عالم البنات النسائي كل ما يخص المرأة العربية من ازياء وجمال والحياة الزوجية والمطبخ
اليوم حابه احكي لكم عن تجربتي بولادتي البكرية بمستشفى أحمد أبانمي بالرياض واللي حولوني عليه مستشفى قوى الامن
اول يوم رحت فيه للمستشفى كشفوا علي وقالوا لي الرحم مفتوح 2 ونص ودخلوني غرفة الولاده
وركبوا لي جهاز النبض وحطوا لي طلق صناعي من الساعه 11 الى الساعه 1 ونص الظهر وبعدين طلعوني قالوا لي مافي استجابه للطلق وخلوني عندهم الى ثاني يوم وبعدين طلعوني
بعدها بيوم رجعت رحت نزل معي كتله افرازات وخفت ونفس الشي دخلوني غرفة الولاده ساعتين وبعدين طلعوني
وبعدها بيومين كان اليوم الموعود ونزل معاي شوي دم ورحت لهم شكلهم طفشوا من خشتي
دخلوني غرفة الولاده الساعه 9 الصباح وركبوا لي طلق صناعي من غير مايعلموني والرحم مفتوح عندي 2 ونص نفس الشي
وكل شوي يسوون لي فحص الله لايوفقهم كل ماجات وحده تقول لي فحص يمكن 3 مرات
الساعه 1 الظهر قالت لي فحص وهي تفحص فتحت لي المويه طبعا انا زي الهبله مايتكلمون ولا يقولون لي بنسوي شي ماحسيت الا بشي حار ينزل
وكل ماسووا لي فحص يزيد علي الالم
طبعا المجموعه اللي كانت مستلمتني كلهم فلبينيات حتى الدكتورة وانفسهم شينه
وطلبت من الدكتوره ابرة الظهر وقامت تستلعن علي صارت تقول لي مافي دكتور تخدير قلت لها كيف مستشفى مافيه دكتور تخدير اطلبي لي مدير المستشفى قالت في دكتور بس عنده عمليات مو فاضي بعدين قالت لي زوجك مو راضي يوقع عالابره وطلع زوجي موقعها من الظهر ولما قلت اطلبو زوجي قالت لي خلاص استني بيجي الدكتور الحين
وطبعا كل شوي يسوون لي فحص اكثر من 10 مرات وبكل مره يفحصون يزيد الوجع علي لما اخذت الابره ارتحت الحمد لله ولما جات الساعه 5 قالو فتح الرحم 10 سم ويقولون دفي طبعا ماقدرت اساعدهم لاني مخدره من الابره ومن كثر مايسوون الفحص راح مفعول البنج ورجع لي الالم
وخلوني وطلعو ورجعوا عالساعه 7 ونص يقولون معك نص ساعه اذا ما طلع البيبي بندخل عمليات
😆 🙂
بعد هالمرمطه واللعب اللي لعبوه فيني بيسوون عمليه طبعا جات الاستشاريه وقالت اسحبو البيبي بالجهاز
طبعا سحبوها من راسها وفتحو لي عالفخذ وبعد ساعتين من الولاده جاتني دكتوره غير اللي ولدتني تقول انا مو مرتاحه للخياطه يمكن نفكها ونرجع نخيطك لان المنطقه كلها متورمه بس حطوا لي مرهم ورجعت فحصتني قالت لي خلاص مايحتاج
طبعا الحمد لله اني قمت بالسلامه انا وبنتي
بس بقولكم اثار هالولاده واللي صار لي من بعدها:
بنتي صار عندها جرح براسها من الشفط بس الحمد لله مرررره صغير
انا التهبت خياطتي وماخفت مع اني خلصت الاربعين
صار عندي بكتيريا بالرحم لانهم مستخدمين شي مو نظيف
عضلة المثانه للان توجعني ما اقدر اتبول وانتم بكرامه لانهم مسوين لي قسطره اربع مرات قبل الولاده مع ان الطبيعي يسوونها مره قبل الولاده ومره بعد الولاده في حال ماقدرتي تتبولين طبيعي
والحمد لله على سلامتي 😆 hy:
