بنتي .. ووضعها الغريب !!

بسم الله الرحمن الرحيم …..
لاحول ولا قوة الا بالله العلي العظيم ….
…………بدخل بالسالفه على طوووول …………….
واتمنى من كل وحده فيكم تعتبر هالبنت بنتها وتفكر لو للحظه وش بتسوي ولا وش بيكون الحل .. ولها مني ادعي الله ربي لايوريها ماوراني في بنتي والحمد لله على كل حال ..
بنتي عمرها 3 ونص اول بنت اللي قبلها اولاد ..المشكله بدأت بعد ماكملت تقريبا 2 ونص سنوات .. مادري وش اللي قلب حالها حتى شكلها تغير كأنها وحده ثانيه نحفت وسمرت ..ادري بتقولون هذا شي طبيعي بعد الفطام من الرضاعه الصناعيه .. حتى انا كنت اقول كذا بالاول ..بس انا فطمتها من عمر سنتين وشهرين ..وبعدها بـ 4 شهور بدت تدريجيا تتغير .. كل من شافها قال بنتك وش فيها ؟؟!! تعبانه ؟؟ بعد ماكانت قمر جميله بشكل يلفت النظر صارت كنها مريضه !!شاحبه لونها اصفر نحيله جدا ..
هذا كله ماهو مهم عندي ………..المشكله الاساسيه نفسيتها 😈 نصحى على صياحها وننام على صياحها …اي احد من اخوانها يلمسها ولايقولها ابسط شي تثور بشكل غير طبيعي !!غير كذا تفز من نومها تبكي بكاء هستيري متواصل ولا ترضى اقرب منها ولا احضنها كأنها خايفه من كل شي …وتروح بمكان بعيد وتجلس وهي تبكي وربي حالتها تقطع قلبي يوم اشوف وضعها …
اللي قريب مني من اهلي واهل زوجي يقولون عين باين عليها منقلب حالها …وبعضهم يقول راعه (خوف)وانا احترت فيها عسى ربي يلطف فيني وفيها ..وديناها شيخ بس قرى عليها مع مجموعة اطفال جماعي وكان عادي جدا ماتاثرت مرره .. بعدها قام زوجي يقول انتي لا توسوسين بهالاشياء تراها تاثر على الواحد !!كلمت شيخ بالجوال قال شكلها عين ولازم تنتبهين لها وترقينها ..الحين لي اكثر من اسبوع يارب لك الحمد احسها افضل خاصه بنوم الليل صايره ماتفز تصيح زي اول ..بس باقي نفسيتها طول اليوم متوتره تبكي كثير على اتفه شي ..وانا احس ما اتحمل اوقات اقوول دلع بنات واوقات احس انها مسكينه مو بيدها ويمكن فيها شي ..وربي اني احترت ولا ادري وش الحل .. خاصه اذا كان زوجي مو حاس بالوضع لان اغلب وقتها انا اللي ملازمتها مو هو ..شوووووووووووووووووووروا علي تكفوون لو بدعووه وربي حسيت بضيق وقلت اكتب مشكلتي هني وان شاء الله البنات مايقصرون ..وجزاكم الله الف خير حتى لو دعيتولها بصدوركم.. والله يعيننا عليهم ولا يضيع لنا تعب يارب . 😛