سر الشاورما من مطبخي + كانيلوني الشاورما (بالصور)

شاورما الدجاج

كيلو بانيه + بصلتين كبار + فلفل رومي + ملح وتوابل وملعقة كركم

هانقطع البصل جوليان ونقطع الفلفل والبانيه نقطعه قطع صغيرة

أول حاجة وضعت البصل في كمية مناسبة من الزيت حوالي كده 4 ملاعق لحد ما يدبل بس مايتغيرش لونه زي ماهو موضح بالصورة

هانضيف الفلفل

وبعد نضع الفراخ وعليها التوابل اللي هي : ملح + فلفل اسود + ملعقة كركم وأنا من عشاق الكركم في الأكل وبيدي لون تحفة

ونسيبها الفراخ هاتنزل ميتها وتستوي فيها وتكوني النار وسط مش عالية أوي

نيجي بقى للسر وهو
ملعقى طحينة سائلة (بجد بتدي نكهة للشاورما كأنك شاريها من بره وبعدين هي مع السخونية بتسيح وتختلط بالشاورما والكل هايقلك طعمها حلو ومش هايعرف ايه السر )

هانحضر بقى بصل أخضر + طماطم مقطعة صغير (وده السر الثاني)

ده البصل الأخضر

ونضعهم على الشاورما ونقلب وخلي بالك تكوني طفيتي النار خلاص هي سرها ان البصل والطماطم يبقوا كده من غير تسوية (اوعي تنسي) دي أهم حاجة

وبعد كده نعمل حفرة في النص بالشكل ده

وده بقى السر الثالث وهو ان نضع فحمة ونضع عليها ملعقة شاي صغيرة سمنة بالشكل ده ونغطيها بسرعة

وبكده خصلت الشاورما

الكانيلوني
كوب دقيق + كوب لبن + عدد 2 بيضة + ملح وفلفل اسود وملعقة شاي صغيرة كركم
ده كده مقدار وممكن تزودي الكمية لو العدد اكبر انا عن نفسي عملت مقدارين

هانضع كل المقادير دي مع بعض في الخلاط بالشكل ده

نحضر طاسة تيفال بالحجم ده ونمسحها بمنديل مطبخ مبلل بالزيت

هاتاخدي كمية من الخليط قليلة جدا يعني ممكن تعايريها بفنجان قهوة للمبتدئات في الموضوع

و ده هايبقى شكل الكانيلوني

وبعد كده تحشيه الحشوة اللي تعجبك ممكن لحمة مفرومة أو انواع جبن زي مانتي عايزة
أنا هنا حشيته الشاورما اللي عملتها بيبقى طعمه جنااااان

ونلفها بالشكل ده

ونحضر بقى ملعقة صلصة بخففها بملعقتين لبن بالشكل ده

وندهن بيها وجه الكانيلوني ووضعت جبنة رومي مبشورة وجبنة موتزاريلا وبعد كده دخلتها الفرن

وده الشكل النهائي

وعملت جنبها مكرونة بصلصة وحطيت على وشها جبنه رومي ومتزاريلا

وسلطة بطاطس طعمها خطييييييييير
بطاطس مكعبات مسلوقة نصف سلقة عشان متتهريش وبنحط مع ماء السلق ملعقة زيت
وثوم مهروس وعصير ليمونة وشوية خل صغيرة أوي وملح وكمون
وبقدونس مفروم ونقلبهم مع بعض
وهاتبقى بالشكل ده

أخيراً خلصت 😆