تجربتي الشخصيه مع إزلة شعر الجسم بالليزر )

وعدتكم أكتب لكم تجربتي الشخصيه مع إزالة الشعر بالليزر
عشان يستفيدوا منها كل البنات ..

أول شي راح أبدأ معاكم متى قررت أغامر وأعمل لليزر بالرغم من إني
كنت متخوفه من هالتجربه ..
لأني إطلعت على آراء كثير من بنات جده بالذات
إللي تقول حرق بشرتي وإللي تقول طلع لي حبوب وشوه بشرتي لي 5 سنوات أعالج فيها
وإللي تقول سويت وما إستفدت شي … إلخ

أنا أعاني من كثافة الشعر بجسمي .. طبعاً عشان أعرف السبب
لجأت أول شي لطبيبة نساء .. شرحت لها الموضوع لأني كنت عارفه إن أي شي يظهر برا الجسم
أكيد فيه خلل بالداخل .. وهذا إللي المفروض كل واحده منا تسويه
رحت وعملت لي تحاليل للهرمونات .. وطلع سبب كثافة الشعر
زياده في نسبة هرمون الذكوره
وقالت لي الدكتوره عندك حلين

1_ على المدى القريب ( لازم تعملي ليزر )
2_ وعلى المدى البعيد ( أستخدم حبوب منع الحمل لمدة شهور عشان أعادل الهرمون)

طبعاً إستبعدت الحل الثاني لأني مستحيل أستخدم حبوب وأنا لسى بنوته بالرغم من إنها قالت
مافيه منها أي ضرر ولا راح تأثر عليه في المستقبل بالنسبه للإنجاب

أقنعتني بأسلوبها وإستخدمتها شهر واحد وتركتها بصراحه مره خفت
ولاحظت خلال هذاك الشهر إللي إستخدمت فيه الحبوب تأخر في نمو الشعر

طبعاً الليزر ماكان في بالي بالذات بعد ما قرأت زي ما قلت لكم آراء البنات في كذا موقع على النت

//

قررت إني أستخدم أعشاب طبيعيه لمعادلة الهرمون عشان يتعدل عندي نمو الشعر أو يخف
والله يا بنات ما خليت لا مستحضرات طبيعه ولا خلطات ولا أعشاب طبيعيه ما إستخدمتها
لكن ما فيه فايده .. أحيان أحس نمو الشعر يتأخر بس يرجع ينبت بكثافه
قلت في نفسي وأنا بنت عند أهلي وما عندي لا شغله ولا مشغله وكل شوي أشيل هم
شيل الشعر بالحلاوه والجهاز فكيف لما أتزوج وأصير مسؤوله عن زوج وبيت ….؟؟

فقلت عملتي كل الجسم قالت عملت كل الجسم وريحت راسي
قلت حتى وجهم قالت حتى الوجه .. وما شا الله عليها مافي وجهها أي أثر
وجهها زي الزبده ما شا الله تبارك الرحمن
إستغليت الفرصه وسألتها .. وين عملتي

قالت عملت عند الدكتوره (فاطمه هلال _ في مستشفى العدواني )

عملت عندها وجهي
أما جسمها تقول عملته في ( عيادات الموج لليزر أو أمواج والله ماني فاكره بالضبط)
بس تقول فرق بين ليزر الدكتوره فاطمه وبين ليزر جده
تقول فاطمه جلسه واحده للوجه وخلاص زي ما إنتي شايفه ما إحتجت أي جلسه ثانيه
أما في جده سويت جلستين خف الشعر كثير بس ما إختفى نهائياً

،’
أنا تحمست وعلى طول آخذ من عندها رقم الدكتوره فاطمه
واليوم الثاني أتصل عليها وآخذ منها موعد .. وطلبت مني ما أشيل أي منظقه لازم تشوف كثافة الشعر

وفعلاً عصر يوم الأربعاء الأسبوع الماضي رحت لها
وبدأت المعاينه .. وقالت يا الله نبدأ معاك ألآن
وقبل ما نبدأء قالت إنتي عارفه إن ليزر الجسم كامل ( 5 آلاف ريال )
بس الفتره هذي مسوين تخفيض .. ونزلت لي 500
وقلت لها طيب ماراح أسوي الظهر لأنه زغب خفيف وما يحتاج أشيله قالت خلاص أنزل لك 500 ثانيه
ورسينا على 4 آلاف ريال

وقالت إن فيه عيادات في جده تعمل الجلسه الواحده بـ ألفين ريال للجسم كامل
بس في الحقيقه هم ما يستخدمون الليزر .. يستخدمون جهاز إسمه الضوء وهذا يسبب حروق وتشوهات في البشره

وبدأت ..
أول ما حطت الليزر على أصبعي الإبهام .. تعرفون المنطقه إللي في الأصابع يجي فيها شعيرات بسيطه
بغيت أطير من مكاني .. وربي من زود الحراره تحركت رجلي على فوق بغيت أكسر خشمها
مرررررره يحرق
بس قلت في نفسي يا بنت .. حرارة ساعه وإرتاحي العمر كله

قلت يا الله سمي وكملي
وبسم الله وشوي شوي والله يحرق بالذات لما تمر على منطقه ما حلقت الشعر منها
زين .. أحس روحي بتطلع .. خلصت وعلى طول مسحت لي سيقاني
بـ كريم ( إيلكوم )مضاد الحساسيه لأن حرارة الليزر تسبب تهيج وإلتهاب في البشره
يوم يومين ويروح

بالنسبه للسيقان لي اليوم أسبوع كامل من يوم شلتها أشوف فيه شعر قاعد يطلع
بس بمجرد ما أسحب الشعره على طول تطلع من غير أي ألم
قلت شكله الشعر إللي كان بين البصيله والجلد لما حلقت الشعر

والبصيله محروقه خلاص

اليوم إللي بعده جيتها .. وكملنا نفس الشي الأرداف والبطن
والأيدي والذراعين والأبطين .. والحمد لله كل شي تمام
الحمد لله رب العالمين صفاء ونعومه

الأبطين كمان بدأت أحس الشعر صغير بيطلع وأسحب فيه عادي وينسحب بدون أي ألم
بس فيه كلمه قالتها الدكتوره .. تقول المناطق إللي فيها شعر كثيف
لازم جلستين .. عشان يختفي نهائياً ..

منطقة البطن .. منطقه مره رقيقه بعد الليزر طلع لي فيها حساسيه وحكه ومررررررره حمرا
بس قاعده تخف تدريجياً مع إستخدام كريم إيلكوم

باقي الوجه .. كنت مقرره أعمله يوم الإثنين قبل يومين ..
بس لما شفت بطني والحساسيه إللي طلعت فيه
قلت راح أأجله إلى يوم السبت إن شا الله .. لأن بكره الخميس عندنا ( زواج )
وأخاف ما أقدر أحضره لو يحمر وجهي أو يتحسس

المهم فيه قياسات لقوة الليزر ..
من 11 إلى 14
المناطق إللي فيها شعر كثيف .. تستخدم قوه 14
وإللي شعر خفيف أو زغب .. قوة 11
وكمان المنطقه إللي في أعلى الفخذ من الداخل المنطقه الرقيقه
هذي تستخدم فيها قوه 11
.. لكن هالمنطقه عملتها لي الممرضه وشوي أحرقتني