بعض من معاناتي

طبعا يمكن هذي اول مره اكتب هنا بالمنتدى
انا سجلت زمان في بدايات معرفتي بالنت وطبعا لغرض التحاضير
لاني ما كنت اعرف شي الا اني ابحث في المنتديات التعليمه
وهذا يمكن سبب تسميتي بـ ابله 111
اطلع على بعض المواضيع هنا بالمنتدى مو دايم

بس ما ادري وش اللي شدني اني اكتب احساس غريب
احس اني ابي اقول شي من اللي عندي لاحد يمكن
ارتاح ويمكن القى لي حل ويمكن ويمكن
ما ادري وش ورى يمكن

انا بنت عشت يتيمه من اول حياتي
صادفتني اشياء كثيره فيها الحلو وفيها المر وطبعا المر اكثر

ما ابي اسرد كثير لاني ماراح اخلص
بس باختصر لكم اخر ما انا فيه

لاني محتاره ومدري وش اسوي وابي اسمع غيري
يمكن اكون انا غلطانه ولا صح ما ادري

طبعا زيي زي اي بنت درست وكملت دراستي
لين صرت ولله الحمدمدرسه في احد المدارس

لما يتبقى امامي سوى ان اتزوج وارتاح من كل شي معذبني
تمنيت اني القى الانسان اللي يفهمني وافهمه واللي يناسبني ويحتويني
احلامي ما كانت صعبه
طبعا ايام الدراسه ما كنت افكر بالزواج
لين وصلت للي انا فيه الان
صارت كل مره يتقدم لي واحد ومن غير ماياخذون الرد مايرجعون
اول مره ما اهتميت والثانيه والثالثه …. الى ان بديت اوسوس
ليش وش فيني كذا
اقسم بالله العظيم مايمر شهر ولا 3 الا جاي واحد متقدم ونفس الطريقه
لين صرت اخاف من اي طاري خطبه
لدرجة انها قلت ثقتي بنفسي تعقدت كثير والموضوع هذا اثر فيني كثير
ارقيت نفسي
استمريت على قراءة سورة البقره شهور ونفس الشي

كنت ابكي لين انام من شدة الاحراج اللي احسه قدام اهلي واخواني
المشكله كلهم نفس الطريقه ولا احد حتى يجامل ويعتذر كله خرج ولم يعد

طبعا يمكن تقولون فيني شي يخليهم يروحون
لا والله اقسم بالله ما امدح نفسي من حيث الجمال جميله
من حيث الاخلاق والله ما سويت اللي يوطي راسي بين الناس
من حيث العائله والقبيله يالله لك الحمد
من حيث التعليم قلتلكم

بالعكس هم يجون على هالشي على شكلي واخلاقي وسمعتي بس ما ادري ليش يصير كذا
ناس تقول انتي مسحوره وناس فيك نفس وناس فيك عين وهكذا

داومت على الاستغفار والدعاء شهور
ليس حبا بالزواج لا والله ابي استقر واحس لي كيان ومكان وابي اطفال
طبعا هذا مطلب طبيعي لك وحده واهمها الستر
وخاصه انا بما اني وحيده واعيش فراغ ووحده صعبه في حياتي

مرت الايام وصرت اذا وحده جتني اول انا تخطبني قبل احد من اهلي
ارفض حتى لو الرجال كويس من الخوف انهم يسووون نفس غيرهم
لين جا واحد وخطب كلام بس من بعيد ما اهتميت ولا اعرت الموضوع اهتمام
بعدها قالو لاختي رفضت ع طول من غير ما اسال عنه
بس خواتي وامي ما اهتمو لرفضي لانهم يبغوني اتزوج
عطوهم الاوكي وهم متخوفين حتى هم شكل صارت عندهم عقده
بعد فتره طويله مايقارب شهر
سافرنا وهم ماجو قلنا نفس الشي
رجعنا وجو اهله وكل هذا وانا ماني مستوعبه
ما اعرف عنه شي رغم انه من نفس المكان ومن نفس القبيله بس من فخذ غير على قولتهم
ع اساس حريم بس ولا يجون الرجال فجأه حار حار وانا عندي برووود
طبعا امي اهم شي الصفتين اللي قلتها لكم من نفس المكان ومن نفس القبيله ومطوووع
انا ما قلت الا شي واحد اهم شي شكله يعني ما ابيه جميل اهم شي مقبول
هذا بعد ما قالو ا مطووووع………….(يعني مضمون)
قالت بنت عمه حلوووو احل منها وامدحي فيها
لحد الان مخدره انا اخواني مترددين ولكن امي و2 من خواتي مصرات
وانا كان دوري سلبي جدا ساكته ابي اشوف وش يصير
مسكني واحد من اخواني وقال يابنت هذا ما يناسبك ولا هو متوافق معك ولا ولا
وانتي تراك وتراك ومن هالكلام ماكان يدور بخلدي الا شي واحد ان الفرص راحت علي
ومدري وش اسوي مراررره في حلقي اجلس وارجع لوحدتي
ولا اتوكل على الله…..؟ رغم اني ماعندي قناعه واحد بالميه فيه
ولكن مدري كيف شعور ما اقدر اوصفه
اول يوم من رمضان جا وجاب الشيخ صعبت علي نفسي خفت ما صدقترفضت وبكيت
واصريت والناس بلشت اللي حولي لان الشيخ كان بالمجلس ماعاد فيها
اخواني صعب عليهم الموقف امي واختي زادو اصرار وقالوا هذي دموع الفرح روحو توكلو على الله ومن هالكلام كفكفت دموعي توكلت على الله بشعوووور غريب ماعرفت اوصفه

جاني العقد ووقعته بوجود الجميع حولي وكلهم فرحانين خرجت من اللي انا فيه وعشت
معاهم شعور الخطبه بدون الزوج اللي ما ادري لحد الان وش من انسان
طبعا تجمعو المباركين والمهنين عدت الليله
واصبحت بذمة رجل لا اعرف عنه الا اسمه نمت ذيك الليله وانا خايفه من بكره
هذا اليوم اللي كنت انتظره هذي الفرح اللي كنت ابيها لا مستحيل برووود غير طبيعي
ثاني يوم جو اهله كلهم وانا نبضات قلبي تزيد وانفاسي تضيق
اقتربت ساعة اللقاء ولا ابو الشباب طلع ونادا اهله مطوع يبي ينام بدري
وانا ماشفته ولا شافني اطالع يمين اطالع يسار بامي وخواتي كيف ما اشوفه مستعجله والله
ابي اشوف هالانسان اللي ارتبطت فيه جمعت اختي قواها وقالت لاخته ليش مايبغون يشفون بعض
قالت اكيد لازم بس اطلع اشوف وش يقول راحو الله معهم وانحرق قلبي شوي ولا يتصل على اخوي ويرجع
اخذني اخوي اشوفه بالمجلس وانا ياناس ارجف من الخوف لحظه صعبه جدا
دخلت وانا ما اشوف قدامي وكانت المفاجئه …………………….

حسيت اني شفت قدامي وحش بلمحه وحده
شكل غير مقبول بالنسبه لي وغير مريح صدمت صعقت محد قالي
قمت وطلعت وانا اشوف الدنيا سودا قدامي ابكي واقول ليش محد قالي انه كذا
كلهم استغربو من كلامي والله شخص عادي مافيه شي
تأثرت شوي اخذ رقمي من اخوي عشان يتصل فيني اول مكالمه له يتصل ويقفل
استغربت ما اعرت الشي اهتمام كلمني اول طبعا ما حسيت بشي
الا اني زدت مراره صعبت علي نفسي التوافق صفر بيني وبينه
التعليم صفر مو ماخذ الابتدائي رغم اني قلت اخليه يكمل
الماده صفر رغم اني ماكنت اهتم فيها
الشكل صفر
المظهر صفر
كل شي فيه صفر صفر صفر
حاولت اتخطى كل شي وابدى معه واقول يكفي دينه وانه شخص يخاف الله
بديت اشجع نفسي واحاول اصنع منه رجل عظيم
قلت اشوفه مره ثانيه يمكن تتعدل الصوره قلت مو مشكله نضبط الهندام والمظهر يمكن يحلى بعيني
مر رمضان ولقيت انه شخص كل يوم والثاني يبي يجي عندنا لو على كيفه يسكن
صرت انحرج من اخواني جا العيد انتظر نسوي الخطوبه ولا لاحياة لمن تنادي
اول عيد يقول وياجل ثاني عيد ومن هالوعود انا استحيت من كثر الناس ماتسأل
طبعا طابت نفسي واستغربت منه مطوع ويماطل بس ماكنت متيقنه مره
كل ماكلمني يسولف بالدين وعذاب القبر ومن هالامور اللي المخيفه ومشيناها
بدت الناس تتكلم ليش وليش قلت عادي انا ما ابي بما انه مطوع خلاص ماتصلح وكذا
طبعا عندنا عاده لازم على الاقل يذبح عند اهله اذا مايبي يسوي خطوبه وهذي ماسواها
ياليت يقول ما ابي كل مره يتصل علي ويقول تجهزي الخميس الجاي قلت يمكن منحرج ما معه شي
ما ابي عادي ما يحتاج لا يصر مستحيل انتي مانتي ناقصه ابي اسويلك شبكه يعني اسوي
انحرجت من اهلي من كثر السؤال نفسي اعطيه انا بس استحيت منه
مرت الايام كل يوم اكتشف فيه صفه جديده
انسان ماعنده اي احساس يصر على الازعاج والاتصال علي باي وقت واذا مارديت
يستمر بالاتصال لين اكره كل شي بالمدرسه الصبح يزعج زميلاتي باتصاله على جوالي
صرت احطه صامت واقوله مايصير انا بالمدره واحيان يكون عندي حصص تكفى لا تلح بالاتصال
لاحياة لمن تنادي مايفهم اذا مرديت اتصل على امي على واحد من اخواني حتى لو كان الوقت مو مناسب سواء الصبح اخر الليل مايهمه حتى لو انا مستاذنه منه وقايله ابي انام
ولا ابي اروووح حتى لو كانت سوالف تافهه لين صغر حاله بعيني
صار يرسلي على حسابك وكول مي عشان اتصل عليه والله تصيبني مراره اذا شفته يسوي كذا
اتناقش معه واقوله مايصير ترسلي كذا هذا يهز صورتك قدامي انا ابك كبير وعندك عزة نفس
مافيه ضروره تستدعي يسوي كذا انا اتصل عليك اوكي
ابد مايهمه اقوله لا تكلم اهلي بدو يتذمرون منه ومن اسلوبه وانا ودي زوجي قدام اهلي شي كبير
بس مايستوعب
كل يوم والثاني ابي اجي فهمته ان اهلي مايحبون هالشي صار كل مكالمه يتهاوش معي عشان هالسالفه اقنعه ولا يفهم وياليت يعني لما نجلس نجلس لحالنا الا يكون فيه احد
مصر ما ادري ليش سوالفه مالقه يعيد ويزيد الفكر عنده صفر
المعلومات صفر لما اسولف عليه ولا ابي اسنعه واقنعه مايفهمني ابد يومين اقصاها حد وترجع حليمه لعادتها القديمه
يكثر الصفات اللي فيه نفرتني فيه
ما ابي اقول الا ابسطها
والحين وصلت حد ما اداني صوتها ولا طاريه وما ادري وش اسوي
هو متعلق فيني مرررره وانا ما اقدر اكمل معه ولاانا قادره اطيقه
والامرين صعبات علي لاني قادره اكمل الطريق معه ولاني قادره ارجع
ومحتاره بامري اخاف استمر اندم واخاف انفصل اندم
وصارلي شهر قاطعته عشان سالف مو كويسه سواها
ومستمره على الاستخاره وماطالع معي شي
اخلاقه مو اخلاق مطوووع رغم انه بسيط وماينخاف منه بالنسبه لي
الا اني ماني قادره اشوفه الرجل اللي يملى عيني
يمكن سردت كثير وما قدرت اوصل معاناتي صح بس كتبت كذا عشوائي
من دون تنقيح ولا تنميق

اعذروني على الاطاله
قولولي وش اسوي انفصل ولا استمر وش رايكم