تجربتي الشخصيه في عمليه تصحيح النظر .. اجابه على كل تساؤلاتكم بأذن الله

اليوم وانا ارتب اغراضي شفت كيس فيلو اغراض تبع عمليه تصحيح النظر الي سويتها السنه الي فاتت.. وجا على بالي اني انزل موضوع خصوصا انو مر سنه على العمليه وكتير بنات يبغو يعرفو التأثير بعد فتره

.
.
.
كنت بنزل صور وحركات لكن صراحه النت بطيء وحنزل المفيد من الموضوع كلو

شهر 8 هجري الصيف الي فات قررت اسوي عمليه ليزك او ليزر زي ما يسموها البعض و بدأت رحلتي بالبحث عن دكتور مناسب

دخلت ودورت بالنت وكل وحده تمدح بواحد .. استقر رأيي على اني اسويه بالمغربي بجدة مع كثر الناس الي يسبوه دقيت عليهم وطلبت دكتور معين وكانو مرررررره مادحينو البنات رد عليا الموظف انو مسافر يجي بعد كم يوم وحتى لو جا استحاله يسويلي العمليه لازم اول شي يكشف عليا بعدين يحدد موعد العمليه

المشكله الكبرى اني مو من جدة .. انا صحيح من اهل جدة لكن نقلت ينبع الصناعيه مقر الشغل و لما اروح هناك لازم انزل عشان الدوام فوقتي جدا جدا جدا ضيق ❗

اصريت اني اسوي بالمغربي قلت العين غاليه مع انو كتير قالو انو اسعارهم اغلى من الاماكن التانيه ومدحولي دكتور بالمدينه

المهم فقدت الامل اني اقدر اسوي بالمغربي لانو قالو الدكتور دا عندو حجوزات يسوي عمليات تانيه غير الليزك

و لقيت وحده منزله موضوع تمدح عياده البطل و قالو انو اساسا كان يشتغل بالمغربي وما ادري عن صحه دي المعلومه .. قالتلي صحبتي انو ممتاز جدا وانو قريبها سوا فيلو

اتوكلت على الله ولا انا ما ادري اساسا عياده البطل فين حتى .. دخلت موقعهم الرسمي :
ظ…ط±ظƒط² ط§ظ„ط¨ط·ظ„ ظ„ط·ط¨ ظˆ ط¬ط±ط§ط­ط© ط§ظ„ط¹ظٹظˆظ†

اخدت رقمهم ودقيت وحجزت موعد اروح فيلو و نزلت انا واخويا الي كان على وجه زواج وقتها
اعمارنا انا 22 وهوا 25

المهم .. دخلنا مجمع طبي اسمو برج النخيل الطبي على طريق المدينه وطلعنا الدور التاني مدري التالت مو متأكده صراحه بس مكتوب جنب المصعد الادوار ..

استقبلتنا الموظفه وفتحت لنا الملف انا واخويا ببلاش لأني حسوي عمليه

دخلنا وجلسنا وعلطول نادتنا وحده سعوديه و كشفت علينا انا واخويا اول شي النظر بعدين دخلنا غرفه فيها جهاز كبير وطلبت انو ما نغمض ابدا وقت الكشف .. الخ كشوفات سهله وبسيطه

بعدين بعد ما خلصت ودخت ملفاتنا لدكتور محمد حنتيره الي هوا نفسو الدكتور الي حيعملنا العمليه

جلسنا بالانتظار شويه لانو كان قاعد يسوي عمليه وبعدها نادانا .. مدري ليش كنت قلقااانه مره من الدكتور دا لأني شويه ليا مواقف باايخه مع الدكاتره المصاريه .. بدون ما احد يزعل سوري

دخلنا عالدكتور وكان مبسوووط ما كأنو طالع من عمليه ماشالله عليه الابتسامه ما تفارق وجهو و يسأل عن احوالنا وليش بنسوي العمليه و تبغو حلاوه ومنجد ماشاءالله اخلاق ما عمري شفت دكتور مريح بدي الطريقه والحمد لله انو المغربي ما ادوني وجه عشان نعرف دكتور محمد حنتيره خخخخخ

المهم بعدها كشف علينا تاني كشف عادي

بعدها شاف احوالنا وايش العمليه الي تنفع لنا ولأنو انا ناقصه 3 واخويا واحد ونص قال ما يحتاج العمليات الصعبه تقدرو تختارو بين الليزك واللازك
ودحين اقولكم الفرق بينهم

الليزك:
يتم فيها قطع طبقات القرنيه بالمشرط الجراحي ورفعها .. بسيطه جدا وانتي مخدره
للمقاسات: المتوسط و ممكن البسيطه
درجه امان العمليه: 98 بالميه
نسبه حدوث مضاعفات: 1 بالميه
الجفاف بعد العمليه: متوسط الى شديد (( يمتد الى 9 شهور))
جوده الرؤيه بعد العمليه مباشره:جيد جدا
مدة اجراء العملية:6 دقائق للعين
تحسن اسرع للرؤيه
الم بسيط
امان عالي

اللازك : (( انا سويتو ))
مافيها مشرط جراحي ولا فيها قطع (( جديد دا الشي ))
للمقاسات: الصغيره انا ناقصه 3 .. طبعا هما حاطين دا صغير لانو في ناس يجوهم مساكين شويه و فقدو بصرهم
درجه امان العمليه: 98 بالميه
نسبه حدوث مضاعفات: 1 بالميه
الجفاف بعد العمليه: بسيط (( يمتد الى شهرين))
جوده الرؤيه بعد العمليه مباشره:جيد جدا
مدة اجراء العملية:6 دقائق للعين (( انا جربتو اقللل من كدا بكتير وقت تسليط الليزر ما ياخد الا 20 ثانيه و الباقي كلو تحضير وتنضيف ))
تحسن ابطأ للرؤيه
الم متوسط
امان عالي جدا

مكتوب هنا كمان جدول بسيط :
ط§ظ„ظپط±ظ‚ ط¨ظٹظ† ط§ظ„ط§ط²ظƒ ظˆ ط§ظ„ظ„ظٹط²ظƒ

ودا الدكتور الي سويت عندو :
ط§ظ„ط¯ظƒطھظˆط± / ظ…ط­ظ…ط¯ ظ…طµط·ظپظ‰ ط­ظ†طھظٹط±ظ‡

المهم لما جيت قلتلو ايش اختار !! الليزك المو بسيط وقت العمليه و بعد العمليه خفيف اما اللازك العكس وقت العمليه مافي وبعدو في الم .. قلي شوفي يا بنتي انا لو بنتي بتسوي عمليه كنت قلتلها تسوي اللازك .. احنا قاعدين نحاول قد ما نقدر نقلل من المشارط الجراحيه مع انو مافي خطر لكن برضو مشرط جراحي سوي بدون مشرط احسلك .. قلتلو توكلنا على الله طيب بسوي دحين !!

قاعد يضحك يقولي ليش مستعجله ما نقدر دحين << اتحطمت
قلي لازم ما تلبسي نضاره لمده يوم كامل قبل العمليه
و لازم اديكي قطره تحطيها قبل العمليه بيوم تنضف عينك
خلاص اديكي موعد بعد يومين

وشي مهم جدا نسيت اقولو لكم كمان العدسات ما تلبسيها قبل العمليه باسبوعين تقريبا .. تقعدي عالنضارات

وشرحلي كل شي بالصوره والاوراق واداني ملفات فيها كل شي عن العمليه وبالصور ووراني ايش ممنوع وايش اسوي بعد العمليه وكل كل شي واداني سي دي فيلو العمليه مصوره

اخدت اجازه من الدوام وجلست بجده وسويت الي قال عليه ما لبست نضاره وحطيت القطره قبلها ب24 ساعه

وجا الموعد ورحت للعياده وانا خاايفه رعب رعب خخ

وقعدت استنى استنى تأخرو صراحه عليا شويه طلع في كان عمليه مستعجله ما يقدرو يأجلوها عشان كدا استنيت قرابه ساعه انا خلقه كنت متوتره بعدين جا الدكتور محمد واعتذرلي جدا وقلي انو العمليه ابدا ماكان يقدر يأجلها ولا كان سار شي للمريض ..

وكان معايا مرافق بنت خالي دخلها غرفتو وشغلها كمبيوتر قلها تقدري تشوفي العمليه لااايف من هنا هههههههههه ونااسه عاد انبسطت وطلعت الجوال وصورت العمليه كلها .. وما قال تسرقني ولا قال ي سايبها بغرفتو الخاصه طول وقت العمليه ..

دخلوني غرفه التحضير و جات ممرضه فلبينيه عسل عسل و قاعده تساعدني لبستني القبعه دي حقت العمليات و الروب و دخلت والدكتور ما دخل الين انسدح ولحفوني بس باين راسي والممرضه ماسكه يدي وراحت جابتلي دبدوب ههههههههههه والله ياحسيتها حزنت عليا تقولي ادا عورك جري على يدي وعالدبدوب

دخل ومااااااااااات ضحك على شكلي بالدبدوب قلي الدبدوب دا حامي الحمى حق المريضات كلهم 😥

المهم انا خايفه من اول يوم دخلت وانا مفجوعه قام يهديني يقولي بسيييطه ولا تتسمى عمليه دي لعب عيال ومدري ايش

وبعدها قرب السرير عند جهاز كبير ..
قرب جهاز كدا عند عيوني دا الشي يفتح عيوني ما يخليني اسكرها ودخلها بعيني تمسك عيني من فوق ومن تحت
بعدها قال بسم الله وحطلي قطره بعيني المخدره
بعدها شويه شويه اشوف الدنيا ضباب وبعدها شغل الجهاز وقلي عدي معايا من عشرين واشوف الدنيا لون بيج و نقطه حمرا يقولي طالعي بالنقطه الحمرا طالعي بالنقطه الحمرا وانا شامه ريحه كدا غريبه دي ريحه الليزر
صراحه ابدا ابدا ما المني .. بعدها حط مويه بااارده بعيني و مسحها ولبسني عدسات شفافه تحمي القرنيه .. عدسه عاديه
وسوا العين التانيه لما خلص قلي ارتاحي شويه غمضت عيني شويه كنت ادمع
بعدها فتح اللمبه وقلي قومي
طالعي بالساعه الساعه كم
كان 9 وعشره
خلااااص من كتر مني فرحانه اببكي والله كان حلم اني اشوف كل شي بدون نضاره
قلتلو 9
قال لا دا لازم نعملك عمليه تانيه ههههههه 9 بس !!
قلتلو 9 وعشره
قال مبروك عليكي وفرحانين كل الممرضاات والله يا حسيييت اني ولدت مو سويت عمليه بسيطه كدا خخخخخخخخ

بعدها رحت الغرفه ولبسني قمع على عيني قلي لاتنزلي القمع اليوم لما تنامي عشان لا تحكي عينك
وقلي اجي مراجعه بعد 4 ايام عشان ينزلي العدسه المؤقته دي

واداني المحضورات :
ممنووووووووع منعاا بااتااا المس عيني ابدا ابدا ابدا
وادا نمت احط القمع عشان ما افرك عيني وانا نايمه
المكياج ما احطو اسبوعين (( مكياج عيون طبعا ))
العدسات ما احطها شهر
النضارات الشمسيه لازم البسها شهرين
ممنوع كل شي ينتشر زي البخور و الدخان الخ والعطور المركزه ممكن بس في اليوم التاني من العمليه
ولاشي يدخل عيني زي المويه والحاجات دي الين اخلص الاربعه ايام وانزل العدسه المؤقته دي
ممنوع اقرب من اي مصدر حراره 3 ايام
ممنوع اسبح اسبوع
وسواقه السياره بعد التلاته ايام لانو اساسا حتالمو عينو طول التلاته ايام دي ولا حيتقبل النور ابدا
كل الحاجات الباقيه مسموح زي الصلاه و اتفرج تلفزيون وجوال و اشيل التقيل الخ الخ الخ الي قالو الناس انو ممنوع
واداني حبوب و قطرات احطها بدي الايام

نزلت من العياده ماافي الم .. شويه ويبدا الالم خخخخ
قعدت 3 ايام الللم خاصتا اول يوم بس انام واقوم اخد الدوا واكل وقاعده بغرفه مضلمه النور يعورني بعيني عموما هوا الم عادي يقدر الواحد يستحملو بس النور ابدااا ما اقدر استحملو .. مني قادره اقرا شي بالجوال بما اني مدمنه بيبي خخخ

بعد العمليه ب 3 ايام رحت للدكتور ونزل العدسه ( بيدو فقط بدون جهاز ) وخلاص احس الالم راح شكلو من العدسه دي التطفيش

بعدها قلي استمر عالقطرات لانو قطره معقمه وقطره مرطبه

وطلب مني اجي مراجعه بعدها بشهر ونص يتطمن عليا .. رحت بعدها بشهر ونص وفرررح الدكتور يقولي نضرك كامل توقعت انو يكون ناقص نص او شي لانو النظر ما يرجع تماما تماما لازم شويه ينقص ومبروك عليكي.. ماشاءالله ..وطلعت وكتبتلو بسجل الزوار رساله ومنجد ما حنسى الدكتور محمد حنتيره العسل دا طول حياتي

والله ولا اعرفو ولا عمري سمعت عنو بس سمعت عن عياده دكتور البطل وبعدها دورت بالنت لقيت كتير كتير يمدحوه الله يرزقو ويوفقو زي ما كان يتصرف باخلاق عاليه وقت زيارتنا

طبعا نسيت اقولكم اهم شي السعر .. 9000 تقريبا على ما افتكر او 9300 ريال
دا ( اللازك )
وطبعا دا المبلغ الوحيد الي دفعتو .. مافي كشوفات ولاشي بس القطره الي قبل العمليه انا اشتريتها بس رخيصه ..

باقي انواع العمليات مالي علم بسعرها لكن يستاااهلو كل قرش دفعتو فيهم ودحين بعد سنه اقولكم الي قاعد عالنضارات مسكين والله عشت حياتي من بعد دي العمليه واحمد الله اني سويتها اقوم من النوم افتح عيني اشوف كل شي بدل ما امد يدي ادور النضاره وعاد لو كنت مضيعتها حوووووووسه
وما انسى يوميا لما كنت البس العدسات وانا رايحه الدوام يالله هم وانزاااح