عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمه الله وبركاته
حياكم الله منورين الموضوع ….. 😈
ندخل طوالي بالموضوع ….
اذا كنت ممن يعانون من العراكيب او الخشونه في الرجلين ( تسنها رجول ناقه ههه) او اليدين المشققه والاظافر المتكسره ( تسنها جلده ضب) فأبشري بسعدك وانا اختك …
كريم جلسوليد معه عصير ليمون خلطه معروفه ولا يبيلها تعب …لكن السر يكمن في التالي
بعد ما تغسلين رجولك زين وتفركينها ويدينك بعد
رطخي رجولك ويدينك بالكريم ورهي الكميه خصوصا بالرجول
همن البسي قلفزات حقت ابو استعمال واحد هذيك الرهيفه ما غيرها والبسي فوقها قلفزات قماش ( صوف قطن ) الي تبين
الرجول البسي اكياس النايلون الي نعبي فيها اللحم ونفرزه والبسي فوقه شراب .خلاص
ونومي فيها ولما تقومين من النوم شوفي يدينتس ورجولتس وش صارت تهبل ايش نعومه ايش بياض وطراوه لا ومع الاستمرار تصير اليدين والرجول شئ
انا عني اسويها لما يكون عندي مناسبه في ذاك اليوم وبكل ثقه البس صندل واحط رجل على رجل وارز رجلي واهزها بعد خخخخخخ بصراحه ما انلام تكون كانها زبده ما شاء الله
تنبييييييييييه
يا اخوات كتبت لكم هالموضوع من حبي لكم فارجوا منكم استعمالها فيما يرضي الله بمعني الا تسوي هذه الوصفه وتطلع للسوق لان يدينها بتصير جذابه …..وطبعا انتم اكيد احرص مني فهذا الشئ بس حبيت ابري ذمتي 🙂
والسموحه على الاطاله
دعواتكم الله يجزاكم خير ان الله يحقق لي اللي بالي ….هذا الي ابيه منكم بس ➡
