صديقتي ضاعت في الوحل!

الصلاة والسلام على اشرف الانبياء والمرسلين نبينا محمد وعلى آله وصحبه أجميعن

بنااااات وحدة من صديقاتي ماشاء الله عليها .. اهلها معروفين وحسب ونسب وجمال ومال وامها حافظة للقران وابوها رجال ماعليه اي كلام الكل يشهد له بأخلاقه وكرمه وتواضعه

مو هذا موضوعنا !

قبل شوي كلمتني صديقتي وهي تبكي وقالت لي اشبك مسن تبي تقول لي شي مهم ( هي صاحبتي من 6 سنوات تقريباً ) المهم شبكت قبل شوي وقالت لي انا خلاص تعبت ابي افتح قلبي واقول الي بخاطري ومالقيت غيرك اعطيها سري واثق فيها

وهنا كانت بداية الصدمة !

شقول لكم .. مدري هي تشبه قصة حكاية مسلسل فيلم

بجد ماادري!

انا بقول لكم الي صار بس بليز محتاجة احد يدلني كيف اساعدها و اوجهها

بدأت القصة لما كانت صاحبتي بمتوسط .. تقريبا اول او ثاني

تعرفت على النت وكانت تقرأ مقالات قصص بحوث تدور معلومات .. كان هذا كل استخدامها للنت

بيوم من الايام كانت فاتحة موقع بطاقات واهداءات وهالموقع فيه شات

جت امها تكلمها وهي فاتحة عليه وقالت لبنتها ان ماتدخل هالمواقع لانها تلعب بالعقول ومادري ايش

صاحبتي ماكانت تفهم يعني شو شات وليه امها قالت الكلام الي قالته

جرها الفضول انها تجرب وتدخل .. وكانت هنا بداية الانهيار

دخلت الشات ولقت عالم ثاني منفتح .. ناس تسولف تحكي مع بعض ومزح وفلة ومافي حدود بين الشباب والبنات والاهم محد يعرف الثاني

وبما ان اهلها جداً محافظين ومو متعودة تكلم حتى شباب عايلتها كان بالنسبة لها شي بجد غريب ومثير للفضول .. يومها كلمها واحد كان كثير محترم وياها وطلب منها تدخل بيوم ثاني

هنا بدأ الفضول والرادع الديني يتهاوشون .. احتارت تدخل او لا .. بالنهاية انتصر الفضول ودخلت
وكانت هذي بداية العلاقة

ومثل كل العلاقات بدأت بشات وانتقلت للمسن وبعدها للجوال .. كان يكلمها بالساعات وهي ساكتة
عرفت كل شي عنه وعن اهله وعن حياته .. وماكانت ترد عليه باكثر من كلمة او كلمتين وهو ماعمره طلب اكثر .. لا طلب غزل ولا صور ولا اي شي

مضت على هالحال سنتين لحد ما فجأة تركها .. بدون سبب تدق عليه ما يرد تنتظره مسن ما يدخل
ماتت من البكي .. كانت تبي تتطمن عليه ( للعلم هو مش سعودي .. هو كويتي )

بعد 6 شهور جاها جواب .. قال لها انا ماابيك ومااحبك وخل عندك شوية كرامة واتركيني بحالي

يومها اذكر كان اختبارات نهائية مرضت وماحضرت الاختبار وزرتها بالمستشفى وقالت لي مجرد ارهاق
ولد عمه (سعودي) كان له علم بالموضوع من اوله كلمها في الشات وقال لها ترى فلان امه عرفت انه يحب وكلمها يبي يخطبك وماوافقت وقامت الدنيا وماقعدت لانه مسمي لبنت خاله

المهم جمعت جروحها وحاولت تنسى .. وكان ولد عمه جنبها يساعدها ويصبرها ويفهمها ان ولد عمه ماتركها بارادته بالعكس هو شاريها بس ظروفه وانه يدعي لها تتوفق

مرت الشهور لحد مااعترف لها ابن عمه بحبه لها

وبدت الدوامة من جديد .. بس هالمرة كانت مختلفة

مكالمات طول اليوم .. مسن وجوال

لحد ماتطور الموضوع وطلعت معها

تخيلوا طلعت معاه 3 مرات !!

مرة بكوفي شوب ومرة بسيارته ومرة بشقته !!

عمري ماتصورت ان صاحبتي الهادئة الرزينة الي الكل يشهد لها ولاهلها يطلع منها كل هذا !!

آخر مرة طلعت معاه بشقته مدري شصار حاولت افهم منها ماقالت لي

ولد عمه (الكويتي) عرف بعلاقتهم ومن يومها مايكلموا بعض رغم انهم كانوا اصحاب من الصغر

بعد كل الي صار .. الولد خطبها ولان حالته المادية “مو بالمستوى المطلوب” واخت العريس مصابة بمرض (ماتتكلم) ابوها رفضه

خطبها مرة ثانية وهم رفض .. وقتها اهله قالوا له انساها ومافي نصيب واحنا سوينا الي علينا ومهما كان احنا عندنا كرامة مانبيها تنهان

وبدت الدوامة من جديد .. حاولوا وحاولوا ماقدروا يوفقوا بين اهاليهم

بالنهاية اقترح عليها 3 خيارات:
1- ينفصلوا عن بعض ومايستمروا بعلاقتهم الحرام وهم مايقدروا يختموها بحلال
2- يجبرون اهلهم يزوجوهم بأنه يطلع معها ويبلغون الهيئة ويصيدوهم
3- تنحاش معه وهو يقدر يدبر الموضوع

صاحبتي ماهان عليها تعمل في اهلها اكثر وكفاية الذنوب والاثام الي سوتها واختارات الخيار الاول

وكان الولد عند وعده من يومها بطل يتصل او يكلمها وان زاد بالمرة رسل لها مسج

عذرا ادري طولت بس لان الموضوع بالحيل مرتبط ومتشعب من سنوات وانا اكتب لكم احاول استوعب