رجعتلكن حبيباتي بقصة ولادتي..

حبيباتي يا أغلى الفراشات رجعت لكن بقصة ولادتي بولدي نظر عيني( سيف):)

والدكتورة حددت لي يوم 30/7/2009 بس بدا الطلق يوم 26 الصبح خفيف واستمر يوم 27 بالليل زاد وشفت وانتو بكرامة نزول دم خفيف فطول الليل اتألم بالتدريج لين إذان الفجر علا وارتفع (الله أكبر ) وبعدها بشوي زاد الألم رحت أتمشي بصالة لقتني أمي قالت ها ولادة قلتلها حاسة بألم في ظهري يزيد وشوي وإشوي لين الساعة 7 حسيت خلاص بموت ولكن كنت خايفة أروح المستشفى ويلعبوا بي فتحملت وظليتني أمشي وأمي والأهل يقولون لي بتروحين وأنا اقول لااااااااا لين الساعة 2 قلت لأمي مش قادرة خلاص ودوني بموت وكلمت زوجي كان يومها مش إمداوم وجا وطيارة على المستشفى وأول ما دخلت وفحص الممرضة قالت 3ونص قلت لها كل هالألم على 3 ونص ولادة وعطتني حقنة شرجية مع إني مابغيتها غصبتني وقالت نامي اركب عليج التخطيط ما رضيت عشان ألم ظهري كان إموتني والله كانت حبابة ماشاء الله ومتفاهمةقالت أنا اليوم بولدج شفتي للساعة 5 وقلت لها أوكي بتمشى وبرجع وأنا أتمشى وأتمشي لين الساعة 4 ونص وجيت نادتني ولما كشفت قالت 4 قلت لااااااا مستحيل هذي ثاني ولادة والمشكلة عندي التوسع بطيء قالت أساعدج بإبرة طلق ولا تحميلة طلق صناعي قلت لا أمشي قالت شفتي راح يخلص بوصي عليج قلت أوكي وظليت أتمشى للخمة ونصف ورجعت لقيت ممرضة حشاكم (……) أتصارخ ونيمتني بالغصب وركبت علي التخطيط وجلكوز وقالت اليوم لازم في ولادة وتهز براسها قلت يويلي من إسلوبها وإشوي جت وفجتحت كيس الماي وقامت الوالدة إتعصب عليها على هالحركة لأن التوسع كان 4 ونص والأفضل يكون فوق ال6 وقامت هي اتصارخ وتقول هذا شغلي من 20 سنة لأن أنا في ولدي الثاني فتحوا ماية الراس ومفتوح 3 وراس البيبي نزل واتحشر فيني وشفطوه فالوالدة كانت خايفة وقامت أمي الله يخليها ويحفظها زقرت ممرضة ثانية أردنية وحبابة وخلال هالفترة لغابت أمي كنت حاطة المستشفى على راسي من الألم وقامت اللي الله يجازيها أستغلت غياب أمي مع الممرضة الأردنية وحمت الطلق ولما يت الممرضة الأردنية وفحصت وأنا أصارخ 💡 وقالت ليش دفعتي البيبي راسه تحت والفتح 5 بس قلت أنا ما دفعت خلصوني أمي قالت عشان هالسبب أنا مش راضية بفتح ماية الراس لأن عندي راس البيبي يسبق الفتح وقامت الله يناولها اللي في بالها دخلتني غرفت الولادة وركبت علي الكمامة بمخدر زايد وأتحمي بطلق صناعي عشان التوسع يزيد وأنا كل ما أشيل الكمامة أحس روحي تطلع وترجع وأسمع صوت أمي من ورا الباب تبكي وتقرأ القران وأنا بالدعاء والزلزلة ولما وصل الفتح المطلوب قالت خلاص شيلي الكمامة وإبدأي بالدفع وأنا يالله ويالله أدفع وأدفع وأدفع ومافي شي راحة مع كمامة وأدفع وأدفع وإجيت الهندية وخايفة من اللي حصل تعتذر وكلمتها الأرنية تنادي للدكتورة إحتمال قيصرية أول ما دخلت الدكتورة قالت الأردنية أدفعي أخار محاولة والدكتورة تبكي وأمي أسمع صوتها وبكائها والممرضة قالت بسم الله آخر محاولة بكاء إبني حبيبي كان مع الله أكبر المغرب على الساعة 7 بالضبط حسيت إنه روحي طلعت بس مع طلعته نسيت كل شي وخذوه ونظفوه وأنا بديت أتخيطتني بتخدير موضعي خذت 15 غرزة عشان والحمد لله عدت وجت معاناتي بعد الولادة مانزل لي حليب الإ قطرات لا هذا ابني ولا الأولاني مع إني كنت أبكي أبغي أرضع بس للاسف وحتى الدكاترة قالوا أول مرة أنشوف وحدة تبكي عشان اترضع بس كنت اتمنى وجربت كل المحاولات دون جدوى حتى حبوب عطوني ما نفعت ماخليت كراوية حلبة حلاوة طحيني العلبة حق يومين ومافكرت بوزني اللي زايد للحين وأضطريت على الصناعي:P
وسبب تأخري إنحسد وهو في الشهر الثالث ووقع من السرير وضل كم شهرمايقدر يشرب حليب ..
وقلت لكن حبيباتي الدكتور اللي الله لايوفقه وفتح طبلة إذني بالتنظيف مع إنه هو اللي رقع الطبلة من قبل أمتعبة نفسيتي وايد وخاطري أحمل عشان ما شاء الله عليه الشهر بيكمل سنة ومش حابة أسوي فرق وايد بينه وبين حمل ثاني لان بينه وبين أخوه 6 سنين بس إذني إمعرقلة الموضوع الله يخليكن خواتي من تعرف دكتور شاطر بالسعودية بأي مكان جراح كبير أنف وأذن وحنجرة عشان يسوي لي العملية وأرتاح يرقع الطبلة الله يرضى عليكن ساعدوني..