عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
أول شي تراني متسلفه اليوزر من بنت خالي لاتستغربو أختلاف الردود والأفكار وكل شي 
ثالث شي سوري أنه أول موضوع أنزله هو موضوع غث وحومة كبد ومشاكل
بس تحملوني وأكسبو أجر 
لكن كل الناس اللي حولي كرهوني بالزواج والخلفه وكل شي
ببدأ لكم موضوعي من جذوره
أول شي أنا عمري 20 سنه
بنات أنا حلمي أكون أم ويصير عندي عيال من طفولتي
والله
يوم كنت بالإبتدائي وكانو يسألون البنات وش تبون تصيرون يوم تكبرون
اللي كانت تقول أبي أصير دكتوره واللي بصير أبله >> بوقتها الخيارات محدوده 😛
بس أنا كنت أقول أبي أصير أم وعندي أطفال ➡
المهم مرت السنين ويوم كان عمري 9 أو 8 توفت وحده من جماعتنا
وكانت متزوجه وكانت قصة حب زوجها لها مشهوره وكلن يدري أنه يموت عليها >> ركزو على هالنقطه
وبعد ماتوفت بشهر كب كل ملابسها وأغراضها بالزباله وتزوج مره ثانيه
وسوى عرس جلسو الناس يتكلمون فيه سنين من كثر ماهو مظبطه وصارف فيه >> لاحظو هذا وهو يموت عليها
وأنا من يومها تعقدت 😳
كرهت الرجال وحسيت ماعندهم وفا ولا أخلاق ولا مبادئ ولا أي شي زين
يعني معقول حب السنين وعشرة عشر سنوات تهون لهالدرجه؟
معقول هانت عليه يكب أغراضها بالزباله؟
😛
مرت السنين وصرت أكره الرجال أكثر وأكثر بسبب قصص أسمعها أو قصص أقراها بالنت
ويوم وصلت للثانوي صادقت بنت من عائله الله يعينهم على رجالهم
المره بعايلتهم متطهده تنضرب وتاكل تبن ولا تفتح فمها
ومن كثر ماأسمع قصص منها أنا هنا جد جد تعقدت
وقتها أبن أمه اللي يقولي أعرسي ولا حتى يقولي كلمة (رجال)
من جد كرهت الرجال وسيرتهم والله ماأطيق حتى كلمة رجال
وكنت أقول بالطقاق بيذلونا عشان نصير أمهات 😈
عاد يوم صرت 17 سنه يعني بالجامعه
زادت عندي عاطفة الأمومه وصرت بموت وأصير أم
خصوصا أنو كثير من صديقاتي كانو متزوجات ويوم أسمعهم يحكون عن أطفالهم كنت أموت على مايكون عندي طفل
ونوعا ما لان راسي وصرت أقول مو كل الرجال مالهم وفا ومايستاهلون
وبعدين قريت أيه بالقرأن
ماأبي أحرف فيها بس بالمعنى الطيبون للطيبات
وقلت بما أني بنت حلال أكيد ربي راح يرزقني أبن حلال مثلي
بعدها بفتره رجعت لي العقد أكثر وأقوى من أول 😉
لأني صرت أشوف بنات مره كويسين وبنات حلال ورجالهم زفت
وصرت أشوف بنات صاينين أزواجهم وأزواجهم يخونوهم
كرهت الرجال كرهتهم من قلب
أستغفر الله حتى أبوي معزته بقلبي قللت أستغفر الله سامحني ياربي 😉
بنات قد ماأنا خايفه أني أتزوج ويطلع زوجي خاين ومايستاهل قد ماأنا ودي أصير أم
خايفه أتزوج واحد ويبهدلني
لكن بنفس الوقت كل ماأشوف أم مع أطفالها أحن لهم بشكل كبير وأقول فنفسي متى ينقالي (أمي)
بنات نفسي تنحل هالعقده مني وش الحل؟
أنا لاحظت على نفسي بغض النظر عن سالفة الرجال والزواج
أنا أتأثر بكل كلمه تنقالي
يعني لو تقولين لي فلانه موب زينه كرهتها حتى لو أني معرفها
كيف أغير هالشي فيني
كيف أخلي نفسي ماأتأثر بكل شي أسمعه
بنات خايفه يصير عندي مرض نفسي والعمر يمر
والواحد يعيش مره ماأبي أعيش حياتي بعقد
أدري هذرتي واجده بس أبي أفضفض ماعندي أحد أفضفض له غيركم 😥
ساعدوني تكفون وشلون أغير هالصفه فيني 😐
أستودعكم الله
