زوجي طاح من عيني … ولا أبي الطلاق …وش السوات

أنا متزوجة من حوالي الثلاث سنوات وزوجي له زوجة قبلي لكن مافيه أي مشاكل من ذا الناحية لأنها في مدينة وأنا في مدينة أخرى ..

في بداية الزواج الأمور كانت ماشية بشكل معقول وزوجي ملتزم مادياً بأغلب احتياجاتي المالية ومو مقصر من هالناحية .. يعني مابيننا مشاكل بخصوص الفلوس والمصاريف ..
وأنا موظفة ومتفقة مع زوجي قبل العقد أني أعيش بالمكان اللي يناسبني سواء في مدينتي أو في مدينته .. وهو أشترط علي أنه مادمت أنا مو في مدينته فماراح يجي عندي أكثر من ثلاثة أيام في الشهر .. وأنبسطت أنا على الشرط لأني ما أحب أحد يلزق فيني وأقابله طول الوقت ..
المهم .. في شهر رمضان صارت بيني وبين زوجي نقاشات حادة وحساسيات وكله بالجوال لأن ظروف سفري ماخلتني أشوفه في الإجازة وبعدين جت ظروف سفره هو لمكة ومو سبب المشاكل سفري ولكن أمور متعددة حصلت بيننا وأبتدى زوجي يدور ويلف معاي بالكلام مع كم كذبة مالها داعي خلته يطيح من عيني وماعاد لي خلق أشوفة ولا حتى أسمع صوته …
والحين لي ثلاثة أشهر ماشفته وهو يتصل فيني يبغى يجي عندي وجالس “يتشره” علي ويبيني أراضيه وهو اللي غلطان في حقي .. وفي أخر مكالمة بيننا اللي هي اليوم قالي أنه بيجي عندي يوم الإربعاء وقالي أيش رايك تبيني أجي ولا لا !!؟ قلتله “سو اللي يعجبك” … قالي ” إذا خلاص ماعاد تبيني قوليها لي بصراحة وانا ماراح أجي” .. قمت قلتله “والله شوف .. إذا بتجي الله يحيك وإذا بتروح الله يساعدك” …