الكل .. ومابي احد يحس بنفس المراره ..
اللهم بلغت اللهم فااشهد
وحسبي الله ونعم الوكيل
منقووووول للتنبيه
