دمياط … جاني أم مجني عليه ؟؟؟!!!!!

السلام عليكم :

كلنا عارفين دمياط فهي من أشهر محافظات مصر … و شهرتها راجعة إلى انها المحافظة الوحيده في مصر التي ليس بها عاطل وااااحد .. كل سكان المحافظة يعملون …فهي من أشهر مراكز صناعة الأثاث والحلويات في مصر على الأطلاق و الكل يعمل كبارا و صغارا فيما يشبه المعجزة ..

و مينائها ..ميناء دمياط من أهم مواني مصر .. و بالقرب منها مصيف راس البر الشهير …

و لكنها الآن هي بطلة قصة حزييينة للغاية تعيشها مصر ..:(

تبدأ القصة في عهد النظام السابق اللي خيراته الحقيقة مغرقانا مش عارفين نوديها فين … و من أهم خيراته طبعا بعد صفقه الغاز مع اسرائيل .. هي مصنع اجريوم للإسمده

المصنع ده رفضت دول كتير إقامته على أرضها خاصة أن له حادثة سابقة في الهند و اعتبرته الدول ملوث للبيئة و خطر على صحة السكان ..

و ده طبعا اترحب بيه في مصر و فين ..جنب دمياط عدل و اتوقعت العقود و اتبني المصنع الكندي على أرض مصرية !!!

طبعا لما بدأ الأهالي ياخدوا بالهم في 2008 حصلت مظاهرات قوية جدا لمده طويله اعلن خلالها النظام السابق عن غلق المصنع و تفضيله لمصلحة المواطنين .. يا سلاااام الدمعه حتفر من عيني يا ناس

طبعا كدب في كدب زي ما اتعودنا .. كل اللي عمله النظام المحترم انه غير اسم المصنع من أجريم ..لموبكو و بالعكس المصنع ضم أراضي جديده ليه .. يعني من الآخر المصنع توسع أكتر من الأول !!!!!!!!!!!!!!!!

بدأ الأهالي في دمياط يلاحظوا السمك بيموت و البلح يحترق فوق الأشجار و الامهات يشكون من اجهاضات و اجنه مشوهة و خوف من سرطانات ووووووو

فانتفض الأهالي في ثورة دمياط الثانية اليومين دول

بس المرة دي اغلقوا ميناء دمياط و راس البر و الطرق و ده من 10 ايام ..مع العلم ان الخسائر المباشرة فقط تصل ل 35 مليون جنية يوميا … يعني لحد دلوقتي اكتر من 350 مليون غير الخسائر غير المباشرة .. كارثة بكل المقاييس …

المجلس العسكر اصدر قرار بغلق المصنع و اهالي دمياط قالوا .. المؤمن لا يلدغ من جحر مرتين لازم المصنع ده يتهد خالص …

وزير الصناعة اكد ان لو ده حصل مصر حتدفع غرامات و شروط جزائية تقدر بمليارات .. زي الشروط بتاعت خط الغاز بالظبط …و مصر خزانتها لا تسمح لها بدفع أي حاجة اصلا … مش بقلك نظامنا السابق خيره مغرقنا ..

و اهالي دمياط مصممين على موقفهم …

الناس في مصر انقسمت فريقين

فريق مؤيد لاهالي دمياط لانهم يدافعون عن صحتهم و اراوحهم و يا روح ما بعدك روح

و فريق غير مؤيد يرى ان غلق الميناء يكلف مصر خسائر كبيرة و ان اهل دمياط لم يكونوا ليجرءوا على غلق الميناء في عهد حسني .. لان ابسط حاجة كان عمل فيهم زي ما عمل في المحلة في احتجاجات 6 ابريل و نزل عليهم بمدرعات الأمن علمهم الصح …

و بين الفريقين .. مصر …. بتخسر

بتخسر فلوسها و ولادها

و دمياط .. محدش قادر يقرر هي جاني و لا مجني عليه .. ظالم و لا مظلوم ..

😈 ➡ 😆 hy:

طب انتو رأيكم اية