تعالوا بكتب لكم قصتي وابي بس ردود ترفع معنوياتي

كيفكم؟

انا داخله هنا بس ابي افضفض

هي مو مشكله كبيره

بس مره تضايقني وتألمني وتخليني اكره حياتي الجايه

وكل هالشي بسبب كلام امي عن خطيبي ( زوجي ) واهله

قبل ماابدا بالمشكله

بقولكم قصتي

سالفة خطوبتي من هالانسان مره غريبه

عرفته مو بالطريقه التقليديه

عرفته بالنت

ماابي ردود جارحه لان هالموضوع من 7 سنوات ولا ابي تشكيك وزيادة هموم ,, لانه قسم بالله السالفه كلها نصيب ,, لان قصتي غريبه وبتشوفونها الحين

عرفته عن طريق منتدى .. كان توه المنتدى جديد … وكان معجب باسلوبي

وحاول يتقرب بس بالمره ماصارت اي فرصه

وكانت العلاقه سطحيه بس مجرد مواضيع منتديات وردود ومرات ادخل شات الوقع نفسه مع صاحباتي ويكون هو موجود

وفجأه تهكر الموقع وتقفل

تخيلوا الموقع اللي كان يجمعنا تسكر

تقفل

تهكر

يعني مستحيل يلاقيني بعالم النت

وانتوا عارفين

لو لك معرفه بوحده هنا ومابينكم الا هالمنتدى وماتعرفي لها ايميل ولا اي شي غير هالمنتدى اللي جمعكم وتقفل ,,, مستحيل تلاقيها

كيف تلاقيها !!!! مستحيل

انا تخيلوا

لقيته

بالصدفه

جمعنا موقع ثاني بالنت

ورب الكعبه صدفه غريبه

ماابي ادخل في تفاصيلها

بس هالشي كان مستحيل كان بالنسبه لي هذاك الانسان اللي كان بالموقع القديم ويتودد لي ويتقرب لي ويحاول يوصل لي ,,, انتهى بنهاية الموقع

لكن ربي اراد يجمعنا

وهالمره ماتركني

تمسك فيني

وحاول بأهله لين اقنعهم ( طبعا مااحد يعرف هالقصه غيرنا ,, ومؤخرا امي عرفت ) وجا وخطبني

بعد معاناه وتعب

انا من عائله متوسطه عاديين اصلنا بدو بس متحضرين

يعني ناس فاهمين بكل شي

واهله مستواهم اقل منا

وبدو … بكل معنى البداوه

يعني مو متطورين ابد

من اول ماجوا اهله وامي عرفت انهم بدو ,,, ماحبتهم

امي كانت تبي ناس هاي

ومراكز

ناس إذا مو بمستوانا اعلى مننا

بس خطيبي مو على مواصفات امي

انا وربي كنت مقتنعه فيه مليون بالميه

وللحين انا واثقه مستحيل احد يقدر يفهمني ويتحملني ويسعدني غيره

هو طيب معاي موت

ويحبني بجنون

من رجعنا لبعض صار لنا سنتين … كل هالسنتين ولا مره قصر معاي بشي

ولا مره تغير علي

ولا مره مل

ولا مر تردد بموضوعنا ,,, سوا المستحيل عشاني

اهله كانوا يبون يزوجونه بنت عمه ,, مايرضون انه يتزوج من برا العائله

بس عاندهم وبالقوه اجبرهم وخطبني

والحمدلله صار لنا اسبوع مملكين ياربي لك الحمد والشكر يارب يتمم لنا ويسعدنا ويوفقنا

امانه تذكرون الله وتدعون لنا

المشكله

اني من فتره وانا اقارن حياتي الجايه بحياة اي وحده راح ترتبط بعائلة فاهمه وماديا مرتاحين

وافكر كيف بتكون حياتي معاه ,,, هو حالته الماديه كويسه يعني لازم نتعاون انا وهو عشان نقدر نعيش مثل ماانا اتمنى

بس اللي يضايقني

اهلي

امي الله يخليها لي بالتحديد هي اللي تضايقني

لما افكر اشتري شي واجهز نفسي

لو بشتري فساتين سهره

تجي وتحطمني وتقول اهله بدو مايفهمون مو لازم

بسوي لنفسي حفلة ملكه وابي ارتب البيت تقول مو لازم

كل شي صار عندها ماله داعي

وكأنه عشان زوجي واهله بدو يصير انا لازم ادفن نفسي بالحيا ومااهتم لا بشكلي ولا بلبسي ولا بأي شي

وانا وحده اموت بالكشخه واللبس والذوق واحب اشتري كل شي وانيقه والحمدلله

بس هالكلام يخليني افكر واقول اخاف اندم على زواجي منه

بس من هالناحيه

لكن وربي مستحيل الاقي رجل بالكون مثله … يقدرني بجنون ويحترمني ومايرفض لي طلب ويموت فيني ويدلعني ورومانسي وكل شي

بس طبعي زفت ,, افكر بالشي الناقص

وادري كذا بتعب

بس وربي كل هاللي فيني من كلام امي الله يهديها

لما كل شوي تقول بدو … مايفهمون ,,, يفشلون ,,,, كل هالكلام انا تحملته سنه ( من خطبني صار لنا سنه )

بس خلاص هالكلام صار يأثر على نفسيتي ويحسسني اني ممكن مااكون سعيده

خصوصا وان اختي الاصغر مني انخطبت من ناس هاي

ومرتاحين ماديا جدا جدا جدا ماشاء الله ربي يسعدها ويوفقها

صارت لاختي كل شي مهم …. بس لي انا لا اللي برتبط فيهم بدو ماله داعي اسوي شي

خلي كل شي عادي

والاهتمام كله لاهل خطيب اختي

وربي انا مااغار من اختي

بس صرت ازعل لما يقارنون زوجي بخطيب اختي ويفضلونه بس عشانهم ناس فاهمين على قولتهم

وربي زوجي مايستاهل طيب وكل شي

بس خايفه هالكلام يخرب بيننا ويأثر فيني ويأثر على علاقتي معاه

بليز ماابي كلام جارح تكفووووووووووووووووووووووووووووووووون

انا ادري ان كثير متزوجين ناس مثقفين واغنياء وكل شي بس الرجال شخصيته زفت ويعاملها زفت ومو مرتاحه معاه

والسعاده مو بالاشياء هذي

السعاده لما ترتبطين بانسان فاهمك ويقدرك ويحبك

بس نفسي كلام اللي حولي مايأُثر فيني ويخرب علي

فيه وحده مرت بنفس اللي امر فيه ؟؟ كيف اساعد نفسي مااتأثر بكلام اللي حولي كيف؟