رضــــــــــاك عني يــــــا أمــــــي

في الوقت الحالي ومع هالزمن المتغير تغيرت معاملت كثير من أولادنا وبناتنا لأمهاتهم وأبائهم.
وصار العقوق في أبسط معانيه يعتبر روتين لحياة بعض الأسر .. للأسف.
في هالموضوع رح نتكلم عن الام اللي كثير ينهضم حقها في البيت من قبل الاسره وصارت البنت تعق أمها بكثير أشياء ومن كثر ماتتعود على العقوق يصير شيء عادي عندها ولاكأنها مسويه شي وإذا سألتيها عن العقوق تقول العقوق هي إني اضرب أمي ولا أقولها أوف!! وأنا ما أسوي هالشيء.. يمكن نست أو تناست أن العقوق في كثير أشياء نسويها مع أمهاتنا وعلى بالنا انه شيء عادي وهو يدخل من ضمن العقوق .. فإذا كانت كلمة أوف البسيطة فيها عقوق فما بالك بالكلام والنظرة والأفعال وغيرها من الأشياء اللي تندرج تحت مفهوم العقوق.
ابسط شيء البنات هالايام تلاقين الوحدة في يدها هالبي بي تقولها أمها تعالي اقعدي معنا وتقهوي وخلي هاللي بيدك وتجي البنت تلاقينها قاعدة شكلا بس لكن عقلها مشغول مع البي بي تضحك مره وتزعل مره ولافكرت أنها تحترم أمها ولا أبوها وهي جالسه معاهم أو حتى مشاعرهم أنهم يشوفونها مالقتهم بال وجالسه بس عشان تسكتهم .
كلمات تقال للام
ماني فاضيه
أوف مابي أروح معك
أنا مشغولة
خليه وقت ثاني
يمه قولي للخدامه ترتب غرفتي
أنا بنوم لحد يزعجني
يمه لاتفشليني عند صديقاتي
يمه أكلك مايعجبني أبطلب من برا
يمه أنتي ماتعرفين الموضة
كلها من أنواع وصور العقوق وغيرها كثير

إذ حديتي النظر لأمك وأنتي غضبانة..
كم مره نظرت لأمي نظرة عدم الرضا أو ناظرتها بحده
تخيلو بنات النظرة للام إذا كانت عينك بعينها وأنتي تكلمينها وماكسرتي عينك ونزلتيها تحت أثناء حديثك معها “يعني اطلني النظر في عيونها” .. يعتبر من العقوق تخيلو!!!
إذا بغت منك أمك حاجه وسوفتي أو بررتي انك مشغولة أو اعتذرتي أو قلتي بعدين يمه ..هذا عقوق
إذا رحتي السوق مع أمك واختارت لك لبس عاجبها وقالت لك انه حلو لك ورديتي عليها وقلتي لايمه وش ذا الذوق ولا ذوقك يمه مايعجبني تراه هذا ..عقوق يابنات انتبهو الله يخليكم ترا كثير بنات تطلع عيون أمها في السوق وتخلي الأم قلبها يغلي من كثر الفرفره بالسوق …خليك راعية ذمه وخوف من الله في تعاملك مع امك
أظهري الاحترام لأمك
احترمي أمك في كل شيء لاتمشين قداماها خليك وراها أو جنبها وهي تمشي ودايم نشوف بناتنا الله يهديهم بالأسواق سابقه أمها ومفحطه عليها والأم ماتقدر تلحق بنتها
سلمي على أمك
إذا دخلتي عليها بالصالة أو غرفتها سلمي عليها وحبي رأسها وخذي يدها وحبيها وقوليلها ياربي لاتحرمني منك يايمه
إذا كنتي بعيده عن أمك أو متزوجة دقي عليها وطمنيها على حالك وقولي لها والله اشتقت لك يايمه
ساعدي أمك
ساعدي أمك من غير ماتطلب منك المساعده شفتيها بالمطبخ افزعي معها شفتيها طالعه من دورة المياه تبي منشفه أو مناديل وفريه لها من غير ماتقول
شفتيها تمشي حافية بالبيت جيبي لها شراب أو سليبراو شباشب وحطيه عند رجلها وخليها تلبسه
فيه أمثله مرره كثيرة للبر مالها نهاية كل وحده تعرف الطريقة المناسبة لبرها بأمها .
في كلامي مع أمي
لازم يكون كلامي مع أمي واضح وبصوت منخفض يعني اخفض من صوتها ولايعلى صوتي عليها ولا أقاطعها وهي تتكلم واسمعها لين تخلص من كلامها وبعدين اتكلم ..
كوني لبقه
خليك لبقه لأمك وتعرفين اللي تحبه وتحاولين تلبين طلباتها من غير ماتطلب يعني أمك مثلا إذا كانت تحب تقيل وقت الظهر بس حابه تقعد معاك هالوقت قومي وجيبي لها المخدة واللحاف وهيئي المكان وقولي يمه هذا وقت راحتك من غير ماتطلب منك يعني كوني لماحة للي تحب وطفي اللمبة وخليها تنام.
شفتي أمك ضايق خلقها في البيت وتبي احد يونسها اقعدي معها وونسيها وإذا ماعندك سالفة افتحي النت على سوالف الأولين واحكي لامك سوالفهم وأشعارهم صدقيني الأم تحب تسمع أخبار أيام أول وقصصهم..وإذا كانت أمك من النوع الحديث أيضا سايريها بالأشياء اللي تحب تسمعها واحكي لها .
خليك لبقه إذا شفتي معاها شيء شايلته او تبي معاونه افزعي ولاتنتظرين احد يساعدها ولا تنادين الخادمة لا أنتي أولا بالبر من الخادمة.
إذا اشتهت أمك شيء وأنتي عارفه وش تحب مثلا أكله معينه ولا صنف معين أو حتى كاس مويه خليك لماحه وجيبه لها من غير ماتطلب وكل وحده اعرف بأمها وذوق أمها .
احضني أمك وبوسيها
احضني أمك من غير مايكون فيه مناسبه بالعكس شعور مره يجنن بس يحتاج قوة في البداية للي ماتعودو
أول ماتصحين من النوم بوسي راسها وصباح الخير يمه
احضني أمك ٌ بعد ماترجعين من المدرسة أو الدوام أو زيارة لها بعد زواجك احضنيها وحبيها على رأسها ويدها وقولي لها يمه والله إني احبك واشتقت لك الله لايخلينا منك يالغاليه.
أشعريها بحبك لها واحترامك ايش بيضرك؟ غير زيادة حبها لك ودعواتها لك وتكونين باره فيها وتتسهل أمورك 0