عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
يسعد مساكم يالغوالي
هذا اول موضوع لي انزله بالقسم مع اني من المتابعات بشكل يومي تقريبا
لكن فيه سالفه تقرقع براسي ومو راضيه تطلع
انا ام بنات الله يحفظهن
اكبر بناتي عمرها الان 15 سنه
يعني تخيلوا كم لي متزوجه
والان انا حامل مثل ماهو واضح بالشريط بنص الثامن تقريبا
في الاسبوع 19 من الحمل سويت اول سونار
كان مستوصف صغير والسونار كان واضح ماره مع انه العادي ابيض واسود
والدكتوره قالت لي ان الجنين ولد
وفرجتني ع الصوره
شايفين صورة السونار هذي
نفسها تماااام لكن الجزء الصغير اللي عليه السهم ماشفته
هذي صوره من النت لاني للاسف ماطلبت منها تصور المنطقه ماجاء في بالي
لكن الصوره نفسها فيه حاجه مثل الكوره بين الرجلين
وفرجتني عليها من الامام ومن الجنب وكانت واضحه
لكن هذا الجزء الصغيراللي تحت السهم ماشفته يابنات متاكده
طبعا بتقولون روحي تاكدي بمستوصف ثاني او سوي ملون
انا مو من سكان الرياض جبرتني الظروف اسكن بقريه مافيها الا مستوصف خايس وماعندهم
طبيبه نسائيه
والمرات القليله اللي انزل فيها الرياض ماره رحت اسوي سونار اتاكد وللاسف كان البيبي وضعه مايسمح
نهائي ان الدكتوره تشوف وفاتت علي الفرصه للاسف
الان انا مجهزه كل شيء ولد .. ومتعشمه انه ان شاء الله ولد .. وبناتي يبون ولد وابوهم متعشم مع اني مالمحت لهم .. ومخبيه الاغراض عنهم .. مقفله عليها بشنطه وراميتها فوق دولاب غرفة الشغاله مع ملابس الشتاء عشان مايدرون عنها ويفتشونها .. ماطلعت الا اللبس الابيض بس .. والازرق مخبيته
تتوقعون يابنات ان الجنين فعلا ولد .. من كثر مااقرأ بالنت واشوف هالاخطاء في السونار .. واسمع حكايات
احس صار عندي وسواس ..
الحمدلله على كل حال .. ولو انها بنت والله انه بيصير غلاها من غلا خواتها
لكن النفس تبي وتشتهي .. والولد ماينعاف .. والرجال مايحتاج احكي .. كل ام بنات تحس باللي احسه اكيد
كل اللي ابيه منكم كلمه بسيطه تطمني ..
والله يفرحنا واياكم بشوفة اجنتنا سليمين معافين واحنا بصحه وسلامه
يااارب
