((رب اني مظلومة فانتصر))

السلام عليكم ورحمة الله وبركاته ومرضاته

كيف حالكم أخواتي في الله
عندي مشكله وأبغى منكم تعطوني حل اذا تكرمتوا والله يشهد علي ماأقول الا الصدق ,,المهم أنا متزوجه ولي سلفه منكدة علي حياتي والله العظيم اني كافة شري وماأحب المشاكل ودايما تصير لي مواقف وأبلعها وأسكت وسلفتي هذي الله يهديها ويكفيني شرها متسلطه علي ومدري وش السبب تخيلوا يابنات انها ماتسلم علي وحتى بالمجالس الكبيرة تحقرني عند الحريم وماتقوم واذا مريت من عندها أسلم عليها وماتمد يدها بسرعه وانا اوقف شوي وان مدتها تضرب طرف اصابعي بس وانا مع ذلك مااحقرها عندأحد أسلم عليها وحتى بالاعياد ماتسلم المهم سكت وخليتها وصارت ماتاكل اي شي اطبخه ومره كنت مسويه حلا ونتقهوى وندور فيه وأخذت قطعه ورمتها على السفرة واذا طبخت عند خالتي(أم زوجي) ماتنزل تاكل ترفض وانا ماكأنها مخلوقه على الارض ماجيب سيرتها لابخير ولابشر وبعدين جاها فتره صارت ماتجلس بالمجلس اللي أنا فيه لكن بعدين انجبرت تجي بحكم كثرة اجتماعاتنا ..
ومرة كنا في استراحه وجت بنتها تلعب عندي وانا جالسه ويوم شافتها جت تركض واخذتها بسرعه من عندي مدري وش قصدها,,وتدرون زوجي وش يقول؟؟
يقول سلمي عليها وبوسي راسها واعتذري منها 😐 😛 👿
بصراحه انهبلت وزيادة كان يقولها لي وهو معصب ويصارخ كأني انا الغلطانه وقلت ان شاء الله وانا بقرارة نفسي مستحيل أسويها وأهين نفسي وكرامتي ,,وصرنا من مشكله لثانيه وكل المشاكل تطيح فوق راسي لانهم كلهم معها حتى زوجي وزوجها اتصل على زوجي وقال اذا جت زوجتك وتأسفت لها قدامهم وباست راسها يمكن مو أكيد انها ترضى عليها 😎 :(:( عاد انا يوم دريت قلت ماأقول الا حسبي الله ونعم الوكيل ,,لا وزيادة على كذا تختلق أكاذيب من عندها وتظلمني وهم يصدقونها وتشوهت صورتي قدامهم وانا قسم بالله الكل يشهد لي بطيبتي وسكوتي عن حقي وماعمري تمشكلت مع أحد ومالي أعداء الكل يحبني ويمدحني الا هي أول أعدائي ومن غير سبب مدري غايره ولا وش السبب وآخر مشكله سوتها لي أنا جايه من سفر طويل لي كم شهر ماشفتهم ووالله العظيم على كل ماجاني منها اني ماقلبي شي ولا دعيت عليها مع اني مظلومه واذا انقهرت منها قمت ادعي لها عشان ماأحقد عليها المهم توني جايه وهي دخلت ومن حسن حظها اني لحالي وانا متوقعه انها تسلم علي عقب السفر لكنها ناظرتني وطلعت من غير سلام أنا سكت وخليتها قلت بكيفها لكن هي ماخلتني بحالي وافترت كذبه من عندها وبعد ماجلست مع خالتي شوي رحت اسلم على اهلي وشوي الا يدق زوجي ومنفعل ويقول ليش ماسلمتي عليها يوم تجي تسلم عليك ليش صديتي 😛 😆 🙂 😉 قلت تكذب ماجت ولاشي وصارت مشكله وبعدها مشكله وأجبرني زوجي اسلم عليها واحتسبنها لله ثم رضا زوجي ,,
آآآآآسفه طولت بس حبيت تعرفوا التفاصيل وتعطوني حل جذري يخليها تتركني بحالي لان دايم تصير مشاكل بيني وزوجي بسببها ولا تقولون روحي كلميها اعرفها تمشي وتتركني اتكلم ابي حل ثاني لا تبخلون علي الله لايحرمكم الاجر وجزاكم الله كل خير…:(
والله اتمنى اني آخذ حقي منها وانه ينصرني عليها ويبين الحق..
انتظر ردودكم الله يوفقكم ويسهل دروبكم..آمين وصلى الله وسلم على نبينا محمد وعلى آله وصحبه أجمعين