تجربتي مع برستيج لتنسيق

بعد السلام انا بذكر لكم قصتي مع برستيج وانتو يابنات المنتدى قرروا هل معي حق يوم كتبت هالموضوع ولالا

انا ياطويلات العمل اتفقت مع برستيج انها تسوي لي نافوره الشوكولاته مع الفواكه بمبلغ وقدره 500 ريال

ونظرا لضيق الوقت قالت لي انا استلم المبلغ كله قبل يوم الحفل بس عشان مافي وقت باخذ المبلغ كله يوم الزواج ،،

وجاء يوم الزواج ( بأيام عيد الفطر ) وجات اختنا في الله وحطت اغراضها على الطاوله ورتبت شغلها وحطت الشوكولاته بالجهاز وعلمت شغالتي كيف تشغل الجهاز
ولان انا العروس ولا عندي احد اعتمد عليه وفلوسها كانت معي كانت تدق علي وانا عند الكوافيره وكنت اقولها لما اجي القاعه اعطيك فلوسك وبيننا اتصالات على هالموضوع على اساس تنتظرني لين اجي واعطيها فلوسها ،،،

المهم اكتشفت انها اشغلت ام المعازيم مابقى احد ماقالت له انها تطلبني فلوس صارت تمشي وتقول ابي فلوسي ( والمشكله انها مكلمتني وقلت لها يامسلمه فلوسك معي ) بس لا حياه لمن تنادي

المهم وانا عند الكوافيره اضطريت اكلم الوالد الله يخليه لي عشان يروح للصراف ويصرف فلوس لهالأدميه وراح الله يخليه لي وجاب لها الفلوس وعطوها فلوسها ،،، وراحت حتى ماشيكت على نافورتها هي تشتغل ولا لا

بعد ماراحت حاولت الشغاله تشغل الجهاز وهو فيه زرين واحد تسخين وواحد عشان النافوره تشتغل

زر التسخين شغال بس الزر الثاني اللي تخلي النافوره تدور ماشتغل ،، دقت علي شغالتي وقالت لي وكلمت برستيج لكن للأسف ماصارت ترد على اتصالاتي ولاني ماني فاضيه ابد وعند الكوافيره

اعطيت رقمها للمصريه المسؤوله في القاعه ولشغالتي عشان يدقون عليها ولا حياه لمن تنادي ولا ردت الا بعد فتره وتقول ماقدر اجي !!!!!!!!!!!!!

شلون ماتقدر تجي وهي مستلمه فلوسها !! تخيلو يابنات دافعه حق نافوره شوكولاته والنافوره ماتشتغل !!!!!!!!

متصورين الاحراج اللي انا فيه ولا راعت ولا قدرت هالادميه كل اللي همها فلوسها تاخذها وبس

حتى الفواكه اللي سوتها كان المفروض تكون قارب (جح) وفيه اعواد فواكهه (على اتفاقنا ) لكن كلمتني العصر وقالت مالقيت بسويه على بطيخ ( شمام )

وتفاجأت يوم جيت للقاعه ان الفواكه ذابله ومقطعتها صغار مو زي ماهي حاطتها بالصوره

المهم المسؤوله المصريه جزاها الله خير نشبت لها بالتلفون ومادريت الا وهي جايه بالتلفون مع شغالتي وانا بالكوشه تخيلو !! وتقول لي كلميها وانا اكلمها وهي تقول انا اسفه ومدري شنو وتقول كلام معناه انها بترجع لي فلوسي لما تاخذ الاغراض مع حساب البساكيت والكوكيز اللي بالفازات ،،،

وكانت بالتلفون انسانه بمنتهى الذمه والاخلاق ووصيت شغالتي وقلت لها بتكلمك الحرمه عشان تاخذ الاغراض حقتها النافوره والفازات وتعطيك فلوسي وكمان وصيت صديقتي انها تدق عليها بخصوص هالموضوع

لاني سافرت شهر عسل باليوم اللي بعد الزواج

بعد مارجعت من السفر تفاجأت ان الاغراض مازالت موجوده والحرمه لا اتصلت ولا شي وحتى صديقتي يوم اتصلت عليها اثناء سفري قالت لها الاخت برستيج ( انا مسافره ماني بالمنطقه ) واتصلت عليها انا بعد 3 اسابيع من زواجي بعد مارجعت وقالت لي نفس الكلام ( انا ماني بالمنطقه ) طيب المسافر يوصي احد يرسل سواق يسوي اي شي مو يطنش

بعدها بفتره كمان اتصلت وقالت نفس الكلام انا مسافره ،، انا ماخذت واعطيت معها بالكلام ،،

لان اللي مهتم ويهتم بسمعته يكون عنده ذره اهتمام

تخيلو يابنات وش اكتشفت بعد ،، اكتشفت ان السبب اللي خلا الجهاز مايشتغل يوم الزواج هو الاهمال

اي الاهمال وعدم تنظيف الجهاز زين ،، مسكت الجهاز وفصفصته زين ابي اعرف ليش ماشتغل طلع فيه شوكولاته يابسه حوالين الحديد اللي يدور واضح ان الاخت ماكانت تهتم بنظافه الجهاز ،،

تخيلو يابنات دافعه شغل كامل حق وحده :
– شغلها مو ذاك الزود
– فشلتني عند المعازيم بس تمشي وتطلب فلوسها مع انها هي اللي قالت اخذه منك يوم الزواج
– جهازها ماشتغل واحرجتني
– جهازها مو نظيف

والله يابنات ماهمتني الفلوس كلها 500 ريال ، بس اللي قاهرني التعامل

والله لو انها مهتمه وكلمتني عشان تاخذ جهازها واغراضها كنت بقولها عادي قضاء وقدر وروحي الله يستر عليك ، وانا قلته لها بالتلفون واهلي عارضوني قالو لااااااااااا ترجع فلوسك وقلت لها بالتلفون بيننا اتصال ،،. لكنها احرجتني قدام اهلي يقولون لي شفتي فشلتك يوم الزواج وطنشت ولا أخذت اغراضها اللي الى الآن وانا شايلتهم عندي ومضيقه علي ،،.

انا كتبت الموضوع عشان اي وحده تفكر تسوي بزنس اول شي تفكر فيه سمعتها واحترامها لزبائنها
مو بس اخذ فلوس ،،

وربي يعلم اني مو راضيه عنها ومقهوره منها ،، لانها غير انها فشلتني ودفعتني قيمة شغل ماستفدت منه ، الا انها ماعبرتني ولا عبرت اتصالاتي لها ، اخر اتصال اتصلته بها كان من فتره وانا قررت انتظر اشوف تهتم وتتصل علي ولا لا لكن بما اني ماشفت منها اي بادره سوى التطنييييييش قررت اكتب مشكلتي للمنتدى ،،،

انا ما ودي اقطع رزقها بالعكس انا كتبته عشان اي وحده تتفق معها تاخذ حذرها ،،

سواء معها ولا مع غيرها لا تستلمون شغلكم الا وانتم متأكدين من كل شي

واتمنى تكون عندها الشجاعه وترد على الموضوع واشوف وجهه نظرها من الموضوع

خصوصا اني اشوف ردودها بالمنتدى ولها معرفين ( برستيج لتنسيق ) و ( مس كيك )