خبرة بمستشفيات جدة بالذات المركزالطبي الدولي: حملي العجيب… لا عالبال ولا عالخاطر

اهلين كروشات..
تقوموا بالسلامة يارب..انا والدة من شهر.. بالضبط 32 يوم وقلت احكيكم حكايتي العجيبة عشان تتسلو زي ماكنت اتسلى واقرا حكاياتكم .. مرات اخاف.. مرات اتشجع.. مرات اخد خبرة
بس لازم تعدو الاسماء اللي باللون الاحمر… لا تستغربوا.. شوية وراح تفهمو بس انتو كملو قراية..اتفقنا؟
بدأ المسلسل ليلة رمضان لما طلع تحليل الحمل موجب (سويته في بقشان عند دكتورة مصرية ماعرفها… اكيد بتقولو الجملة داخلة عرض بس حتعرفو ليش بعدين >>> مارتحت للمستشفى وماعجبني من يوم طبيته لله في لله)
الاكشن بدأ يوم واحد رمضان..استفراغ وغثيان ووحم على طووووووول..عشت أنا وابو الشباب ايام بدون اكل (لايروح بالكم بعيد ..ترى انا بس اللي بتوحم بس هوعشان مافي طبخ)
بدأت المتابعة في مستشفى بخش عند دكتورة سهير..اخلاق وحبوبة بس مو حابة المستشفى بس قلت اكمل عشانها قريبة سوو لي تحليل دم طلع الهيموجلوبين 4 ونص خافت الدكتورة وحولتني على رئيس القسم د.علي الجندي.. فعاد التحليل وطلع نفس الشي وكتبولي على ابر حديد في الوريد.. وصرنا اخر رمضان الناس في التراويح ولا يقضو للعيد واحنا في طوارئ بخش.. أسوأ طوارئ دخلتها في حياتي زحمة ومافي عناية وممرضات هنود مدري سريلانكيات شعور مزيتة ويالطيف فيها اشياء بيضا وأوساخ.. وروني الويل في ضرب الابر والله لايوريكم يدي من النفخات والكدمات والالوان اللي فيها ولما اقولهم بتألم يضحكو.
تاني يوم العيد ماقدرت اتحمل فصرخت على زوجي وهاتك يابكا ❗ واحنا خارجين من عندهم وحلفت يمين ماعاد اطب دي المستشفى فحجزلي في التخصصي عند د.عفاف توفيق.. عسولة وحبوبة وشطورة.. عادولي التحاليل طلعت تحاليل بخش غلط تخيلو ومارضي يصدقو انو في هيموجلوبين يوصل 4 ونص ويتعدل بسرعة حتى لو بكرتونين حديد! المهم راجعت عند د.عفاف 3 شهور يعني 3 زيارات وبعدها الدكتورة أخذت إجازة وضع 4 شهور (بس الان اعتقد رجعت).. كملت متابعة في المستشفى عند اللي يغطو بدالها اولهم هندية (د.نكحت وهي أسوأهم) والتانية د.عفاف فلمبان والتالتة د.هيفاء منصوري ابدا مارتحت ابدا ..ماكان فيه اهتمام بس يبغو يمشو الشغل بسرعة بسرعة مايطلو في نتايج التحاليل ولايسمعو للشكوى.. عملت عندهم الاشعة الرباعية وكانت حلوة وواضحة..
مع الدكتورة عفاف في آخر زيارة ماعرفت جنس الجنين مابان معاها وانا كنت في الرابع.. فبعدها باسبوعين رحت مستشفى فقيه عند البروفيسور عبدالرحيم روزي الساعة 3 الظهر والمستشفى فااااااااااضية عشان اشوف جنس الجنين وطلعت بنوتة 😆 يارب لك الحمد..
حجزت في المركز الطبي الدولي عند د.أسماء زين العابدين 31 مارس قبلها بستة اسابيع لان المواعيد فل.. رحتلها وارتحتلها بس كانت في مشكلة عويصة!! انها مأجزة من بكرة يعني واحد ابريل لمدة شهر “على قولها في هذاك الوقت”ابتدا الفار يلعب في عبي:(.. حدخل التاسع في نص ابريل واللي زاد الطين بلة انها قالتلي ان البيبي نازلة الحوض تمام واحتمال مادخل التاسع وقعدت ابكي وطمنتني انو لا اخاف ومن دا الكلام واعطتني رقم جوالها لو جاتني ولادة تجي المستشفى تولدني.. (وهي فعلا كانت تسويها بس بعد ابريل سابت المستشفى للأبد)
بعدها باسبوعين حجزت عند الدكتور فواز ادريس وكان كويس وشكله مررررررررررررة شاطر بس الولادات الطبيعية مو شكلها من اهتمامه لانه ماشاء الله متخصص في كذا شي (عقم وأطفال انابيب، تجميل وعلى ماعتقد حمل حرج) وكان وقتها مستعجل فزوجي قرر انو نغيره كدة من ربنا مع انه اعجب فيه مرة
بعدها باسبوع دخلت التاسع ورحت للدكتورة ألدز أفنديفا (تركية في نفس المستشفى) ياناس على النعومة وياناس عالحنية وعالطيبة اللي فيها.. (بس أخصائية مو استشارية) وقتها جاني اكتئاب (ركزو بس) ووساوس اني حتعب في الولادة وحشوف والويل وآخرها ادخل عملية.. وجلست ابكي في السيارة وزوجي يهدي عليا وخلاص اتفقنا وحجزنا عند د.خالد خداوردي 👿 بعد اسبوع من التاسع وسبحان الله ارتحناله مرة.. حبوب وأخلاق ومرة طيوب.. فحصني وقال الرحم مفتوح سنتي وطري والبيبي في الحوض واحتمال ولادة في خلال عشرة ايام بالكثير
طبعا من دخلت التاسع الحمد لله وانا ماخليت سوق الا مشيت فيه وسور الحوامل حفظته طوبة طوبة لان بدا الطفش معايا والاكتئاب خلاص ابغى اولد ومافي فايدة..وشربت زنجبيل وقرفة بالليترات برضو مافي فايدة
على آخر حملي اتنفخت مرة وعلي الضغط عندي شوية.. وكل مايشوفني احد يسالني لسة لسة لسة؟ وانا كان لسة على موعدي اكترمن اسبوع حتى الدكتور وهو باقيلي اسبوع قال :متى راح نولد؟ وزوجي يتريق علياوانو لازم اخد طلق صناعي ولا حولد بعد 5 سنين ولما نكون في السيارة يمر متعمد بالقوة على المطبات عشان اولد.. مرت الايام وانا فقدت الامل وقررت استسلم 😳
يوم الثلائاء طلعنا نتعشى برة مع اخو زوجي ومرته وانا وجهي مقلوب ➡ وبدأت عندي الام الساعة 12 الليل واستمرت ل8 الصباح وانا نمت بعدها من التعب.. صحيت الساعة 12 الظهر مافي الم نهائيا ورجعت نمت الساعة وحدة صحيت لاني حسيت شي حار نزل عليا >>>>> عليكم نور 😛 انفتح كيس الموية الامامي
واستنى للعصر ومافي الم وزوجي فرحااااااان 😆 🙂 انو الاكشن راح يبدا قاالي نروح مشوار وضحك عليا ووداني المستشفى.. استقبلتني د.أسماء جداوي طيبة كانت.. الرحم كان 1 سم والالام بسيطة استنو عليا للساعة 2 الليل وجاني دكتوري د.خالد خداوردي وركب لي تحميلة الطلق الصناعي وانا طلبت ابرة الظهر..ركبتلي هي دكتورة تخدير مصرية بس وياللعجب.. جهة اليمين اتخدرت وجهة اليسار لا وانا اشتكي ومحد يصدقني واحس بالام شديدة وطلق ومحد يصدقني
بدأ الشفت الجديد وجاتني د.هناء بدران عسووووولة مرة أخصائية وفحصتني الصباح الرحم كان مفتوح بس 3 سم وانا اتحطمت.. 3 الظهر كان بس 5 سم اتحطمت زيادة لاني بدأت افقد طاقتي.. لما اشتكيت من ابرة الظهر كان قرارها مع د.خالد بعد استشارتي انو يغيروها وانا وافقت.. سبحان الله ارتحت بعدها مرة من هم الفحص الداخلي بس الام الطلق مو مرة اختفت.. مع ان طلقي كان بارد يحمى لفترة وبعدين يبرد
9 الليل الرحم كان مفتوح 10 سم بس البيبي مانزلت تمام (جاية ووجهها على فوق) وبدأنا الدفع لحد 12 الليل تخيلو بس 3 ساعات وانا ادف مت تعب والدكتور تعب مرررررررررة .. والبيبي مابتنزل اخر شي قاللي ماقدامنا الا نجرب الشفاط او الملقاط لو مانفع قيصري ولا تحبي قيصري على طول قلت لا نجرب وجرب ومانفع ودخلت العملية وانا اصرخ من الالم وامي اللي كانت معايا زوجي ماقالها عشان لاتخاف.. حاولو يسووها بتخدير ابرة الظهر مانفع لاني حسيت بالمشرط وطبعا اخدت تخدير كامل واللي عملها د.خالد ومعاه د.إيهاب أبو مرار وتلت ساعة الا وافوق يقولولي اني جبت احلى بنوتة :(والحمد لله شفتها اول مرة 4 فجر الجمعة.. والجرح زي الفل بغراء جراحي لا خياطة ولا كبس والان تقريبا مو باين.
المركز الطبي الدولي من تجربتي مرة كويس سواء من الدكاترة او التمريض او الاقامة.. غرفة الولادة حلوة مرة شرحة وواسعة والممرضات حنونين.. زوجي اخذلي جناح في آي بي غرفة نوم وغرفة استقبال وحمامين وسرفيس صغير.. مرة رائع 5 نجوم والمنظر حلو والخدمة فندقية كل يوم سلة فواكه وبتيفور جديد وجرايد وورد..كل يوم يجهزولك موية حارة ومغلفات كابوتشينو وشاي بنكهات مختلفة ويانسون وبابونج.. الاكل تجيكي اخصائية التغذية وتخيرك من القوائم الموجودة بصراحة لذيذ..صابون الحمام والشاور جل والشامبو طقم ماركة عطور عالمية مو اي صابون
التمريض.. لكي ممرضتين خاصتين يسوولك كل شي ومرة ناعمات وانيقات حتى تغيير الفوطة وانت بكرامة (بس انا مارضيت) ويحمموك ويلبسوك لا وفيه تقييم للممرضات تعبيه وتجي تاخده رئيسة التمريض
تجيك اخصائية الرضاعة الطبيعية لو عندك اي استفسارات
رعاية البيبي ممتازة.. ينظفوه كويس ويلبسوه لبس نظيف ومحترم..ومستحيل يرضو يعطوه رضعة صناعية لازم طبيعي بس العيب اللي مسكته عليهم تغيير الحفاظة يتأخرو فيه حتى ان بنتي عمرها يومين والمنطقة حمرا زي الدم تبكي منها وكويس اني انتبهت وصرت انا اللي اغيرلها
قبل اخر يوم شلت قشي كله من المستشفى من زينة وعفش وحلا وقهوة وارسلته البيت ونزلت الدور الثاني واخدت غرفة عادية لاني مرة تعبت من الزيارات وماقلت لاحد انا فين..عشان ارتاح قبل لاروح البيت.. بصراحة كان كويس بس ابدا ابدا “لايقارن مع خدمة الاجنحة”…. وبس..يعني المنظر حلو على حديقة المستشفى..الغرفة بصراحة صغيرة..بس في اكبر منها بشوية مو مرة.. الحمام عادي.. ممرضة وحدة اقل اناقة وشوية هبلة.. الاكل كويس وتجيكي اخصائية التغذية بس نوعيته مو زي فوق اقل شوية.. الموية الحارة ومغلفات الكابوتشينو والشاي والجرايد موجودة بس لافواكه ولا بيتيفور.. بس في الاخر الخدمة برضو احسن من اي مستشفى تانية
وتوتة توتة خلصت الحدوتة.. ياللا عقبالكم تولدو بالسلامة وتطمنونا عليكم ➡
بس لحظة..عديتو الاسماء اللي باللون الاحمر؟ أمانة في وحدة منكم في حملها مرت على دا العدد من الدكاترة؟! ماعتقد J