عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم
كيفكم بنات اخباركم ان شاء الله طيبين
بنات انا دخلت المنتدى هذا لاني رأيت انه هو المكان المناسب لطرح مشكلتي
بتقولون الله وش كاتبه هذي كلامها كثير والحين العيد على ابواب وتبون تنبسطون صح بس مشكلت الكليه قربت ادري بس اقروا تكفووووووووون
انا الحين ان شاء الله السنه هذي راح تكون اول سنه لي بالكلية بس عندي مشكله كبيره يعلم الله اني عانيت مره
بقولكم قصتي من اول
انا لمن كنت بالثانوي ماكان عندي صديقات ابد الا صديقه وحده كانت معي باولى ثانوي وبعدين نقلت لمدرسه ثانيه
ولمن دخلت ثاني ثانوي ماعندي صديقات ابد تخيلو عشت الفتره هذي كلها من غير صديقه مدري ليه انا كذا مدري وشفيني معقوله كل هذا خجل حتى اني ما اقدر اكون صديقات ابد
المهم اني دخلت ثالث ثانوي وزادت مأساتي اكثر من اول شافوني البنات لحالي في الفصل قامو ونقلوني لاول درج لحالي ولا جنبي احد 
وانا ساكته ماقدر اقول شي اسمع البنات يسولفون ويضحكون وانا على الصامت المشكله كلهم جماعات ولا يبون احد معهم وانا طيبه بس ماتكلم كثير عشان كذا تجنبوني
ورحت كلمت الادارة ابيهم ينقلوني لفصل ثاني قلت يمكن اقدر اتعرف ع بنات ورفضو وقالو ممنوع منعا باتا ورحت للفصل وانا مكسورة الخاطر والي قاهرني شوي الا وبنت ناقله عندنا جت من الفصل الثاني وش معنى هي ولا عشاني انا ماقدر ادافع عن نفسيحتى لمن يدخلون الاستاذات يلاحظون علي اني وحيده ولحالي والاحظ بنظراتهم شفقه عليوربي كرهت المدرسه وقعدت ادعي ربي انه يرزقني بالصديقات
وبعد فترة جت بنت جديده للمدرسه وجت في فصلنا وتعرفت انا عليها وصرنا صديقات وانبسطت مررررررررررره
لاكن بعد مرور كذا 3 شهور تغيرت علي البنت هذي وقالت مابي امشي معك انا رحت البيت وانا ابكي على حالي
لـــــــــــــــــــيه وش سويت انا ليه كلن مايبيني
وصار مستواي الدراسي زفت مو زي اول حتى بالمشاركه استحي اشارك الا نادرا
حتى لو اني اعرف الاجابه ماقولها اذا كانت طويله
ودايما ساكته بالفصل
لدرجه ان بنت شافتني اول يوم بالدراسه وقالت تستهزى علي(( للحين هذي عايشه)) وقعدو البنات يضحكون
ومـــــــــرت الايام وخلصت الاختبارات واخذت شهادة الثانويه العامه بس كان نسبتي 86 اول كنت دايما اخذ 90 وفوق
ومن كرهي للمدرسه وخوفي من الي راح يصير معي مادخلت الكليه وقعدت سنه بالبيت ارتاح فيها
وهذا انا الحين سجلت بالكليه
الي ابيه منكم
الحين انا كيف بتعرف على بنات بالكليه وربي خايفه ماعرف احد بدخل اول يوم وبقعد ادور بالكليه مدري مع مين امشي ولا مع مين بقعد ياحسرتي على حالي ابي اتعرف على بنات كثيرررررررررررررررررر
ابي احس بالوناسه
على فكره انا مو خجوله مره يعني لمن اسافر عند اهل امي وعندهم بنات كثير ماشاء الله اصير جريئه لاني عايشه مع بنات بس لمن ارجع للرياض واصير لحالي يرجع لي الخجل وانا ماعندي اخوات انا لحالي
تكفوووووووووووووووووووون شوفو لي حل لمشكلتي تتوقعون وش الاسباب الي خلتني كذا والله اني اكتب وانا حزينه والدموع بعيني
الله يوفق كل من تساعدني ويسهل طريقها ويرزقها بالزوج الصالح ويوفقها بالكليه
قولوا آآآآآآآآآآآآآآآآآآآآآآآمين
((((من فرج كربة من كرب الدنيا فرج الله عنه كربة من كرب يوم القيامه))))
وارفعوا الموضوع رفع الله قدركم
