شلون أصيد (أبو الشباب)

1- لازم أفتش بوكه كل ما يطيح بيدي .
2- لازم أشوف نكه بالبلوتوث في تلفونه .
3- لازم اشيك على السجل مال تلفونه وحارمته من تلفونات عديمة السجل وطبعا غير نوكيا ( ناهيييه ) يعني لا.
4- لازم أشيك على ملابسه خاصه في منطقة الرقبه لأنها أكثر منطقة يوسخها الكريم اساس .
5- لازم أغافله وهو مبطل الماسنجر ، أول ما يقوم عنه أدخل وأفعل طلب تسجيل كل المحادثات وأشيك عليهم من فترة لي فترة وطبعا خااااااشتهم في ملف مدعوووووس .
6- لازم آخذ الرقم السري مال خطه الفيفا عشان أشوف برنت حق مكالماته من النت وهو (( يا غافلين لكم الله )) بس ماهو كاسر خاطري لأنه بو سوالف .
7- لازم ألقالي عذر أدخل فيه سيارته من غير علمه وطبعا أحوس ما أخلي تحت الكشن ، كل الأدراج والدبه ودرج النظارة وهلم جرااا.
8- لازم أشيك على كل كرت تعبئة وفاتورة مكالمات لأنها يمكن لشركة غير شركة اتصالاته أو رقم غير رقم تلفونه.
9- لازم أشيك على الأوراق الخفيفة إلي لونهم أصفر او وردي لأنها في الغالب أوراق لخطوط جديدة.
10-لازم أشيك على مسجات تلفونه وإذا دقيت ولقيت إنتظار مطول ، أشيك عقب على الجهاز وهل آنا موجوده في السجل ولا لأ؟ لأن احتمال حاط خطه في جهاز ثاني .
11-لازم أحاول أحول تلفونه فيطلع إذا كان في رقم كان أصلا محول عليه الجهاز من زمان ولا لأ.
12-لازم أرجع من بيت أهلي بدون إنذار سابق عشان أطيح عليه وأباغته.
13-لازم أطل عليه لما أروح السوق وأدخل محل وهو يوقف بره خصوصا أيام الزحمة والأعياد ، ويخليني أدخل وبعذر الزحمة يوقف ، إذا لقيته ماسك تلفونه من غير اتصال يعني بس : بلوتوثات:(
14-لازم ما أخليه يحلق وأنا بروح بيت أهلي في العطلة لأن هذا يستفزني ( مجابلني طول الأسبوع مثل القرد كله شعر وإذا رحت حلق !!!! )
15-لازم أشيك على جواز سفره من الأختام والتواريخ (مرة طحت عليه الحبيب من السعودية رايح البحرين مو معلم ).
16-لازم لازم لازم بحطله جهاز تسجيل أقطه في سيارته أو في السرير وأروح بيت أهلي وعقب أسمع .
أبييييه أنا أكيد انجنيت والله حاسه نفسي مريظة .
لازم أشغل نفسي بشي ثاني غير زوجي ، أحيك مثلا

يا ريت تعطونا تجاربكم انتو بعد ولا تبخلون علينا.
مشكوريييين ولكم مني ألف بوسة وبوسه ، ولا عزاء لزوجي 😛