جدول العناية اليومية رشاقة تفتيح صفاء نعوية محارية الهالات والتشققات توكلنا على الله

بسم الله الحنان المنان
والحمد له اجزل لنا الاحسان
وعليه التوكل وبه المستعان
والصلاة والسلام على نبيه هادي بني الانسان
اما بعد
السلام عليكم ورحمة الله وبركاته
حبيباتي الفراشات انا كتبت هذا الموضوع لسببين :
الاول وهو الاهم هو اني محتاجه كثير لدعاء أسأل الله من الخير اكثر مما ارجوا وأعوذ به من الشر أكثر مما أخاف أسأل الله أن يرضى علي ويوفقني ويهديني وينصرني ويجعلني من عباده الي يدافع عنهم سبحانه ويجعلني من اهله وخاصته أهل القرآن ويخلي لي أمي ويصلح أخوي وزوجي ويوفقهم ويسعدني يشوفت ولدي امام في بيته الحرام ويجعلني عنده في منازل الشهداء ويبلغني حوض نبي صلى الله عليه وسلم ويعلني احشر في زمرته أمين والمسلمين أجمعين
اما الثاني فهو اني مثلكم كثير تعبت من اللخبطه في البحث عن الجمال بكل فروعه وقرت اني اترتب بجدول منطقي ممكن تنفيذه بدون تعب
المشاكل الي نبغى نحلها ان شاء الله في هالجدول هي كتالي :
زيادة الوزن السترتش مارك وهي الخطوط البيضاء التصبغ الجلدي خشونة الجلد واثار الحبوب والكلف على الوجه
الجدول كتالي
بسم الله الرحمن الرحيم
1- صلاة الفجر : يعني حبيباتي لازم نصلي الفجر في موعدها عشان نكون في ذمة الله سبحانه الي هو قادر على تحقيق مقاصدنا .
2- أذكار الصباح : اسهل شيء بنات وانتي جالسه على السجاده بعد الصلاة او وانتي في السياره رايحه للمدرسة أو الدوام او الجامعه اقراي اذكار الصباح وتذكري ان فيهاحرز من الشيطان والعين وانها تعطيك احساس بالراحه يجعلك متفائله وقاده تحققين طموحاتك.
3- 7تمرات : وهذا كان فطور خير البشر رسولنا محمد صلى الله عليه وسلم واكيد انو له فايده عظيمه في طرد السموم وتغذية الجسم والشعر والبشره والذهن.
4 – كاس حليب: انا رح استخدم حليب السعودية قليل الدسم واكيد كلنا عارفين فوائد الحليب لبشرتنا وجسمنا خصوصاً على الصباح .
5- ماسك العسل : لانو انا اكون جالسه بالبيت الصباح اخترت انو احط ماسك عسل على وجهي في هالفتره وهو عباره عن عسل السدر ممكن انتو تبدلوه بأي ماسك ثاني بس انا سمعت انو هذا الماسك مفيد لمدة ساعه وبعدين ينغسل .
6- ملعقة عسل مخمره فيه بصل : وهي وصفة قريتها من زمان انو تخمرين بصله مقطعه لاربع قطع في علبة عسل اصلي متوسطة الحجم لمدة اسبوع بعدين تشيلين البصله وتصيرين تاخذين كل يوم ملعقه منه الصباح وهو مفيد لشعر .
7- خلطه على الجسم : انا اخترت خلطه قريتها هنا في المنتدى لوحده الله يجزاها خير حبيتها لانو كلها طبيعييه وهي عباره عن علبة صغير فازلين وعلب صغيرة فكس وعلبة كبيرة جولولسيد الاحمر وثلاث ملاعق كبار نشا وكاس حليب السعودية وفنجال موية ورد تنخلط مع بعض ونحطها بالثلاجة وكل يوم نحط منها على جسمنا ممكن نضيف للكمية الي نبغى نستخدمها قطرات ليمون ولازم نخليها على الجسم اكثر من ثلاث ساعات انا كمان اخترت وقت الصباح لاني اكون بالبيت وزوجي في الدوام .
8- زبيب وحبة سوداء : ناكل 7حبات زبيب و7حبات حبة سوداء ونمضغهم عشان تطلع فايدة الحبة السوداء وهذا شيء مفيد كثير للشره.
9- كوب زنجبيل وكمون وليمون : نحط شوية زنجبيل وكمون وليمون في كوب ونصب عليه مويه مغليه ونشربه بعد 10 دقائق والزنجبيل شراب الجمال طبعاً والخلطة في عمومها مفيدة لرشاقه وتخفيف البطن .
10- عصير فواكة طازج : نشرب عصير طازج خالي من السكر انا افضل انه يكون عصير تفاحه وجزرة وبرتقاله طبعاً رح يكون عصير مفيد عشان الوزن والبشره والشعر.
11- الفطور : اختاروا فطور خفيف وكل يوم اكتبوا في جدولكم ايش اكلتوا عشان تلاحظون انفسكم وتعرفون وين الخطأ .
12- خل تفاح: بعد العطور حطو ملعقة صغيرة من خل التفاح في كاس وصبوا عليه موية اشربوه طبعاً فوائد خل التفاح معروفة للوزن وحرق الدهون .
13- شاي اخضر : كمان بعد الفطور اشربوا شاي اخضر لانه ينقي الجسم من الشوائب والاكسدة ويساعد على تخفيف الوزن .
14-تمارين : اعملوا شوية تمارين كل وحده على راحتها والي يناسبها من التمارين يعني 10 دقائق كفاية .
15- سكراب للجسم : انا احب السكراب او المقشر الطبيعي وهو عبارة عن سكر وزيت زيتتون وعصير ليمونة ادخلوا الحمام وافركوا جسمكم فيه على خفيف وجسمكم ناشف رح يعطي نعومه خيالية بعدين تروشوا عادي بس بصابون خفيف او رغوة خفيفة بدون فرك قوي وبعدين ادهنوا جسمكم المبلول بزيت جزنسن للاطفال .
16-ترطيب الجسم : رطبوا جسمكم باي مرطب تحبونه انا عن نفسي احب اخلط نوعين مع بعض واحط معهم زيت جونسن اند جونسن البخاخ الي بزيت اللوز حلو وريحته كمان حلوه .
17- واقي شمس : حطوا على وجهكم واقي الشمس الي يناسبكم انا استخدم واقي شمي افيان كثير حلو الحمد لله وبعده ممكن تحطو الماكياج لو كنتو بتطلعون او تكتفون بالروج والكحل لو كنتوا في البيت.
18- صلاة الظهر : زي ما قلنا لازم نتقيد باوقات الصلاة عشان ربي يكون معانا ويرضى عنا ويحقق لنا الي نبغاه .
19-الغداء : كمان الغداء اختاروا اشياء خفيفه وقللوا الدهون والنشويات وكثروا من السلطة كل وحده زي ما تحب وكمان اكتبوا في جدولكم ايش اكلتوا .
20- خل تفاح : نسوي كوب من خل التفاح زي ما عملنا بعد الفطور ونشربه .
21- شاي اخضر : كمان كوب شاي اخضر بعد الغداء .
22- كريم للخطوط البيضاء : انا رح استخدم كريم اسمه rimedia ما ادري عن مفعوله بس الي واصفه لي دكتور وكل وحده ممكن تستخدم الكريم الي ترتاح له حطو منه على اماكن الخطوط انا بصراحه ما رح استعمله على كل الاماكن رح اكتفي بمنطقة معينه لحد ما اتاكد من النتائج عشان اوفر جهد ووقت ومال .
23- كريم لتسبغ الجلدي : يعني كريم للمناطق الداكنه انا رح استخدم كريم اسمه perfection كمان الدكتور واصفه لي ويقول انه امن للاستخدام في اي مكان .
24- تمارين : مرة ثانية نعمل شوية تمارين خفيفة لمدة 10 دقائق .
25- صلاة العصر: وربي اوصانا سبحانه بالمحافظة على الصلاة الوسطى وهي العصر.
26- اذكار المساء : نقرا اذكار المساء عشان نحس براحه ونكون في حفظ ربي سبحانه .
27- وجبة من الخضار : نجيب صحن مشكل من الخضار وخاصة الورقية لانها كثير مفيدة .
28- صلاة المغرب: نصلي المغرب في وقتها ان شاء الله تعالى .
29- وجبة خفيفة : للحابين ممكن يتناولوا وجبة خفيفة بس بشرط ما تكون شيء دهني او حلويات يعني تكون دايت .
30- تمارين : 10 دقايق تمارين خفيفة .
31- مشي: نمشي مدة 30 دقيقة وياسلام لو مشينا وحنا نسبح ربي سبحانه ونذكره عشان يذكرنا في من عنده .
32- صلاة العشاء : نصلي العشاء في وقتها .
33- شاي شمر: وهو عباره عن ملعقة كبيرة من الشمر نحطها بكوب ونصب عليها مويه مغليه ونتركها 10 دقايق بعدين نصفيها ونشربها لانو الشمر يشد الجلد عشان ما نترهل بعد ما ينقص وزننا ان شاء الله .
34- كاس زنجبيل كمون ليمون : نعمل مرة ثاية كوب زنجبيل وليمون كمون مثل الي عملناه الصباح .
35- العشاء : كمان هو يكون منوع ودايت ونكتب ايش اكلنا .
36- خل تفاح :نرجع نشرب خل تفاح نفس الطريقة الي ذكرناها بعد الفطور وبعد الغداء .
37- شاي اخضر: نشرب كوب شاي اخضر بعد العشاء .
38- كريم الخطوط البيضاء : مرة ثانية نضع كيم الخطوط البيضاء في المساء .
39- كريم التسبغ الجلدي : مرة ثانية نضع كريم التسبغ الجلدي والبقع في المساء .
40- غسل الوجة : نغسل وجهنا بالصابونة المناسبة قبل النوم .
41- كريم الليل : نحط الكريم الناسب لبشرة وجهنا قبل النوم سواء كان مغذي او خاص بالحبوب او غيرة .
42- اذكار النوم : قبل ما ننام تقرا اذكار النوم .
43- ماء : طبعاً الموية مهمه للبشرة والشعر وتنقيص الوزن وكثير مننا مهملين شربها وانا اولهم عشان كذا في هذي الخانه رح نحط صح لكل كوب مويه نشربه في اليوم وياريت نشرب اكثر من 6 اكواب .

هذا هو الجدول ممكن تغيرون الاوقات حسب ما يناسب ظروفكم
الاهم الي حابه تنضم معاي تسجل اسمها عشان نحدد اليوم الي رح نبدأ فيه ان شاء الله
والطريقة هي اننا كل يوم نكتب جدولنا في ورقة ونحط صح قدام كل شيء نسويه في وقته الصحيح وقبل ما ننام كل وحده تنقل جدولها بعلامات الصح الي حطتها في رد على موضوع مستقل رح اعمله بعدين ورح يكون الموضوع متضمن اسماء البنات الي انضموا معاي

بنات انا تعبت في الكتابه خصوصاً ان ولدي الله يصلحه مخرب حرف الراء عندي يعني لازم اضغط بقوة عشان يكتب يعني لو سمحتوا تقديراً لجهدي يا ريت تدعون لي في ظهر الغيب حتى لو ما عجبكم جدولي لان هدفي من كتابة هذا الموضوع هو الدعاء لاني بحاجه كبيره له