زوجات مع وقف التنفيذ

امس فرغت نفسي من مشاغلي عشان اتصل بصديقاتي من زمان ما اتصلت فيهم واكتشفت شي اني انا

وصديقاتي كلنا زوجات مع وقف التنفيذ

ابدى بنفسي صار لي شهرين عند اهلي والسبب اني لما اكون البيت اول شي كني اخته والسبب الافلام الاباحيه وتليفوناته اللي ماتخلص ولما يخلص يتكلم مع العيال ويكلم الشغاله اكثر مني كأني ديكور وزياده عدد في البيت لا اقل ولا اكثر وما يذكر اني زوجته الا اذا احتاج فلوس او عنده ضغط مادي مع العلم اني ما اشتغل واللي قاهرني انه يجي في بيت اهلي يجلس معنا شوي واحيانا يجلس للعشا ويطلع.

صديقتي الاولى وأعز وحده بصديقاتي تزوجت قبل سنه وكانت الزوجة الثانية طالعه عند اهلها من 4 شهور اول شي اجبرها على ترك وظيفتها وصار يدور على المشاكل واخيرا قال لها مابغاك تجيبين عيال عشان عندي بنت واذا جت تتزوج اخاف يجون يسألون عن اصل اخوانها (هو قبيلي ) زعلت وطلعت يتصل عليها و يجي يزورها ويسأل عنها ويروح.

صديقتي الثانية طيبة بشكل ما تتخيلونه وخلوقه جدا لكنها سمينه مرة تزوجت مرتين وتطلقت وجاها واحد مطلق وعنده عيال ووافقت عشان تربي عياله لكنه رجع لزوجته وطلب تسكن في بيت اهلها وهو راح يلبي كل طلباتها ما عدا النوم معها .

صديقتي الثالثة جميلة بمعنى الكلمة واخلاقها عالية تزوجت من ثمان سنوات حملت ثلاث مرات لكن للأسف كل مرة يكون الحمل ضعيف و تسقط من الشهر الاول والمشكلة من زوجها ومو راضي يتعالج قالها روحي لبيت اهلك انا بجرب حظي مع وحده ثانية يمكن يجيني عيال.

صديقتي الرابعة تزوجت من ثلاث سنوات عندها بنت مشكلتها ما يصرف عليها وصرف على بنته بس يقول هذي بنتي بس انت عندك ابوك عايش وفلوسه مكدسه بالبنوك كل يوم والثاني جايه عند اهلها.

اما صديقتي الخامسة فهي قاعده تجهز لزواجها بعد شهرين وياعالم تكون مثلنا او احسن حظ

اتمنى اني ما اكون ثقلت عليكم