حزنت وبكى جوفي .. لكن مابكت عيني..

السلام عليكم ورحمة الله وبركاته ..

بعد الإختبارات وآخر سنة في الثانوية ..
تفارقت أنا وخوّياتي وصديقاتي ..
وعاد تعرفون آخر يوم ..
أنواع الدموع والبكا .. وحالات يرثى لها ..

بس أبي أقولكم عن حالتي.. وأبي تفسير لها ..
أنا اعرف انه قوة نفس وصبر ومكابرة..
بس ابي اسمع رايكم أنتم .. ورايكم يهمني ..
ابي اعرف لي حق ولاّ لا ..

بصراحة قبل آخر يوم ..
دعيت ربي من قلبي .. يعدم احساسي بذاك اليوم ..
طلبته ما أذرف الدمع ..
ما أبي احس بالألم ..
وجا اليوم الأخير ..
ووادعتهم .. وما بكيت ..
تعودت ما أبكي قدام احد .. ولا أشكي لأحد باللي بداخلي..
بس اسمع للناس .. واعطيهم قلبي واحساسي ..

وبصراحة ..
شفت كل البنات يصيحون إلاّ أنا ..
صدق أحس الدمع بعيوني ..
وتحملت .. حتى استغربت من نفسي كيف قدرت اتحمل ..
ولو اني جبل كان انهدّ ..
وابتسمت .. وضميتهم .. ضميت صديقاتي ..
وهدّيتهم .. وقلت ان شاء الله راح نتقابل ..
بإذن الله راح نتقابل ..

ما أحس اني متألمة ..
لا والله .. إلاّ كل الألم فيني .. بس صبرت ..
وكذبت على نفسي ..
قلت راح ألقاهم بيوم.. أكيد .. إن شاء الله ..

صرت ابعد الذكريات الحلوة من بالي ..
ما أبي واذرف دموعي ..
أحاول قد ما أقدر اتناساها ..

لكن اللي معذبني ..
وحدة من خوّياتي ..
كل ما اتذكرها .. كيف كانت تصيح ..
وايدها ترتجف ..
وربي تدمع عيوني ..
وقسيت على نفسي ..
وقلت ما أبي ابكي ..

بس وربي إلى الحين وأنا قلبي يعورني..
بس ما أبي اذرف دموعي..

يوم شفت البنات..
وأنا مستندة على الجدار..
شفت صديقتي تناظرني..
وأنا الدمع بعيوني..
مافي لقا مثل لقانا بالمدرسة ..
صحيح وادري..
وناظرت فيني صديقتي ..
ولفيت وجهي والدمع بعيوني ..
وما لقيت إلاّ علبة الموية ..
شربت وصبرت ..
ما أبي اناظر بأحد يبكي..

بس اللي صدق اثّر فيني..
يوم ضمّتني صديقتي وبكت..
وقالتلي: والله بافقدك..
ما بكيت .. لكن بكى جوفي.. وما قدرت انطق..

بصراحة..
لأنه في بنات بينقلون .. واللي بيتزوجون .. واللي ما راح اقدر اشوفها ..

ومثل لقاءات المدرسة .. وربي ما فيه ..

وربي ماراح القى صديقات أحبهم ويحبوني مثلهم..
ومثل بنات المدرسة .. بس اش اسوي؟!
هذه حال الدنيا..
حتى تمنيت .. ارجع طفلة .. وما أعاني ..

وربي ما اقدر أكمّل..

وادري طوّلت عليكم..

بس ودي اعرف..
موقفي في ذيك اللحظة .. تؤيدونه .. ولاّ ترفضونه ..؟!
ودعائي على نفسي .. من حقّي ولاّ .. لا ..؟!

وشوقي لذاك الإجتماع ..
مين يقدر يمحيه من قلبي..؟!..

تحياتي لكم ..