ثقتي بنفسي تساوي صفر والسبب آختي

السلام عليكم ..
اليوم حابة افتحلكم قلبي وكل ما اتمناه ارتاح وتصوبوني لو كنت على غلط ..
مشكلتي مع اختي اللي تكبرني 9 سنوات مشكلة طويلة .. من لما كبرت ونضجت واختي معدمة ثقتي بنفسي
و والدتي للآسف معاها
في كل مكان نروح له او اختار ملابس دايما تنتقدني فيهم وتنتقد تصرفاتي مع انها تكون طبيعية
وعفوية .. ومع الوقت ومن كثر الانتقاد فقدت شخصيتي وصرت ما اتصرف على طبيعتي وكثيرةالخجل و قليلة الكلام ولا اروح اسواق ولا اعرف ايش اللي نازل واالي قديم
..
لما كبرت وصار عمري 17 سنة آنخطبت وكنت وقتها صغيرة وما كملت دراستي بسبب اني خلاص بتزوج
ومرت السنوات وانا بأسم مخطوبة المهم والدتي واختي كدبوا على اهل خطيبي وقالوا اني مخلصة دراسة وانا وقتها شخصيتي ضعيفة ولا قدرت اقول ليه ..
و كنت ما اعرف معلومات عامة عن خطيبي وكانت والدتي اي اخبار توصلها تقولها لآختي وانا ولا كأني موجودة وكان والله شي يضايقني ولا كنت اقدر آقول لوالدتي انا فين من الموضوع ..؟ عشان شخصيتي المعدومة ولا اعرف اطالب بحقي
وقبل سنتين اتملكت وكنت مالكة الدنيا يومها وبعدها بكم يوم كنا جالسين انا واختي ووالدتي وقلت ابغى اعرف كم عمر خطيبي ..؟
قالت اختي لآمي ايوة اتصلي على ام خطيبي واسألي
اتصلت آمي وقالت ,,, سارة تبغى تعرف متى ميلاد محمد ………!!
سارة مو انا …. سارة هي اختي
حسيت بضيق وحزت في نفسي يمكن اكون حساسة زيادة بس ابغى احس انو لي خطيب وبسأل عنو وابغاه يعرف اني مهتمة لآمره
عديتها مثل سابقاتها واتحدد زواجي في شهر 7 القادم وزي ماقلتلكم
انا نادرا مابروح لآسواق بس اعرف اللي يعجبني ويناسبني واختي خبرة وتعرف الاماكن وقررت اجي اقضي وهي تكون معي
والله والله يابنات من اول يوم رحنا نقضي ونختار وانا بتعود اختار واختياري مناسب لعمري
اي شي بختارو تنتقدني فيه وتقول عادي وبايخ ولا تتريق عليا عند اخواني ولا يوم قالتلي ماشاء الله ولا شجعتني
مع ان اللبس اللي بختارو اعجب بنات اخويا وزوجاتهم واختي الثالثة الا هي
احسها احيانا تستقصد تحطمني وتحاول تطلعني قدام نفسي ما اسوى والمصيبة امي مساعدتها
هي اختيارها للملابس بيكون على عمرها واشياء رسمية والوان غامقة ما احبها ولا تصلح لعروس
الان ومع كل هالضغط خلصت نص اغراضي
وقبل امس في السوق حبيت اشتري لخطيبي بيجاما ولا كنت اعرف المقاس
كلمت آمي لانها بمدينة ثانية على اساس تكلم ام خطيبي تسألها وقلتلها بشريلو بيجاما ولبس للبيت
قالت لاااا عيب بعدين اشتري لما تتزوجي
الاقي اليوم اختي تقولي امي تقول مقاس محمد xL
وقالتلي انو امي قالت لآم خطيبي البنات حابين يشترولو ملابس اللي هم انا واختي
يا بنات انا هنا انفجرت هو صحيح امي كويس افتكرتني بس ليه جمعتني مع اختي ……..؟؟؟؟؟؟
انا اللي بتزوج ولا انا وهي معايا ابغى افهم
زعلت وعصبت وكلمت آمي وقلتلها هو مو زوجي ليه مابتقولي خطيبتو تبغى تشريلو
ليه جمعتيني مع اختي .. ؟ وزعلت وسكرت السماعة بوجهي
الموضوع هادا حساس عندي لاني ابغاه يفرح اني بهتم فيه خصوصا من بعد الملكة مابينا اي اتصال
يمكن تشوفوا انا مزودتها بس انا بجد ابغى احس اني انا اللي بتزوج
احيانا بحس اختي تستقصد تعمل كدا لانها تغار عشان مو مرتاحة مع زوجها وزواجها كان بسيط جدا جدا وزواجي بيكون في اكبر قاعات مكه
ما ادري بس بحاول اشيل هادا التفكير خصوصا انها مستلمتني تريقة طول الوقت قدام اخواني وانا ساكتة
مع انو ملابسي انا اللي اخترتها وكل مانجتمع تجلس تتريق وتقول عني ما اعرف اشري ولما نروح السوق بس الحقها ولا اعرف الماركات ولا اعرف المحلات
ايوة صح انا ما اعرف بس ليه التجريح …؟
وموقف صار اليوم عند اخويا الكبير كنا جالسين نتقهوى قامت هي كلمت امي ورجعت وقالت اليوم بروح للسوق يلا هاتي بطاقة الصراف .. قلتلها انا تعبانة خليها يوم تاني قالت لا امي اعطتني الصلاحية يلا هاتي البطاقة عشان امي موصتني اشري اشياء ..؟ قلت ايش ..؟ قالت اشياء ختى ماتبغى تقولي
طبعا هي وامي بيقرروا من نفسهم وانا ولا كأني موجودة قال اخويا الكبير وهو حاس باللي بينا …. لا مايصير لازم تشتري على عينها قالت هي انا اللي بشتري وقلتلها وانا اللي بلبس وبعدين قالت بكيفك وزعلت وراحت ولا حتى جاتني بأسلوب طيب وقالتلي مابشري الا وانتي معي وعلى اختيارك وبساعدك
طبعا رحت اتكلمت معاها بصراحة على كل اللي سوتو اليوم وابغاها تلزم حدها ولا تتريق وجلست تبكي وحملتني جميلها انها استقبلتني في بيتها وودتني اماكان ما كنت اعرفها وانها اختي مو عدوتي
طيب لما هي اختي ليه تجرح فيني وما تشجعني ومعدمة ثقتي بنفسي ؟؟؟؟؟؟؟؟؟
يابنات انا متضايقة وكارهة الدنيا وقلتلكم كل شي ولا كدبت بحرف
قولولي انا غلطانة .. ؟