عالم البنات النسائي كل ما يخص المرأة العربية من ازياء وجمال والحياة الزوجية والمطبخ
شفتك ولا ظنيت بهواك
من تأليف: موق العين
في احلى صيف واحلى اجازة هالسنه.. وبعد اسبوعين في احلى مكان في صلاله.. انتهت رحله عايله المرحوم حمد سالم الدرمكي وهم في طريجهم لدار الزين الي تولهوا عليها موت .. وفي هالرحله الكل ساير من هالعايله الي تتكون من..
ام عمر..
عمر الابن الاكبر (24 سنه)..
نورة (19 سنه)…
فيصل (17سنه )…
سعيد (12 سنه)…
وهاجر (9 سنين )…
هالا فراد 6 مع البشكاره والدريول.. قضوا رحله ولا اروع في صلاله.. لكن عمر من بعد اسبوع من هالاجازة الدوام اتصلوا فيه وطلبوا منه انه يداوم.. وقرر ترك اهله في صلاله على انهم بيتبعونه عقب اسبوع ومعاهم فيصل والدرويل وهو متطمن انه ان شاء الله ما بيصيبهم شر…
ربع ساعه تفصلهم من مركز جوازات الامارات وعمان..
ام عمر : فيصل.. امي قصر على هالرادو صمخنا بعدين خلاص وصلنا عن الحشره خلنا انطالع جوازاتنا وين..
فيصل : انشالله امايه.. بس اقولج ترا من الحين انا هب نازل صوب المركز عسب الجوازات والله مافيني عليهم تدرين كيف احيانا يتليعنون في هالسوالف..
ام عمر : شو؟؟ اذا انته ما بتنزل منو بينزل.. ليكون تباني انا والا الدريول يحول ويعطيهم الجوازات؟
فيصل : امي مافيني يسدني في السيره انا الي نزلت ولعوزوني تأمين ومادري شو مافيني بعدين انا مصدع من الدرب ..
نورة: ماشالله على الريال الي مخلنه عمر ويانا ما يدري بك جي واللا قص رقبتك..
سعيد: عادي امايه انا بنزل..
ام عمر: فديتك انا انته الريال الي فيهم ..
فيصل ساكت متجاهل كلامهم ويبتسم من غير ماحد يشوفه …
نورة : خلاص امايه انا بنزل مب مشكله الا يوم انه بيختمون هالجوازات مب شغلانه هيه..
ام عمر : انزين اندوج هالجوازات وتاكدي من عددهم ..
وصلوا لمركز جوازات عمان.. ونزلت نورة ومعاها الجوازات وكل شي عدى على خير.. ومشوا شوي ووصلوا مركز جوازات الامارت..
نزلت نورة ومعاها الجوازات.. وصوب الشباك الي بتعطي فيه الجوازات ..
نورة: السلام عليكم …
الريال (الموظف) : وعليكم السلام .. الحمدلله على السلامه ..
نورة: الله يسلمك .. تفضل اخوي الجوازات …
الموظف : اوكي .. زقر الريال بالاسامي وطلب انهم يفجون الدرايش عسب يتاكد من الجوازات والاشخاص انهم نفس الي في الصورة ..
زقرهم واحد واحد واخر جواز كان جواز نورة .. يوم زقر اسمها ردت عليه وقالت له انها هيه .. نورة طبعا كانت متغشيه..
الموظف: خلاص اختي .. اتفضلي .. بالسلامه انشالله …
نورة ارتاحت انه ماطلب منها تكشف عن ويهها.. ما مداها اتمد يدها وتاخذ الجوازات الي وايي صوت من داخل المكتب…
الموظف (خالد): هادف وين الله يهداك انته ما تاكدت انها نفسها هيه راعيه الجواز.. يابوك مافينا على المشاكل انته تدري شو صار الشهر الي طاف..
هادف (الموظف الي خذ الجوازات عن نورة): خلاص يا خالد انشالله مافي شي بعدين انا تاكدت من كل الافراد الي في السياره ما اظن بتيي عندها وبتكون وحده ثانيه..
خالد: لا دخيل والديك انته تدري شي جواسيس وايد هني عادي يخبرون عليك..
نورة كل هذا وهيه ساكته ومرتكبه مب عارفه شو تسوي وقافطه في نفس الوقت …
هادف : اسمحي لي اختي بس هالقوانين ما باليد حيله ممكن تكشفين شوي عن ويهج بس عشان نشوف تطابق الصورة..
نورة بخجل: انشالله.. رفعت الغشا شوي عن ويهها وهادف حاول انه ما يشوفها بس يسوي هالحركه عشان لو كان في حد يراقب يوهم هم انه شافها.. لكن من رفعت نورة الغشا ماقدر هادف يسوي الي هو مخطط له غصب عنه عينه علقت فيها.. اسمها نورة ويهها كله نور… سبحان الله…
نورة ما انتبهت على الموظف هادف انه طالعها بهالنظره لانها رفعت الغشوة شوي وردت اتغشت بها.. لكن صورتها تمت في ذهن هادف…
نورة: خلاص اخوي اقدر اروح…
هادف : ها ؟؟ هيه اتفضلي اختي الجوازات .. درب السلامه انشالله
نورة : الله يسلمك .. ركبت نورة السيارة ولا على بالها شي … وعطت الجوازات حق اخوها فيصل ..
ام عمر: ها يابنتي خلاص .. يعني ماحد بيوقفنا الحين ..
نورة : لا امايه خلاص اللحين مرة بنسير صوب بيتنا ..
هاجر: الحمدلله .. وناسه ..
دولي ( البشكاره) : ماما كلاص اللحينه في روح بيت ؟
ام عمر: هيه بتسيرين وبتلاقين خويتج الحين ترقبج ..
نورة: حليلها دولي .. ههههههههههههههههههه
في مركز جوازات الامارات.. هادف يتبع بنظره سياره قوم نوره الي ما ختفت عن نظره بسبب الزحمه… وهو في باله يقول (كيف ربي صورها بهالصورة)؟ سبحان الله ما يصعب عليه شي..
في السيارة..
فيصل : ايه عبد الغفور بلاك جي مهور شو ليكون تبا ترقد طالع عدل جدامك مافينا ..
عبد الغفور (الدريول ) : زين زين بابا بس انته سوف في زحمه زياده وساحنات سو سوي انا ..
ام عمر: ياحظي شو بعد شو تسوي انته .. طالع عدل والا حول من السياره ما نباك اتموتنا ..
عبد الغفور : زين زين ماما انا يسوف خلاص انسالله ما في سي ..
هادف ظهر من المكتب وتجدم شوي جدام يتبع بنظره السياره وين تسير.. وهو 100 شي وشي في خاطره… وسرح هادف في عالم مجهول ما يعرف شو هو والا حتى شو نهايته.. فجأه انتبه لتجمع الناس وصوت صدمه قويه.. ما لقى نفسه الا انه ركض صوب المكان الي ماكان بعيد عنه وايد…
هادف : خير شو صار وسعوا شوي
(……..) : لاحول الله .. ياخوي هالسياره مادري بلاه سايقها ماشاف هالشاحنه جدامه الا وصار تحتها…
هادف : شو؟ وخر شوي.. شاف هادف انه السياره هيه سياره هل نورة.. الي بعده ما تهنى بتفكيره لها… وماصدق عمره.. الا وهو يزاعج وخروا شوي وحد ايي يساعدني انحاول انظهر الي داخل السياره وحد منكم يتصل بالشرطه والاسعاف بسرعه…
هادف ما لقى عمره غير انه قدر يوصل لباب الدرويل ومع عده محاولات قدر يبطل الباب مع مساعده بعض الشباب وياه..
هادف : هذا الدريول ظهر اسحبوه شوي شوي ليكون فيه شي متعور.. هادف من ناحيه وبعض الشباب من الصوب الثاني من السياره.. يحاولون يبطلون البيبان.. الحمدلله انه السياره ما كانت وايد منفعصه وداشه تحت الشاحنه..
واحد من الشباب : ياخوك اسمع صوت وحده تصيح وتنوح لحقوا علي اهني في الباب الوراني ..
هادف ركض بسرعه من سمع الريال يطري انه وحده تصيح.. وبعد محاولات قدر هادف يكسر جامه الباب الوراني بعد ما تاكد انه مافي حد تحت الجامه مباشره لانه كلهم فوق بعض.. وبطل الباب من الداخل
هادف : تعال هني ياخوي.. قدرت ابطل الباب.. وسحب هادف اول شخض بيده وظهرت بنيه.. الي هيه نورة الي شافها جدامه وهو مب مصدق هيه كيف تصيح وتنوح من الالم.. طلعها وحطها على صوب والشباب يحاولون ويا الباجي.. لين ما وصلت الشرطه والاسعاف الا والشباب ظهروا كل الي في السياره.. وتقريبا الكل مغمى عليه الا نورة الي تصيح ومب مستعوبه الي صار.. الاسعاف نقلت كل المصابين والشرطه تشوف مكان الحادث ويكملون اجراءاتهم..
هادف : خلاص يا ختي انشالله مافي الا الخير والحمدلله على جي اهدي انتي بس واذكري ربج ..
نورة وايدها على ويهها وطبعا شيلتها في صوب ماتردي وين وهيه في اصعب حاله تصيح وبصوت متقطع : ما ما ما ماقدر.. ابا اشوف امي وخواني شو صار لهم ليش كلهم صاخين..
هادف : يابنت الحلال من اثر الصدمه بس انشالله كلهم بخير .. وقومي الحين بنسير المستشفى الاسعاف بتتحرك الحين ..
وياخذ هادف نورة ويمسكها لين ماوصلوا صوب الشرطه ..
نورة وقفت فجأه ماطاعت تتحرك .. هادف حس ليش ما تبا تتحرك.. هادف ابتسم بهدوء وعق سفرته من على راسه وغطا بها راس نورة الي كانت مستحيه تسير جي رغم حالتها جدام هالجموع كلها..
هادف يكلم الشرطه : مرحبا اخوي خلاص اروم اسير صوب المستشفى الي نقلوا فيها المتضررين؟
الشرطي : هيه بس هذي مب وياهم في الحادث ؟؟ ليش ما ركبت وياهم
هادف: لانها الوحيده الي في وعيها .
الشرطي : انته تقرب لها ؟؟
هادف وعلى عجل رد : الشيخ انا من اهلهم ..
استغربت نورة رغم بكائها من كلام هادف .. بس ماعلقت ولا قالت شي
الشرطي : بطاقتك لو سمحت ..
هادف : اتفضل ..
الشرطي : هادف منصور محمد الدرمكي .. والعايله الي مسويه الحادث بعد من قوم الدرمكي ..
هادف : هيه نعم .. اقدر اسير ؟؟
الشرطي : توكل اخوي
نورة كل هذا مب مستوعبه ولكنها فهمت لما قال انه من اهلهم لانه درمكي مثلهم.. ركبت نورة السياره مع هادف وهيه تصيح وبعض ونات من الالم..
هادف : اختي هدي نفسج انشالله مافي الا الخير ..
نورة :……………………..
هادف .: انشالله مافي اصابات بس ..
نورة وهيه تصيح وتتألم : جتفي يعورني .. وريلي احس بها فيها ضربات ماروم امشي بها وايد ..
هادف : يالله انا كيف ما انتبهت انج متعورة ومن متى وانتي تمشين ؟؟ يالله انا آسف اسمحيلي والله ما انتبهت من الحشره والعفسه ..
نورة : لا ماعليك اخوي .. وهيه تبا تكمل كلامها وتشكره مالقت نفسها الا وهيه رقدت من غير ما تحس ..
هادف خاف انها سكتت مرة وحده والتفت يشوفها لقاها طايحه على السيت الوراني راقده من التعب والدموع على خدها.. ابتسم وكمل طريجه صوب المستشفى..
من دون اي احساس من نورة .. وصلوا المستشفى ونقلوها صوب الحوادث وعالجوها وهيه ماتدري..
هادف ما خلاهم بروحهم سار وسال عليهم واحد واحد واتطمن على حالتهم والكل معطينه مهدي ومنوم عشان يترتاحون.. هادف محتار كيف يوصل لحد من اهلهم عشان يخبرونهم.. وفي داخله احساس انه هو حاليا تحمل مسؤولية هالعايله الي ماعندهم حد وصله الدم والجبيله دافع قوي يخليه يساعدهم من بعد الدافع الانساني ودافع تفكيره الي ما ابتعد عن نورة…
الجزء الثاني
تم هادف روحه في المستشفى ساير راد بين الدكاتره يتخبر عن حاله كل واحد فيهم وماقصر في أي شي طلب لهم رعايه مكثفه وغرف مريحه وكل شي من انواع الراحه حاول انه يوفره لهم..
هادف : ها يا دكتور خبرني شو الحال عليهم ..
الدكتور : والله يا ابني الحمدلله انه اصاباتهم مش خطيره اوي يعني اقوى اصابه في حالاتهم كلهم كسر في ايد الولد الكبير الي اسمه فيصل والباقي كلهم كدمات بس..
هادف: الحمدلله يادكتور الله يبشرك بالخير .. والام شو اخبارها
الدكتور: لا ماتخافش كويسه وشوي رضوض بس لكن هيه عشان عندها السكر احنا بنراعيها اكتر..
هادف : ماتقصر يادكتور..
تم هادف يتريا في غرفه الانتظار لين ما أي حد منهم ينتبه عشان يتخبره كيف يوصل لحد من هلهم… وتذكر هادف انه ظهر من الدوام جي من غير ما يبلغ حد وقرر انه يتصل بربيعه خالد الي معاه في الدوام..
هادف: الوو مرحبا خالد..
خالد: مرحبتين وينك انته شو شردك من الدوام؟؟
هادف: هههههه خس الله بليسك ضحكتني شو بيشردني انا؟ كل السالفه اظني شفت الحادث الي استوا جدام المركز وانا كنت هناك وساعدت هالناس والحين انا في المسشتفى..
خالد : اهاااااا انزين قول جي الحين المدير احتشر عليك لانه ماحد مناوب اليوم ..
هادف : لاحول الله ياخي قوله استوا حادث وحد من الاهل عشان جي
خالد : خيبه ليش جي تفاول على هلك .. خلاص انزين بخبره
هادف : ما تقصر ياخالد (وفي نفسه يقول والله انهم شرات هلي واكثر)
وشوي الا وغفت عين هادف من التعب مع انه الوقت مب متاخر وايد لكن الحادث هلك الجميع..
ما مدا هادف يرتاح الا ويشوف وحده جدامه تهز جتفه وتصيح.. فتح عينه لقى انها نورة.. هيه نفسها جدامه بدموعها بلبس المستشفى وشعرها مرفوع شوي مع خصل تنزل على عينها.. مب مصدق الي يشوفها ويهها الملاك الي شافه منور الحين فيه لزق وكمادات تخفي اثار الجروح..
هادف مب مستوعب الي يصير..
نورة وهيه تشهق من الصياح وتهز جتفه : قولي شو صار على هلي ؟؟ شو صار لا تخبي علي شي .. دخيلك .
هادف ابتسم لها ابتسامه هاديه : يابنت الحلال اذكري ربج واستهدي بالله هلج كلهم بخير ومافيهم الا العافيه صدقيني.. مافيهم أي شي بس كلهم الحين معطينهم منوم عشان يرتاحون واذا مب مصدقه بخليج توايقين من الباب عشان ترتاحين..
ابتسمت نورة وحست بالرضا من كلامه.. واتطمن قلبها: هيه الله يخليك بوايق عليهم ولا بصيح صدقني …
قام هادف ويودها وقبل لا يتحركون بشوي طالعها بابتسامه واشر لها بعيونه صوب راسها وهو يبتسم..
استحت نورة وحست انه يقصد تحط شي على راسها..
هادف : الحين ما عندي سفره عشان اعطيج اياها.. يالله سيري حطي شي على راسج المستشفى ممزورة عرب..
سارت نورة بخطوات ثجيله فيها تعب .. وحطت شي على راسها وظهرت..
هادف يطالعها وهيه يايه ومستغرب .. يوم وصلت صوبه
هادف وهو يضحك : ههههههههههه يعني بعد السفره؟
نورة بخجل وتعب : شو اسوي مالقيت شي غيره..
هادف : ماعليه هذي شيله نوع يديد بتطريز احمر ..
نورة من غير احساس ضحكت على كلامه .. وكملوا طريجهم ..
هادف ساعتها مافي في تفكيره شي غير انه مستهم كيف يتصرف مع هالعايله الي مالقى لهم حد من اهلهم لين الحين ..
ونورة تمشي وكل همها تشوف اهلها ومافكرت في أي شي يتعلق في هادف غير انها في النهايه بتعرف كيف تـشكره على نخوته وياهم ..
طافت نورة على غرف اخوانها وامها حتى الدريول والبشكاره .. واتطمنت وارتاح قلبها..
هادف : نورة بسألج .. ترا لازم ابلغ حد من هلج عن الحادث عسب اييونكم مب زين جي ماحد يدري ..
نورة شهقت : اووه نسيت اخوي عمر فديت قلبه والله تلقاه مستهم الحين ما يعرف شو الحال علينا وليش بطينا.. دخيلك عطني اكلمه ..
هادف : انشالله .. وعطاها التلفون واتصلت به نورة وهيه كلها لهفه وخوف ..
عمر وقتها كان ويا ربعه وشاف الرقم غريب .. وتردد انه يرد .. لكن قلبه نغزه ورد ..
عمر : الوو
نورة وهيه اتدمع : عمر فديتك انا نورة اختك ..
عمر وهو منصدم : بلاج ليش اتصيحين ومن وين متصله ..
وقتها نش عمر من مكانه عشان يعرف يرمس ..
نورة : انا ارمسك من مستشفى توام صار علينا حادث قرب مركز الجوازات
عمر : شوووووووو ؟ وليش ماحد خبرني .. طمنيني عسى ما صار شي ؟؟
نورة : لا الحمدلله كلنا بخير مافينا الا العافيه بس معطينهم منوم عشان يرتاحون تعال لنا الله يخليك محتايينك والله
وبدت تصيح نورة وهادف مب عارف شو يقول .. لين ما سكرت نورة عن اخوها الي قالها انه بييهم الحين ..
نورة : مشكور اخوي هادف ماقصرت والله .. واعذرني الحين حتى لو بغيت اشكرك ما بقدر اوفيك حقك لانك تعرف الحال كيف..
هادف وقلبه يعورة عليهم: لا افا عليج لا تقولين جي هذا واجبي وانشالله باجر بالكثير بتظهرون صوب بيتكم وماعليكم شر.. وانا الحين بيلس هني اتريا اخوج وانتي سيري ارتاحي ويوم بيي انا بدليه على غرفكم ..
نورة : ماعليك قصور الشيخ ..
وسارت نورة غرفتها وهيه بحال احسن من قبل بوايد لانها ارتاحت واتطمنت على اهلها واخوها بييهم..
يلس هادف في الانتظار على انه يتريا اخوها ايي.. وشاف هادف في تلفونه الرقم الي اتصلت به نورة نفسه على تلفونه يتصل به فعرف انه اخوها..
هادف : الو مرحبا
عمر: مرحبتين منو الريال ؟؟
هادف : ياخوي انا هادف الدرمكي الي كنت موجود في وقت حادث اهلك ..
عمر : اهااااا مرحبا والله اخوي .. بس بغيت اعرف وين مكان الاهل لاني واصل المستشفى ..
وصف هادف المكان لعمر ووصل المكان الي في اهله.. قام هادف وسلم على عمر وخبره عن الحادث وعرفه على نفسه اكثر.. وقتها تفكير عمر مشتت مب عارف حتى يشكر الريال.. دخل عمر على اهله وشافهم بس الحمدلله انهم كانوا بخير هاللي صبر عمر وغير كلام الدكاتره الي كله يتطمن..
عمر: اقول اخوي هادف وين اختي توها من ساعه هيه الي متصله فيني
هادف : هيه هذي حجرتها ادخل عليها
دخل عمر وشاف اخته منسدحه على الشبريه.. يا ولوى عليها وهني قامت نورة وتمت تصيح في حظن اخوها وهو ما قدر ايوود عمره ودموعه نزلت.. وتم يهديها لين ما سكتوا وهدوا ..
عمر : فديتج والله نواري اهدي الحمدلله ما صار شي …
نورة : الحمدلله ياعمر والله ماتدري كيف كنت في رعب لانه انا الوحيده الي كنت بوعيي وقت الحادث لولا هالريال الطيب مادري كيف كنت بتبهدل..
عمر : ماقصر الريال ماشالله عليه ولد عرب ماعليه قصور.. على العموم انا سالت الدكاتره قالوا بالباجر انشالله بتظهرون ماعدا فيصل لانه شوي الكسر يحتاج له وقت بس ما بيطول بعد..
نورة : انشالله.. سير انزين انته الحين ارتاح في البيت وتعال لنا باجر الصيح وخلي الريال يحليله ايسير تراه من متى ويانا احيده قبل داخل المكتب في مركز الجوازات ..
عمر : انشالله ارتاحي انتي بس ..
نورة ما حست بعمرها وهيه تحاتي هادف جدام اخوها لكن عمر ماحط شي في باله غير انها تعرف انه ريال خدمهم وما قصر فيهم..
الجزء الثالث
ظهر عمر من عند نورة وسار عقب ما ارتاح واتطمن على اهله ولقى هادف بعده موجود برا يتريا.. ابستم عمر ابتسامه هاديه لهادف وسار ويلس عنده
عمر: اسمحلي اخوي تراني والله كنت متدوده ومب عارف راسي من ريولي ومامداني اشكرك …
هادف : لا افا عليك ياخوي هذا واجب .. وهالشي لو ما انا سويته كان غيري بيسويه ..
عمر : ماتقصر طال عمرك انشالله نرد لك اياها في الافراح ..
وتم هادف يخبر عمر السالفه وتعارفوا على بعض اكثر وخذ عمر رقم هادف عشان يشكره بالمعنى الصح عقب ما يظهرون من الي هم فيه..
عمر: على العموم اشكرك مرة ثانيه واللحين سير ارتاح البيت ادري بك انك تعبان.. ما قصرت
هادف : العفو طال عمرك .. لكن بعده بتم هني يمكن تحتاي شي واللا مساعده ..
عمر : لا مشكور الغالي انا بروحي بسير مادام اني اتطمنت عليهم وماعليهم شر وترا باجر بييهم الصبح على حسب كلام الدكتور بيظهرون ..
هادف : على خير انشالله .. وان بغيت أي شي حاظرين ..
عمر : ما عليك قصور .. الله يحفظك … طلع هادف وعقبه لحقه عمر وسار البيت…
بالباجر الصبح سار عمر المستشفى ولقى انه امه وخوانه الحمدلله بخير ونشوا من عقب تاثير المخدر.. دخل عمر على حجره امه ولقاها منسدحه يا ولوا عليها وحبها على راسها..
ام عمر: فديتك ولديه شحالك ؟؟ ربك بخير .
عمر : انا بخير يعلج الخير الغاليه . الحمدلله على السلامه .. تستاهلون السلامه
ام عمر : الله يسلمك من الشر … ها شو الحال على خوانك انا الدكتور طمني عليهم بس بعدني اتروع الي يقول جي عسب يصبرني ..
عمر : لا امايه الحمدلله ما حد عليه شر .. والله اني متلوم اني خليتكم ويا هالدرويل الخديه ..
ام عمر : لافديتك ترا مقدر ومكتوب.. الحمدلله على كل حال .. توها نورة كانت معاي وتخبرني عن الريال هادف والله انه نشمي ماقصر ويانا ..
عمر : هيه ياامي لاقيته البارحه والله انه مخاوي شما..
ودخلت نورة عليهم الحجره..
نورة: هلا عمر شحالك ..
عمر : بخير يسرج حالي هاشو صحتج اليوم .؟؟
نورة : الحمدلله احسن بوايد .. ها شو كنتوا تقولون ؟؟
ام عمر: ماشي اخبره عن الريال الي البارحه ويانا .. عاد لازم نعزمه ذيج العزيمه السنعه من نظهر بالسلامه ..
عمر : اكيد امايه ما يبالها كلام … انا بسير الحين صوب الدكتور عشان ايظهركم ..
وسار عمر صوب الدكتور ولقى هادف واقف ويا الدكتور يتخبرهم عن حالهم ..
عمر: مرحبا هادف شحالك ..
هادف : بخير ربي يعافيك ها شو صحة الاهل
عمر : بخير كلهم بعافيه .. ماشالله اشوفك هني والله انك راعيها وتعبناك ويانا ..
هادف : لا افا عليك لا تقول جي .. توني اتخبر الدكتور يقول ترومون اتظهرونهم بس فيصل الي بيبطي شوي
عمر : هيه ترا عشان الكسر عيل يوم انه جي بسير اخبر الاهل عشان انظهرهم ..
هادف : وانا بسير صوب الدرويل والبشكاره بشلهم وبلقاك برا عند الباركنات …
عمر : ما تقصر اخوي .. وانا بسير صوب الاهل وبخطف صوب فيصل ..
سار هادف وخلص اجراءات الدريول والبشكاره عشان يظهرون .. وهو مستانس يحس انه يسوي شي من خاطره ..
عمر: ها امايه خلاص ؟؟
ام عمر: هيه يالله .. لكن فيصل وينه ما اشوفه ..
عمر : فيصل بعده ما بيظهرونه الحين ..
ام عمر: ياويلي على ولديه شو بلاه ليكون في شي وداسين عني ..
نورة : لا امايه فديتج مافيه شي اللا شوي كسر في ايده عسب جي يباله وقت ويا الجبس ما بيبطي اللا هو اسبوع ..
ام عمر: لا لا لا اتودوني صوبه بشوفه .. ببرد فوادي ..
عمر: خلاص صار .. ياللا انسير له ..
دخلت ام عمر وهيه ملهوفه على ولدها .. تلوي عليه وتحبه ..
فيصل : أي أي أي امايه فديتج شوي شوي علي يديه تعورني ..
ام عمر: فديتك والله شي يعورك ؟؟
فيصل : ههههههههههه تراني اقولج يديه تعورني ..
ام عمر : ماعليك شر يا ولدي انشالله بتقوم بخير .. وانا بخطف عليك كل يوم لا تحاتي ..
فيصل : ماعليج قصور يا موزة بنت سعيد .. راعيتها ..
وتموا شوي يضحكون عشان يغيرون الجو … وقطع كلامهم عمر: اوو انا نسيت الريال برا ويا الدريول والبشكاره حليله ..
ام عمر : ليش هو هني ؟؟
عمر : هيه من الصبح هني يالله لا نبطي على الريال فضيحه فيه ..
وظهروا عمر وام عمر ونورة وسعيد وهاجر وركبوا سيارتهم.. وقبل لا يتحركون ام عمر سالت نورة وينه الريال واشرت نورة على هادف..
نزلت ام عمر صوبه هادف وعمر ..
هادف من شافها يايه جداه اتجدم صوبها لانه ما يباها تمشي وايد …
ام عمر : مرحبا ولديه .. شحال وشحال هلك …
هادف : بخير عموه تستاهلون السلامه ..
ام عمر : الله يسلمك ويحفظك من الشر … ومشكور ما تقصر والله انك راعيها .. .
هادف : افا عليج امايه هذا الواجب..
سارت ام عمر وركبت السياره وتخبر نورة عن هادف وكيف لاقاها.. وتمت تشكر فيه طبعا عمر يمشي جدام وهادف وراه مع البشكاره والدريول..
وصلوا البيت.. والكل نزل.. وام عمر وصت ولدها انه ما يخلي هادف يروح لازم يقرب..
عقب ما الكل دخل البيت .. تم هادف وعمر برا
عمر : اقرب هادف وين ساير ؟
هادف : اسمحلي والله بس ماروم انشالله مرة ثانيه..
عمر : افا ما يصير … الوالده حالفه علي انك لازم تقرب ..
هادف : اليايات اكثر انشالله بس انا من البارحه ظاهر من الدوام من غير ما اخذ اذن ولازم اسير ..
عمر : مادام جي السالفه ما نروم انقول شي .. مرخوص لكن حط في بالك انه لازم بنشوفك انشالله ..
هادف : على خير انشالله .. وداعه الله ..
عقب عناء هالرحله والحادث الكل سار حجرته ورقد لين وقت الغدا …
نورة تمت تحمد ربها وصلت ركعتين شكر لربها انه ما صار لهم شي.. بس ما يا شي في تفكيرها من صوب هادف غير انها حست ان الدنيا بخير وان في ناس بهالطيبه ..
وقت الغدا الكل نش وتيمعوا كالعاده ماعدا هالمره فيصل لانه في المستشفى ..
ام عمر: فديتك يا فصول مرة من اتغدى واصلي العصر بسير صوبه ..
عمر: وين تبين الله يهداج انا مخبر ربعه اكيد بيسيرون صوبه وغير جي عيال عمومتيه بييون صوبكم ايسلمون عليكم ..
ام عمر: والله اني ما استحي من ربعه الا هم شرات عيالي.. بس صدقت العرب اليوم بيون صوبنا ما يستوي, عيل تدري نورة تسير صوب اخوها وتشوفه شو يبا ..
عمر : امايه شو اقصد انا من الصبح ؟؟ تراني اقول ربعه هناك وين تبين نورة تضرب بالويه وتسير ؟؟
نورة : يالله انته بعد تراهم الا اصغر عني وغير جي تراني متغشيه والاهم انه شي ستاره بيني وبينهم.. فيصل فديته بطالعه شو يبا وشو يبا من ملابس ما يستوي انا وامك ما انسير له..
عمر : على هواكم بس ما اوصيج تراني بسير وياج وبيلس وياكم عقب بخليج بخلص سالفه السيارة وبرد لج عقب ..
نورة : على خير انشالله ..
سارت نورة صوب حجرتها بتقيل شوي.. وتوقف جدام المنظرة وتشوف ويهها الي فيه شوي تعوريات من الحادث وتحسس الجروح وتقول في خاطرها الحمدلله اني ما تشوهت وايد ولا صار بي شي.. حاولت تخفي هالجروح بشوي من الكريمات مع شوي تعديلات ترد ويهها الصافي مثل ما كان.. طلعت نورة الي الكل يعرفها بجاملها بس مع شوي ارق وتعب في وييها..
العصر.. نورة وعمر ساروا صوب فيصل الي ماكان حد عنده وشوي وترخص عمر بيخلص شغله وبيردلهم عقب ..
فيصل : نورة اقولج ازقري لي حد من الممرضين تراني ابا اسبح ما اروم اتم جي
نورة : والله انته بعد سالفه اصبر يومين وبيظهرونك وبنسبحك ..
فيصل : يعععع شو يومين .. انا جي مب طايق عمري بعدين وين تبين اتسبحيني انتي والا امي ؟؟ يالله ازقري لي حد منهم..
نورة : على هواك ..
سارت نورة وزقرت له ممرض عشان يسبحه .. وهم في الحمام طبعا سبحه ببطئ عشان ما يتعور ..
في هاللحظات نورة يالسه اترتب ملابس فيصل في الكبت .. وشوي اللي حد يدق الباب ويدخل..
هادف : السلام عليكم ..
نورة وهيه منصدمه : وعليكم السلام .. مرحبا اتفضل اخوي ..
هادف : السموحه الشيخه ماكنت ادري انه فيصل هب هني ..
نورة : لا هو هني بس الممرض يسبحه الحين .. اقرب الحين بيظهر ..
سارت نورة الصوب الثاني من الغرفه اتييب الحلاوة.. وفي نفسها حست بخجل انها ما شكرته على الي سواه وياها هيه بالذات.. ابتسمت بهدوء بعد ما تذكرت كل هالمواقف .. نورة بطبعها عاقله وهاديه وحبوبه ..وهادف ما يقل عنها عقل وجمال وهيبه.. ظهرت نورة ومعاها سله الحلاوة.
نورة : اتفضل اخوي ..
هادف : مشكور اختي ما تقصرين .
نورة : لو في حد لازم يشكر اكيد بكون انا وهلي.. انته ما قصرت ويانا وبالذات انا لاني وايد كنت تعبانه.. مشكور ويعلنا نخدمك في الافراح انشالله..
هادف وقتها حس بقلبه ينقبض لما تذكر حالتها كيف كانت وحس براحه اكثر انه هو الي ساعدها مب حد ثاني.. ابتسم لها هادف وكان يحاول انه عينه ما اتيي صوبها لكن غصب عنه..
سارت نورة الصوب الثاني من الغرفه وطلهت وفي ايدها كيس.. سارت صوب هادف وعطته اياه ..
نورة : اتفضل اخوي … هذي لك انته .. وابتسمت له ..
هادف كل هذا مستغرب شو ها.. وخذه من ايدها وهيه بعدها واقفه اول ما شاف شو داخل الكيس ضحك بصوت مسموع.. ولا اراديا شم الكيس كانه ما شم ريحه دخون والا عطر من قبل تدرون ليش؟؟.. في هالكيس نورة شلت سفرة هادف الي كانت مغطيه بها راسها وقت الحادث وغسلتها وعطرتها ودخنتها.. وردتها له..
نورة مب مستوعبه الي سواه هادف معقوله هالكثر الدخون عيبه ؟؟ والا شو بالضبط ؟..
هادف انتبه لعمره لكن بعد شو..
هادف : ليش الله يهديج رديتها خليها انا مب ساءل عنها …. فدوة عن راسج ..
نورة بمستحى : تسلم اخوي بس هذي لك انته .. ومالي حايه بها .. خلها عندك بتستفيد منها اكثر مني..
سارت نورة وخلته يالس روحه يفكر في كل الي استوا.. وهيه تفكر في الي هو سواه.. هادف كان وده ياخذ الكيس ويحظنه.. ويتنصخ من الدخون الي فيه..
قطع كل هالتفكير صوت فيصل عقب ما ظهر متسبح ويا سلم على هادف وهو ما يعرف منو ها..
فيصل : مرحبا اخوي اتفضل استريح ..
هادف : زاد فضلك والحمدلله على السلامه ..
فيصل : الله يسلمك انشالله …
هادف عرف بعمره لفيصل ووايد ماشالله اندمجوا في السوالف كانهم ربع من زمان مع فارق العمر لانه هادف عمره (25) وشوي ودخل عمر واكتملت السوالف ومع ربع فيصل وانقضى اليوم..
مضت الايام وظهر فيصل من المستشفى وطول هالفتره هادف ما انقطع في اتصالاته مع عمر وفيصل يتخبر عن احوالهم بس ماكانوا يلتقون في بعض وايد بسبب ظروف الشغل..
هادف يوم ورا يوم يتاكد انه هو يحب نورة.. حبها تغلل داخله من غير ما يدري اصلا هو اول ما شافها انبهر بها.. والي خلاه يحبها اكثر اهلها.. ناس ما عليهم قصور.. طيبتهم كل شي فيهم خلاه يحبها.. في داخله خوف من انه نورة ما تكون تبادله هالشي..
هادف في نفسه: (ياربي لا لي ربيع اشكي له همي ولا حد يشور علي.. انا والله احبها فديت ياربي ذيج السفره الي لامست شعرها.. فديت ريحتها الي فيها.. اااااااه حرام اني ما ايي صوب السفره لين ما ايي اليوم الي تناظر فيه عيني نورة) ومسك السفره وشمها.. وهو يهمس بهالكلمات.. حبها ورد حطها داخل الكيس.. ودخلها في الكبت عشان ما اتطير ريحتها.. بالرغم من انه هادف شكله انسان جدي لكنه راعي سوالف وحساس واحاسيسه راقيه احترام الناس له خلا له هيبه.. وقلبه كبيييير ولو في يوم حب وعشق انسانه يخلص له لو بتفكيره..
الجزء الرابع
نورة كانت وايد اتفكر في هادف بس من ناحيه النخوة والشهامه ما فكرت في نظراته ولا أي شي ثاني لانها ما حطت في بالها أي شي من هالناحيه.. اعتبرت الموضوع عادي لانها مهما فكرت ما في شي تروم توصله من خلال تفكيرها..
عقب الحادث بشهر..
ام عمر : عمر .. ياولديه وين هاك الريال الي شسمه … (وترص على عيونها تبا تذكره ) عوذ بالله من بليس شسمه ؟؟
عمر : هههههههههههههه بعدج رصي بعد على عمرج بتظهرين الاسم .. هيه هيه ياللا صح صح قولي ..
ام عمر : عنااللا تك .. ادري به انه ما خاز عنكم بعيد درمكي شراتكم بس ماذكر اسمه ..
ويدخل عليهم فيصل ..
فيصل : ها شعندج الظاهريه الا جنه مب عايبنج الدرمكي ..
ام عمر : حشا انته من وين ظهرت لي جي .. ما قلنا شي شبلاك بتاكلني ..
فيصل : فديييت امايه انا تعالي بحبج عخشمج فديته مااطوله .. شيوخي
ام عمر: هب هباك الرب .. بتدقنيه بعين غيران انته انه خشمك هب شراتي … لكن خلها في فوادك ..
فيصل وعمر يضحكون على امهم .. ويرد عمر ويرمس: يالله يا امايه قطعيتنا نحن الحين كل هذا عشان تتخبرين عن الريال.. بقولج اسمه.. اسمه هادف الدرمكي ..
ام عمر: هيييييه صح ذكرته .. اللا وينه ما ايي صوبكم ولا شفتوه ..
عمر : ما تنلاقينا وياه من اسبوعين لكنه يتصل بنا ونتصل به بين فتره وفتره
ام عمر: عيل خلاص يوم انه باجر الخميس قوله غداه عندنا وان ما يا يمين الله لزعل عليه ..
فيصل : تراني اغار وماعندنا حريم يعازمن رياييل ..
ام عمر: قم انته قم من جدامي لا فرك بكرتون الكلينكس ..
نورة : خيبه خيبه شو صاير .. بلاها عيوزنا معصبه ..
ام عمر : لا بالله انتوا شي بلاكم اليوم حد يقولي عيوز وحد هب عايبنه اني ظاهريه والا خشمي طويل شو سالفتكم والله لشل عمري وسير عند امي ابرك..
عمر : ههههههههههههه وين تبين عند يدوه .. يلسي عايبتنا فديت برقعج انا ..
ام عمر : هيه جي اباك .. ياللا اتصلوا بالريال خله ايي ..
عمر : انشالله الغاليه ..
نورة فهمت انه قصدهم على هادف.. حست بفرحه انهم بيردون له جميله ولو كان بهالشي البسيط وحست براحه انه بيدخل بيتهم وبيكون وياهم ولو انها ما بتشوفه.. حست انها تبا تسوي كل شي مميز ذاك اليوم من غير ما تحط في بالها سبب محدد تتجاهل فرحتها وتتجاهل كل شي يعنيه لانها تعده شرات اخوها وهاالي مبين وياها..
نش عمر عن هله وسار بيتصل في هادف ..
عمر: السلام عليك يالقاطع ..
هادف : هلااااااااا وعليك السلام مرحبا والله
عمر : شحالك عساك بخير ؟
هادف: بخير يسرك حالي انته شحالك وشحال عربانك ..
عمر: بخير يسرك الحال ولا يضرك ..
هادف : دوم انشالله السموحه منك عاد والله مب بيدي ياخوي تعرف شغل المركز ليل نهار زحمه السموحه منك والله ادري من صوبي القصور..
عمر: لا مسموح طال عمرك الا تولهنا عليك.. وقلت عاد باجر اتيي صوبنا غداك عندنا.. واقولك من الحين تراها العيوز موصتني.. وان ما يييت بتسوي ذبحه في بيتنا..
هادف : خيبه خيبه خيبه لا انشالله لا ذبحه ولا شي هههههههه ماتهون علينا ام عمر الغاليه تزعل ..
عمر : احم احم .. لاحظ انك يالس تتغزل في عيوزي ..
هادف : ههههههههههه الله يخليلك اياها تراها امي انا بعد شو بلاك انته جي طماع. وسير قول لها اني باجر ياينكم انشالله وما بردكم في عزيمتكم اصلا لو انته ما اتصلت بي جان انا عفدت عليكم من غير ما حد يقوللي..
عمر : حياك الله في أي وقت .. ونترياك انشالله باجر ..
هادف : الله يحيك .. خلاص انشالله باجر لقانا ..
سكر عمر عن هادف وسار داخل البيت .. وقال لهله انه هادف بييهم على الغدا..
ام عمر : يا حياه الله.. يالله امي نورة قومي طالعي الميلس مرتبه والا لا .. هذا فصول ويا ربعه مبهدلين لي المكان مب جنه ميلس عرب ..
نوره : والله لو هو هني مادري شو بيسوي بج الحين.. هههههههههههه خلاص انا بشوف الميلس وبخطف على الطباخ اخبره انه باجر بيتغدنا عندنا الريال عسب ما يفشلنا جدامه ..
ام عمر : لا لا لا مرة مسامحه من تعديل الطباخ انا بروحي بسوي له الغدا.. عيب هذا خاطر عندنا وماندري بها الطباخ ترا الا احيانا يخورها..
نورة وهيه تنغز امها بضحك: يالله يالله شو هالمعزة كلها حق هادف.. مااشوفج اهتميتي بحد هالكثر.. ها امايه شو السالفه ليكون حاطه عينج عليه من عقب المرحوم؟
ام عمر وهيه مبققه عيونها: عنا اللاتج.. امف عليج والله ياني اروغج بقب الحين اشوفج قمتي انتي تخورينها ماالوم فصول وانا اقول عليج العاقله.. فديتج هذا شرات ولديه مابيي اخر عمري احط عيني عليه ولا على 10 غيره من عقب ابوج الغالي ما حد يحل محله ..
نورة : فدييييييييتج امايه والله اسولف عليج عاد ما خليتي شي ما قلتيه.. السموحه منج الغاليه ..بس ابا اغيظ بج شوي عشان عقبها تضحكين ..
ام عمر : انزين مسموحه بنتي ادري بج .. هب شرات هالرغدي فصول بس بعد فديته ..
وتنش نورة عن امها وهيه تضحك وشوي تبعد وتسير صوب الممر والا وهيه تزاعج ..
نورة : اماااااااااااااااااااااايه ..
ام عمر : ها خير شو صاار ؟؟
اتمنى اشوف ردودكم الحلوه ياترى اكملها ولالا (للامانه القصه للكاتبه موق العين )ياليت تعجبكم
