عالم البنات النسائي كل ما يخص المرأة العربية من ازياء وجمال والحياة الزوجية والمطبخ
اليوم يافراشات ودي افضفض لكم عن اللي بخاطري وعني اللي صار لي بيوم الولاده 💡
عاد من دخلت التاسع وانا اشتري واجهز غير كل مره وعاد كان احساس يراودني بان بيصير لي شي بس شنو مادري؟ 😥
وجهزت الشنطه ووصيت على احلى توزيعات و عااطيني موعد للولاده للحين ماجا بس اللي صار بتاريخ 13 _7_2009 من الصبح جاني ألأم من غير مقدمات ومن غير ماينزل علي ماي ولاشي اللي يعزكم وألأم حار قلت يمكن بنوته لان بأولادي الاثنين ماصار لي جذيه
جهزت نفسي وطلعت الساعه 11 الضحى المستشفى قالت لي الدكتوه توك 2 سم قلت لها بروح البيت وبعدين بجي قالت لي لا مايصير 😡
عاد هناك انا وانا اسمع اصوات الحريم اللي يولدون كأني بعالم البرزخ يتعذبون وانا اتعذب 👿
لحد المغرب اني ولدت بالسلامه 😥 وجبت ولد زي القمر
بس عاد حنا عندنا الوحده من تولد تقريبا نص ساعه ويطلعونها يشوفها الزوج وبعدها يخلونها بالغرفه لين ترتاح ساعتين وينقلونها الجناح
شافني زوجي وتحمد لي السلامه ووشاف المولود وهو طاير من الفرحه:P
بعدها على طول دخلوني بغرفة الاستراحه شويه بس وما اشوف الا تجيني كحه قويه ونفسي مكتوم وثقيل ونا مو حاطه في بالي شافتني الممرضه تقول لي وش فيك ؟:(
قلت لها مادري قالت لي عندك من قبل ربو؟؟ قلت لها لا وانا احس اني بدخل بغيبوبه
التمو عليي الممرضات والدكاتره وانا مادري وش صاير جابو لي دكتور التخدير وقعد يتسأل فيني وانا دايخه يبغي يتاكد وش فيني بالضبط
عاد حطو علي جهاز الاكسجين شاافو ان الاكسجين قل عندي وعلى طول يتصلون بالاسعاف وينقلني الى مستشفى ثاني
الدكتور فهمني قال لي احنا هنا متخصصين بالولاده فقط وماعندنا اجهزه او درايه كافيه عنك فالافضل ننقلك للمستشفى طوارئ الحوامل قلت له خير
اللي ذبحني وكسر قلبي وانا راكبه الاسعاف زوجي مستانس رايح للسياره يجيب شنطتي وهو طالع شافني وانا يركبوني الاسعاف وانا بس بنظرات اطالعه واشوف ولدي الكبير يبغا يبكي ومنظره للحين ماراح من عيني ولابسين ملابس جدد ومستانسن هو واخوه وانا خلاص حسيت اني بودع الدنيا وبايعه ومخلصه 😥
نقلوني للمستشفى الثاني ولا الدكاتره يتراكضون علي ويركبون علي جهاز الاكسجين وجهاز القلب والالمغدي ويجيبون لي الاشعه لعندي
طلع عندي ماي على الرئتين الظاهر ماي الحمل وليوم ثاني الصبح يدورون بي من اشعة القلب لي اشعة مقطعيه للعياده التخصصيه وبعدها قالو لي ان القلب تأثر من الولاده وعاد ذاك اليوم كل واحد له رأي ماتم دكتور ولا دكتوره الا جاني وكل دكتور له راي في مرضي واستمرت حالتي وانا بالغرفه محد يدخل علي اذا يجي زوجي واهلي مايرضون يدخلون الا بس اثنين
المهم ركبو لي الله يعزكم انبوب عشان مجرى البول وعطوني ابر يتنزل السوائل اللي على الرئه ويومين على هالحال يشيلون ويحطون فيني ويمكن اكثر من خمس ابر في اليوم يعطوني حتى ايديني كلها زرقا من الابر 😆 hy:
وانا دايخه وماني داريه عن شي لحد بعد يومين طلعوني الجناح يظلو يراقبون حالتي وامس الدكتوره مو راضيه تطلعني من المستشفى وانا كل يوم صيااح ونياح ابي اطلع بس تعبت كلما اشوف عيالي واني متعوده عليهم مااطلع عنهم وعلى طول معاي وزوجيم اني متعوده اتركه هالمده بس يطلعون دمعتيم اتوقف
امس دكتور القلب اذن لي بالخروج وقال وعطاني موعد ثاني عشان يتاكودن وش اللي حصل لي بالضبط ويتابعون ويالله بجذيه يكون انكتب لي عمر جديد وما انكر اني للحين تعبانه بس الحمد لله يوم عدت على خير وشفت ولدي بخير والحمد لله مثل القمر يجنن وان شاء الله حالتي تتحسن للاحسن بدعواتكم لي ➡
