شوفو قصتي

مراحب يابنات اخباركم
يمكن ان اغلبكم يعرف قصتي من خلال ردي على المواضيع
لكن ماتعرفونها بالتفصيل انا بنت وحيدة اهلي ماعندهم غيري من البنات
عندي اخوان شباب وكل واحد عايش حياته مع زوجته وعياله ومحد يدري عن احد
انا كبرت وتعديت سن الزواج عمري محد خطبني او طق بابنا او احد جاء وقال هالبيت فيه
بنت وبنشوفها ونخطبها امي وابوي متوفين عايشه لحالي الخوف يلعب بقلبي لعب
ولاعندي جيران ولا صديقات اتسلى معهم كل صديقاتي تزوجو ولهم حياتهم ويخافون على رجالهم
وصديقتي الوحيده لعبو ناس عليها قالو تراها حاطه عينها على زوجك وتبيه
قامت اتصلت علي ومسحت فيني البلاط وانقطعت علاقتنا الله لايسامح من دخل بيني وبينها
اخوي يوم راح يخطب اهل زوجته اشترطو عليه بيت وقالو حط اختك في بيت لحالها
مهي اول ولا اخر وحده تعيش بروحها
احداث كثيره تصير وصايره معي وكل حدث امر من الثاني
مايعلم بحالي غير الله لو طاح شي او سمعت صوت خفت قلت حرامي
اواحد مايخاف الله طاب علي والله طول ليلي سهرانه وماانام الا بالنهار اخاف
انام بالليل لحالي
انا مسحوره عن الزواج والادهى والامر سحري قديم وماينفك واهلي مو مصدقين هالشي
يقولون خرافات انتي مافيك الا العافيه بس هذا وسواس
وشلون وسواس وانا متأكده شايفه الحرمه بعيني وهي تكب السحر علي
تقولون وسواس؟؟؟؟؟؟
شوفو الاهانات اللي تجيني من اخواني وحريمهم وعيالهم
اللي يقول لي علامات الكبر طلعت وبانت عليك
وولد اخوي بزر عمره احدعشر سنه جاي يقول لي
كل البنات اعرسو الا انتي ياعمتي عنستي
بنت اخوي تقولي انظميتي لقافلة العوانس ياعمتي
وينت اخوي الثانيه يوم تمكيجت قالت يالله شفتو عمتي كنها ام عشرين
ردت اختها قالت ايه تتزين على بالها توها صغيره
بالذمه هذا كلام يقولونه بنات لعمتهم؟؟؟؟؟
وغير اخوي دايم يهزئني ويقولي بناتي يجيهم خطابين وانتي لا
بناتي بيعرسون وانتي لين الحين قاعده
ويوم سئلنا صار كذاب محد خاطب بنته بس كذا يبي يهيني
يعني اخوي يتصرف معي بهالشكل وش خلا للغرب
طيب هذي كتبت ربي الله كذا كاتب لي والخير في مااختاره الله
انا وش بيديني وش اسوي اروح احرج على عمري اقول احد يخطبني
تصدقون هذا عقوبه من الله انا لي بنت عم كبرت ولاتزوجت
وابوي الله يرحمه كان دائما يهزئها بعمرها
يقولها يالعانس ترى وقفتي عن العيال معاد فيك عيال
محد يبيك طايحه بكبد اخوانك
ويهزء اخوانها اختكم قاعده في وجيهكم اختكم طايحه بكبودكم
محد يبيها لا احد ماخذها
وشوفو الله كتب اني اجلس مثلها
ربي قال ان بنتك تقعد مثل بنت اخوك
شوفي انسحرت وجلست مثلها
وربي فيني حرقه بقلبي وقهر ونااااااااااار شابه
مايعلمها الاالله
احيانا ادخل قسم العرايس واشارك واعشم نفسي واتخيل حالي عروس
واجهز عمري واشارك مع العرايس واحيانا احتقر نفسي اقول مادامك عارفه
انك مرح تتزوجين ليش تزاحمين العرايس بمواضيعهم وحياتهم؟؟؟؟
الزواج مو كل شي بالدنيا بس الوحده محتاجه ونيس يملى عليها الدنيا
حس في البيت احد ياكل معها ويشرب معها ويرد الصوت عليها
احد يحسسها بالامان والاطمئنان
انخطبت العام الماضي وهذا الوحيد اللي تقدم لي بحياتي واخواني عشان يزوجوني لعبو علي
يوم سئلتهم عن اصله ومن اي قبيله ضحكو علي والفو قبيله من عندهم
قمت ودخلت النت وبحثت عن اصل هالعائله ابشركم طلع مب سعودي اصل
سعودي بالتجنيس واصله يفشل بعد من دوله الله يستر علينا وعلى اهلها
مابي اذكر اسماء عشان لايصير مشاكل
حسيت اني حمل ثقيل على اخواني اخواني يلعبون علي بس عشان يفتكون من مسئوليتي
يزوجوني واحد ماله اصل ويضحكون علي ويقولون مارح تعر ف وش اصله انا واثقه فيهم
وهم يخدعوني ليه ماقالو لي الحقيقه انصدمت فيهم صدمت عمري انا اختهم الوحيده وكذا تصرفهم معي مدري لو عندهم غيري وش سوو
سامحوني يابنات طولت عليكم وغثيتكم بس ابي افضفض لاحد ابي احد يسمعني
تكفون ادعولي الله يفرجها علي وعلى جميع المسلمين