عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
كيف حالكم يا فراشات.. بأقولكم سالفة صديقتي وأمانة انكم تحكمون بصدق ولا تجاملون بارك الله فيكم
صديقتي يا غاليات تزوجت واحد مطلق ودخلها على بيت اللي قبلها وعلى أثاثها وكل شي والحوسة طبعا اللي قبل ما تدري..
الحرمة تحملت على اساس انه بيغير لها كل شي وطبعا غرفة نوم ما حط لها وهي تنام بالصالة.. بينما هو ينام بغرفته.. وكل هذا لأنها تحبه ولا تبي تخرب حياتها معه
مع انها تدري انها على حق.. وان من حقها اثاث جديد حالها حال حريم العالم كلهم.. وصبرت معه سنتين.. على أمل انه يغير البيت وينقل بيت جديد..
صحيح انها بعض الاحيان تبكي وتشكي له انها مو قادرة تتحمل العيشة في بيت اللي قبلها بهالوضع.. لكن مع هذا معظم الوقت تموت من القهر وتسكت لأنها تحبه ومستعدة تتحمل المر عشانه وهو مقتدر ما شاء الله
يعني يقدر يحط لها بيت بكل سهولة وبدون ديون.. المهم.. صديقتي هذي سافرت لم أهلها تبي تقعد عندهم كم يوم.. وهو حلف عليها ما ترتب شي قبل لا تطلع من البيت.. ولا تنسون ان الاثاث قديم والبيت حالته مزرية من قبل ويا عالم الله هي وش قد نظفت بالبيت وشالت من بلاوي بس ما فيه فايدة ونفسيتها تحطمت..
المهم.. السالفة الي ابي رايكم فيها مو قضية البيت.. لا ولا الأثاث.. جايتكم بالكلام..
بعد ما سافرت صديقتي بكم يوم لأهلها.. إلا تقوم اخت الرجال مع زوجها وعيالها يبون يتمشون بالاجازة واختاروا المكان اللي فيه بيت صديقتي.. وتخيلوا راحوا في بيتها وجلسوا فيه وطبعا زوجها ما يقدر يقول شي لأنها اخته.. ويطبخون وينامون في بيتها وعلى حوستها.. بالنسبة لصديقتي لا تنام ولا تاكل ولا تشرب من القهر.. لأنها ما تأكدت سفرتها لأهلها الا بنفس اليوم والله انهم قرروا السفر الظهر قبل الجمعة ومشوا الساعة وحدة ونص.. بالله عليكم وش يمدي صديقتي تضف بالبيت وإلا وش يمديها تزين وتخلي.. لا وزوجها يهاوش يقول اتركي كل شي وامشي واذا رجعتي زينيه..
أسألكم بالله وش احساسكم لما تدخل اخت الزوج البيت وانتي غايبة وهو حوسة.. وتشوف اللي ما تبين احد يشوفه حتى اهلك.. وتاخذ راحتها بالبيت.. بالله في احد غلطان؟ وإلا خويتي تتوهم وحساسة زيادة عن اللزوم… أنا أشوف ان من حقها تنقهر وتموت بعد.. وانها لو تدري ان اخت زوجها بتجي ما تمنعها تجلس بالبيت لكن عالأقل ترتب شغلها وتجهز البيت لهم قبل لا تمشي.. واخت زوجها طبعا اول مرة تجي البيت وش يدريها ان البقع والخراب اللي بالأثاث من اللي قبل وإلا منها.. والله حرام اللي صار لها تفشلت بشي هي مالها ذنب فيه..
بالنسبة لخويتي هي تموت بزوجها ولا تبي تخسره وبنفس الوقت صار عندها ردة فعل.. تحس انها ماهي راضية على اخته انها تدخل البيت وهي غايبة.. ومو قادرة تنسى السالفة.. وكرهت البيت زيادة ماهي كارهته.. وقالت لزوجها انها خلاص ما عاد تتحمل وتبي حالها حال اي حرمة بالدنيا تتزوج وتعيش في بيت جديد مو على أثاث زوجته الأولى..
بالله عليكم أبي رايكم واحساسكم بكل أمانة وصدق وبدون تعاطف
