بنت النيل :( .. للمرة الثالثة راح يعلموا لي خياطة في اول ولادة

السلام عليكم ورحمة الله وبركاته ..
اهلا بنت النيل ..

و ها انا رجعت بعد الولادة لاستشارتج ..
انا الحمد لله ولدت طبيعي يوم 25/3 .. يعني مرت على ولادتي 12 يوم ..
لكن في يوم 26/3 جت الدكتورة تكشف علي و قالت الخياطة متفتحة عندج و خذتني و خيطت مرة ثانية .. و قالت مستحيل الخياطة تنفتح هالمرة لاني عقدة الغرزة خمس مرات و احنا بالعادة نعقدها 3 مرات .. و سالت ليش انفتحت لاني كنت محاسبة و متاكدة كل التاكيد اني ما بذلت اي مجهود .. قومتي و مشيي كان كله بمساعدة الوالدة و زوجي .. فقالت الدكتورة ما عندي علم ليش انفتحت .. و سالتها شو استخدم عشان الخياطة قالت لي و لا شي قلت لها سائل البيتادين .. قالت و لا شي لا بيتادين و لا غيره اذا لزم استخدمي صابون جونسون للاطفال .. قلت لها ما راح تعطيني مطهر او غيره قالت لي بس استخدمي الماي ..

المهم رجعت البيت و انا ابي استخدم البيتادين لانج قلتي في دورة ما بعد الولادة ,,, انه عادي استخدم البيتادين من غير اذن الدكتورة بس خفت لان الدكتورة قالت انا مسويين لي خياطتين وحدة خارجية و الثانية داخلية ..
لكن من ايام صرت ما قادرة امشي .. و حاسة بثقل تحتي.. و حرقان .. و امس رحت عيادة خاصة و هناك اكتشفت المفاجأة 🙁 .. قالتلي الدكتورة انه الخياطة مفتوحة بالكامل من فترة و مسوية التهابات .. و قالت السبب مو فيني او من الجلسة او المشية .. السبب انه الدكتورة خياطتها لي كانت غلط .. فسحبت الخيوط و وصفت لي اربع انواع من الادوية و مرهم و سائل البيتادين طبعا .. و خلت الخياطة مفتوحة .. و راح اروح يوم الخميس يعني بكرة عشان تخيط لي مرة ثانية .. و هي قالت يمكن الالتهابات واصلة للرحم 🙁 .., بس انشاء الله الادوية راح تشيل الالتهابات .. و هي قالت الادوية مفعولها قوي لان الالتهابات اللي صايرة حادة 🙁

فسؤالي هل ممكن تتفتح الخياطة بهذي السهولة ؟؟؟ وين الغلط بالضبط ؟؟
كيف تكون الجلسة في حالة الخياطة؟؟ و بشو تنصحيني عشان يطيح الخيط بسرعة هالمرة و تبرى الخياطة بسرعة ؟؟

ادري اني طولت عليج وايد يا اختي .. بس هذي حالتي و اتمنى تساعديني .. و جزاج الله خير ..

تحياتي
عصفورة الشرق