عالم البنات النسائي كل ما يخص المرأة العربية من ازياء وجمال والحياة الزوجية والمطبخ
ياجعله شهر مبارك وصحه وسلامه علينا وعليك وعلى كل المسلمين
أولا ببدأ موضوعي بطلب دعوه 
أن الله ييسر لي ويسهل علي الصيام
ويأجرني على التعب
تخيلو بكريه وقاعده اسوي فطور لعدة اشخاص بدون اي مساعده منهم أخو زوجي واثنين من اصدقاءه
والحمدلله والشكر ابغى الاجر
اللحين نجي لموضوعنا
أنا في بداية الخامس لي أسبوع اللهم لك الحمد والشكر
طبعا اراجع في مستشفى حكومي ودكتورتي ساافرت
وقلت خليني اروح مستشفى خاص منها اعرف جنس الجنين
وسويتها رحت مستوصف الاحمدي عند دكتوره هويدا
وآآآآآآآه ياهويدا
أول شئ قالت لنا السونار ب200
زوجي صارت عيونه كذا 
قالها انا في جده مسويه ب80
وبعد عدة محاولات خلوه ب150
الزبده انها كل شوي تهاوش وتنافخ بوجه زوجي
وتقوله
اللي ابو 80 كذا
عاد تبون الصراحه ماش فرق بين حقها وابو 80
المهم بعد الهوشه وكل شئ
قلت خلاص بس طمنيني على جنيني وعلميني وشو جنسه
تعرفون وش قالت
قعدت تفرفر وتفرفر وتفرفر
وأخر شئ قالت الجنين في وضع السجود
وشكله للحين ماخلص التراويح 
وبعد محاولات وقالت لي لفي يسار وانا مالفيت بس تحركت شوي وقعدت تضغط على بطني
وبعد جهد جهييييييييد قالت لي بنت
بصراحه ماني مصدقتها
والسبب
انها بعد ماسمعت زوجي يقول لي شكلها ماهي متأكده
نفخت عليه
وقالت له 100 % بنت
وخذ هالصوره حقت السونار وعطتنا هي وقالت ودوها لاكبر مستشفى وافضل دكتور
وشوفو وش بيقول لكم
عاد الله واكبر انا اللي اعرفه اغلب الدكاتره يقولون احتمال بنت واحتمال ولد
مايكونون متأكدين
قهرتني والله وشككتني
من امس وانا افكر
عندي احساس انه ولد
خصوصا ان الوالده حلمت فيني
تخيلو حلمت انها اشترت ثلاث بشوت (مشلح)
عطت وحده من الجماعه وجابت ولد
وعطت الثاني وحده ثانيه ورفضت تاخذه وعطته زوجها هديه وسقطت
وعطتني الثالث وانا اخذته عندي
الغرض من الموضوع كله خلاص اتعشم في بنوتي واتحلم فيها وأقضي لها
أو أنتظر
ياربي اخاف اتعلق في البنت وانصدم
انا اذا اتعلقت في شئ صعب اتنازل عنه
يارب يجيبه بصحه وسلامه وعافيه ويسر وسهوله
والله شيبو راسي هالدكاتره
