عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
مشكلتي باينه من العنوان 
مشكلتي مرره احب الانعزال ماأحب الجمعات ماأحب العزايم حتى ماصرت احب احد يزورنا
تعبت من هالحاله …
اشوف بعض قريباتي عكسي مرره ماشاء الله يفرحوون لما يسمعوون عن عرس او عزيمة
انا اذا انجبرت اروح لمناسبة اشيل همها من يوم اسمع خبرها حتى لو كانت بعد شهر !!
وكل ماقربت زادت ضيقتي وخوفي ..
اخاف ماعرف اتصرف فيها
اخاف يصير لي موقف يحرجني قدامهم
اخاف لبسي يكون مو مناسب
أخاف واخااف واخاف …..
يعني ثقتي بنفسي مرررررره ضعيفه 🙁
وكل اللي قلته يهووون عند المشكله اللي معقدتني بحياااتي
وهي الخجل من الكلام قداام اي احد
ينربط لسااني مرره مااقدر اتكلم
واذا ضغطت على نفسي وتكلمت لو كلام بسيط يحمر وجهي وتزيد نبضات قلبي واتلخبط في الكلام واندم اني تكلمت واتمنى لو اني سكت
واقعد بعدها ايااام الوم نفسي
حتى عند اقاربي يصير لي كذا … صرت معرووفه عندهم اني الهااديه الخجووله
لدرجة احيانا بعض البنات يتجاهلووني كاني مو موجوده لاني بجد كاني مو موجوده مرره هاديه وساكته !!
حتى في الجامعه داايم ساكته وهاديه ومااحتك مع بنات قاعتي
صبرت ع هالمشكله طول حياتي بس الحين وصلت لحد ماعاد اتحمل اكثر
لان تخصصي الآن تربوي .. يعني ان شاء الله راح اكون مدرسة !!
لمت نفسي مليون مرره ع اختياري لهالمجال بس خلااص ماقدر اغير شي
الحين انا في ثالث يعني هالسنه بطلع تربية عمليه ان شاء الله
كل مااتذكر هالشي احس اني بموووت من الخوف
كيف باقدر اشرح قداام مجمووعه كبيييره من الطالبات وانا استحي اتكلم قدام بنتين من اقاربي بس !!
وكيف باقدر اشرح قداام زميلاتي والمشرفات وانا استحي في الجامعه اذا بس طالعوني وانا داخلة القاعه !!!
تعبت والله تعبت من هالخجل اللي ماله داعي
ابغى اصير نفس باقي البنات اللي يتكلمون ويسولفون وينكتوون ععاادي قدام اي احد حتى لو اول مره يشوفونه ..
لكن الحمد لله ع كل حال هذا المكتووب
بس ابغى اعرف فيه وحده مثلي ؟
اذا ايه .. قدرتي تتغيرين وتزيدين ثقتك بنفسك ؟
وحتى لو مافيه احد مثلي
اللي عندها اي معلومه يمكن تفيدني او تخفف علي اتمنى تقولها
ترى انا بطبعي احب الضحك والفرفشه ومره متعاونه بس سكوتي مخلي الناس مايفهموني 😛
آسفه طولت عليكم بالكلام
