عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم و رحمة الله و بركاته
أنا خلصت شهري التاسع و 10 أيام من العاشر و أنا بكرية و يمكن بتتذكرو أديه كنت خايفة و مستعجلة و تعبانة من التقل و الحمد لله ولدت و جيت بقصة ولادتي
أنا حسب حساب الدكتورة خلصت التاسع 2010/5/21
بيوم 2010/5/31 و طبعا بعد 10 أيام من العاشر هههههه ما حسيت بحركة الجنين و كنت خايفة و تعبانة كتير لإني لسه ما ولدت و كل اللي كانو معي ولدو و ارتاحو إلا أنا
كانت عندي امي و اتصلت بدكتورتي و قلتلها اني ما حسيت بحركة الجنين و اني من 10 ايام مخلصة التاسع و قالتلي بسرعة على المستشفى
اتصلت بزوجي و روح من الشغل و رحنا انا و زوجي و امي و حماتي على المستشفى
فحصوني و قالو في توسع من 2 سم إلى 3
بس ما في ألم و قررو إني أروح تاني يوم و أولد بطلق صناعي
و لما روحنا من المستشفى ما حبيت أركب سيارة خليتهم يروحوني مشي
و حسيت بشي نزل مني و لما روحت البيت كان دم
قالتلي امي يمكن يكون علامات ولادة و يمكن من الفحص
و خلينا بكرة على موعدنا من الصبح على المستشفى
و طبعا ما نمت بهديك الليلة من الخوف و الساعة 4 و نص الفجر حسيت بألم في ظهري و بطني كل خمس دقائق يروح و يجي و عرفت إنه ألم الطلق
و لبسنا و رحنا المستشفى 2010/6/1 وصلنا الساعة 7 و إيدي على قلبي من الخوف
المستشفى اللي رحناها ممنوع يدخل معي حدا بس لإنه أختي بتدرس دكتورة سمحولها تدخل معي و كانت معي لآخر لحظة من الولادة و ساعدتني بإني أتغلب على خوفي شوي الحمد لله
دخلوني أول شي غرفة استقبال الولادة و أنا أول ما دخلت و جلست على السرير كانت جنبي وحدة تانية بتتألم و تصرخ و أنا زاد خوفي و سرت أبكي مع بكاءها
كان الألم محتمل و دخلت عندي دكتورة و فحصتني و قالت 5 سم و بعدين قلتلها أرجع ألبس ؟ ضحكت و قالتلي هلأ ما في تلبسي خلص
و أعطوني إبرة قالو تخفف الألم مع إني حسيتها ما فادتني بشي
و تركوني و أنا أتحدث أنا و أختي و مش حاسة بألم
رجعو بعد شوي حطولي إبرة في يدي و خلوها و أنا أقول لأختي لشو يحطولي الغلوكوز المغذي مع إني إن شاء الله بولد طبيعي و مو محتاجة
و وحدة تانية جنبي تضحك و تقولي هذا الطلق الصناعي مو الغلوكوز بجد البكرية هبلة ههههههههههههه
و انا لما قالتلي الطلق الصناعي خفت بزيادة و قلت يا ريتني ما عرفت
بعد شوي بديت احس بألم اقوى و اجو فحصوني 6 سم و بعد ساعة 7 سم بعد شوي 9 سم
قالولي يلا على غرفة الولادة
و كنت متوجعة بس متحملة و دخلت غرفة الولادة و اشوف امي تبكي من خوفها علي و أنا أبكي معها بس ما سمحولها تدخل
و أنا اتألم و أقول للدكتورة يلا ولدوني و هي تقولي ما في يلا
لسه مش هلأ
و بعد شوي حسيت شي بدو يطلع و يقولولي ادفعي و ادفع
و تقولي الدكتورة يلا شعرها بين و أنا أقولها هذا ولد مش بنت هههههههه
و دفعت 3 مرات و طلع ابني الساعة 10 إلا ربع صباحا
و نسيت كل اللي أنا فيه و سرت أستنى اسمع صوته و هو مش راضي يبكي و ضربوه كتير لحتى بكى و سمعني صوته
و بعدين بدت معاناتي مع الخياطة طلبت يحطولي بنج و قالتل يالدكتورة إنه محطوط البنج بس انا ما حسيت اني مبنجة و حسيت بكل الخياطة و خلصت الحمد لله
و كان أحلى إحساس لما ضميته بحضني بعد كل هالتعب
كانت تجربة صعبة بس حلوة
و هلأ ألم الخياطة متعبني
و لكن الحمد لله لإني ولدت طبيعي و ما احتجت لعملية كنت كتير خايفة إني أحتاج لعملية عشان وزنه
و طبعا من يوم ما ولدت ما نمت بالليل و لا بالنهار
الله يهديه و ينيمني
ادعو لابني تشفى عيونه و ما يحتاج لعملية
ياااااااااااااااا رب
