شايله هم اختي وخايفه عليها انصحوني

السلام عليكم
تكفون ساعدوني وانصحوني وربي نفسيتي تعبانه وخايفه على اختي وما اقدر افكر
انا امي وابوي توفوا ( الله يرحمهم )و عمر اختي 11سنه توفت امي بعد فتره قصيره توفى ابوي واختي تعبت نفسيتها لانها كانت اصغر وحده وكانوا مدلعينها وافتقدتهم كثير وعاشت عند اخوي ونفس شي تعبت من زوجة اخوي وكانت تغار منها وكل واحد من اخواني يقول للثاني خلها عندك لانا زوجاتهم ما يبونها والله العظيم انها عانت كثير وكم مره فكرت تنتحر عشان ترتاح الحين صار عمرها 19 سنه وتحب ولد عمي وولد عمي يحبها ويموت فيها بس المصيبه امه مو راضيه وما تبي اختي زوجه لولدها وهو حاول بس مو راضيه تقتنع الحين صار له سنه وهو يقنع فيها ما اقتنعت واختي ما شاء الله يجيها خطاب كثير وترفضهم عشان تبي ولد عمي وودها تتزوج اليوم قبل بكره عشان ترتاح
انا زوجي خوفني قالي خوفي بكره تندم اختك على الي تسويه حرام ترفض الخطاب من غير سبب وبكره ما احد يجي يخطبها ( زوجي ما يدري انا اختي تحب ولد عمي )
اخر واحد خطبها اخو زوجي وهو ماشاء الله عليه ولد ما عليه كلام كل بنت تتمناه حتى ولد عمي زين وما عليه كلام وانا محتاره اخاف انها ترفضه وتنتظر ولد عمي وامه ما توافق لانها قالت طول ما انا عايشه مستحيل تتزوجها اذا مت تزوجها ( يعني ما في امل انها توافق ) وانا ودي انها ترتاح من مذله اخواني وزوجاتهم وتستقر في بيتها مع زوجها وخايفه انها تتزوجه وهي تحب ولد عمي وهو يحبها ونفسه فيها
انا كلمتها قالت لي مو قادره افكر تعبت من التفكير وتعبت من العيشه مع اخواني اخاف اني اتزوج واضلم نفسي واضلمه معاي وانا ودي في ولد عمي واحبه وما اتخيل نفسي مع رجال غيره واخاف انتظر ولد عمي وامه ما تبيني وقالت لي انتي وش رايك ساعدني والله ما عرفت وش اقول لها
انتوا وش رايكم ساعدوني وانصحوني تنتظر ولد عمي ولا تتزوج وربي انا حالها مايسر عدوا وتكسر الخاطر انا حاولت انها تعيش معاي وزوجي موافق بس هي رافضه تقول اذا اخواني ما تحملوني الغريب بيتحملني والحين جايه العطله ويبدأ هواش اخواني كل واحد يقول للثاني خلها عندك بسافر ويتهاوشون هذا حالنا في كل عطله (الي يشوفهم وهم يتهاوشون يقول ما كانها اختهم حسبي الله على زوجاتهم الضالمين)
انا ودي انها تتزوج وترتاح قبل العطله واطمئن عليها
موقادره افكر ساعدوني وش اسوي محتاره