عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
اهلا وسهلا اخواتي العزيزات هذه اول مشاركه لي في منتداكم وإذا عجبتكم مشاركتي ابشروا بالخير اتمنى تنال على رضاكم …………….الحين العيد على الأبواب ومع زحمة الامتحانات وزحمة السوق وزحمة الاستعداد للعيد غير مشاغل البيت والي متزوجة وعندها عيال الله يعين دوشه وحوسه بصراحه آخر شيء تفكر فيه الوحده نفسها وسط هذي الزحمه اليوم عشان عيونكم ومحبتي الصادقه لكم حبيت اقدم لكم هذا الشيء وعن تجربه شخصيه مني وماراح يعطلكم ولا ياخذ منكم لا جهد ولا وقت والنتيجه فوريه ولو حبيتوا تستمرون عليه كل اسبوع مره بعد تصير النتايج مره احلى انتوا وفراغتكم الله يعينكم ويعطيكم الصحه والعافيه بكتب لكم تجربتي ……
طبعاً هذي الطريقه تجهزينها قبل ماتدخلين الحمام (وانتوا بكرامه ) استعداد للأستحمام وهي عباره عن خلطه لعمل سنفره كامله للجسم والاستفاده من الوقت الي تفركين فيه جسمك بحركه دائريه بكفك وتفركين فيه كامل جسمك حتى وجهك بس الوجه تكون حركه يدك اخف وانعم اما اذا كانت بشرتك حساسه لاتستخدمينه على وجهك طبعاً لما تفركين جسمك بصير بشرتك حمراء بدليل ان الدوره الدمويه تتنشط وتتحفز وكل الاوساخ العالقه بجسمك بإذن الله تروح وركزي بالتدليك على المناطق الخشنه مثل الركب والمرافق ادري حمستكم العمليه ماراح تستغرق منك الا ربع ساعه او اقل بعد ماتخلصين استحمي عادي وغسلي جسمك باي غسول سائل للجسم له ريحه حلوه وخصوصاً الي يجيك مجموعه كامله جل للاستحمام وكريم مرطب وسبريه عشان تكون النتيجه :-
1ـ بياض
2ـ نعومه
3ـ ريحه حلوه
4ـ نضاره
وبعد هذا التشويق اكتب لكم على خلطة السنفره واي استفسار انا بالخدمه ……..
مكونات خلطة السنفره كاالآتي :
1ـ ( 6) فناجين سكر
2ـ ( 6) فناجين رز مطحون
3ـ ( 6) ملاعق طعام حليب بودره
4ـ ( 3) ملاعق كبيره نشا
5ـ عصير ليمونتين صفراء
6ـ ملعقتين طعام زيت الوز المر
7ـ ملعقتين طعام زيت الجلسرين السائل
8ـ ملعقتين طعام غسول الحمام المغربي (اختياري )
9ـ عصير خيار تضيفينه حسب الحاجه لكي يمتزج الخليط مع بعض ( تحصلين عليه بوضع مقدرا معين من الخيار حسب كمية العصير الذي تريدين مثلاً خيارتين مع قليل من الماء تضعينه بالخلاط الكهربائي وتخلطينه فتحصلين على عصير الخيار )
ضعي الخلطه كلها مع بعض الجافه بعدها السائله وتخلطينها بدون اضافة عصير الخيار حتى لا يمتزج الخليط ويذوب السكر وانتي بحاجه اليه لعمل السنفره يعني الخليط لا تمزجيه ميه ميه الا اذا خلاص استعديتي لاستخدامه بعدها تخلطينه زين وتضيفين عليه عصير الخيار مقدار ملعقه كبيره طعام او ملعقتين حتى يمتزج الخليط بعدها خذي كميه مناسبه بيدك وفركي فيها الجسم بحركه دائريه وهكذا على كل الجسم ممكن تستثقلونها بس صدقوني السالفه سهله وسريعه كأنك تسوين طبخه ماراح تاخذ من وقتك كثير واعتقد انك تستحقين انك تهتمين بنفسك شوي عقب هذا التعب ………يالله وعشان خاطر عيونكم بدللكم شوي و بعطيكم هديه وهي عباره عن قناع للوجه مو تتخربطون الخلطه هذي لوحدها والقناع هذا اضافه من عندي وعن تجربه بعد مجربته انا شخصياً نتيجته بياض ونعومه خاص للوجه والرقبه والي تبيها للجسم عادي الخلطه عباره عن :
1ـ 3 ملا عق طعام حليب بودره
2ـ ملعقتين طعام نشا
3ـ ملعقتين طعام عصير خيار أو ماء ورد
تمزجين الخليط حتي يصبح مثل الكريم مو سائل يصير مثل الكريم ماسك عمره يعني مو ماء وتحطينه على وجهك عقب ماتغسلين وجهك بغسول منظف للوجه تحطين هذا القناع للوجه والرقبه لمدة ربع ساعه وبعدها تغسلين وجهك وراح تلاحظين الفرق مجرد ماتغسلين وجهك واذا استمريتي عليه بصير بشرتك ماشاء الله بياض وحلاوه عسى ما طولت عليكم حبيت افيدكم قبل العيد اكيد عندكم مناسبات غير جمعت الاهل والاحباب اكيد عندكم اعراس وعزايم يالله عشان تطلعون باحلى طله اتمنى اني افدتكم ومابي منكم الا دعواتكم لي يااخواتي الغالين انا بحاجه لدعواتكم واي استفسار انا بالخدمه انتظر ردودكم.
اختكم المحبه ام عمــــــــــــ2005ـــــــــر
عن Center Nightmar
شاهد أيضاً
كريم اولاي بالتوت مين جربته ؟؟
مساء الخير سمعت كثير عن كريم اولاي بالتوت مدح .. انا عادة اخاف اجرب اشياء …