عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
بدون مقدمات ادخل بموضوعي …..
ذاك اليوم جاء على بالي أكتب كلمة ( قبايل ) فقط لا غير في جوجل .. لكن بصراحة يااني انصدمت من اللي طلع …
أول رابط طلع كان سؤال موجه لقوقل / ما هي القبيلة الأكبر في السعودية ؟ 😀
يعني السؤال ذا اش يبي ؟ صاحب السؤال كيف يفكر ؟ والله من زود الثقافة بس .. شعب داااج ع الآخر …
للحين انا اتسآئل واقول يمكن صاحب السؤال عنده بحث وإلا موضوع وإلا حاب يتفلسف على غيره بس مره ماهنا اقتناع ابدن …
لكن لما شفت الردود والإجابات … اللهم كملنا بعقولنا .. عدد الإجابات182 .. مالكم بالطويلة هذي نماذج من الردود غير اللي فيها وقاحة .. اترفع عنها …
نبدأ بسم الله…
1-يا نااااس بدون غباء كل واحد حط قبيلته وقال هي اكبر قبيله وبعضكم قبيلته ما فيها الا هو وابوه وقال اكبر قبيله
وباعتقادي ان ما صار تعداد دقيق لكل قبيله عشان نعرف مني اكبر قبيله
بس انا اكثر ما اشوفهم القحاطين واتوقع انهم اكبر قبيله
واالله اعلم وتكفوون لا احد ينزل اسم قبيلت ويقول اكبر قبيله
>> مرة أحس جاب له شيء ما احد يعرفه لا ويقول اللي اشوفه … خوش مصدر !!
2-اكيد حرب لكتساحهم منطقه الحجاز ونجد الى اطراف حائل
بعدها اتوقع قحطان لكتساحهم الجنووب
ثم عتيبه
ثم عنزة
ثم شمر
ثم يام
ثم زهران
ثم غمد >>>
ما أعجبني غير كلمة اكتساحهم بس ذي حسيت اني بحرب داحس والغبراء
3-حـــــــــــــــــــــــــــــرب حــــــــــــــرابة الــــــــدول يكفي انها في كل مكان متواجدين
>> ركزوا على حرابة الدول !! >> ابد ما في شيء يضحك ..
4-اي واحد سب اي قبيله ترى مدقوق خشمه بالتراب هو وقبيلته >> لا تعليق بجد !!
5-بلاشي هيااط انت وياه بلا عنزي بلا عتيبي بلا شمري بلا غامدي بلا زهراني بلا قحطاني بلا كلام فاضي ماغير هيااط عندكم لا جــاه الجد كل واحد فيكم وطــه رجلـــه معد تلاقي له اثر لاكن وقت الهرج تلاقيهم واسمع انوااع الهيـــــاط
الحمدلله اني حــربـــــــي تلاقي الوفاء والطيب والمرجله والكرم والعز دربـــي
لو تلف ولو تدووور والله ماتحصل مثل قبيلـــة حـــــــــــــــــــــــــــــــرررب قبيلة يحكي عنها التــــاريـــــــــخ
>> لا ويقول بلا ش هياط !! نوعيات أوادم ما كنت حتى اتخيلهم ..
6-اظن قبيلة المغيرة بن شعبة والحجاج بن يوسف و محمد بن القاسم والمختار ومنها ثلاثة من دهاة العرب الاربعة و أول من صلى بمكة جماعة بعد فتحها جبير بن عجلان الثقفي هي اكبر قبيلة والله اعلم وش رايكم اذا فخر بالقبيلة ثقيف بلامنازع ويا اخوان عتيبة ليست قبيلة وانما حلف بين مجموعة من القبائل اقرأوا التاريخ القبائل من الملاحظ يا اخوان ان معظم اسماء القبائل الموجودة الان تختلف عن مسميات القبائل في التاريخ واظن السبب يرجع الى ان القبائل كانت تتحالف ثم يطلق اسم الحلف على القبيلة ويصبح لدينا مسمى قبيلة جديدة والله اعلم >>>
أحسن شيء ( والله أعلم ) مفتي الديار السعودية على غفلة ..
7-اكبر قبيلة في المملكة وفي العرب وفي العالم وفي الكواكب
بني تميم ( التميمي )
يكفيك اسسواق التميمي ض2
حنا تميم ماخذين البيرق
حنا لنا نجد حنا اول من سكنا نجد مع (نمير) الي هي الان (مطير)
وحنا اللي كرشنا العنوز تغلب وبكر الى الشمال طردناهم من نجد
تحياتي التميمي 506
>>> ركزوا على الكواكب – اسواق التميمي – البيرق – كرشنا وطردنا ..
8-اذا أنا كذااااب أسألوا المخابرات البريطانية تعلمكم أن عـــــــــــــــنزة أكبر قبيلة بالوطن العربي بلا منازع
>> لا ما يحتاج خلاص صدقنا …
9- بعدين يوم عتيبه تحارب الحروب والمطران كانو في الليل والحروب كانو نايمين والمطران نحاشو ثم عتيبه فقعو الحروب وانا قحطاني بس الي يقول المطران اقوى قبيله ثور القحاطين فقعو المطران وتراه مكتوب في كتاب تاريخ قبائل العربية
>> مدري اي كتاب هذا اللي فيه ( فقعو وفقعو !! ونحاشو)
10-عتيبه جعلهم لأنفلوزنا الخنازير خصوصا النفعه وذوي مفرج مناعتهم ضعيفه
>> لا احد يضحك ابد ..
11- الاسمري اكبر قبيلة والاحمري اقوى تأثير لان لونهم احمر
>> مدري يستهبل وإلا فاهم كذا ..
12-قبيلة مطير من الحرة للمجرة
مثل ماقال الشاعر
حنا هل الشلفا وحنا هل الخيل وحنا مطوعة الرجال العنيدة
>> ونعم بس اي مجره هذي ؟؟ درب التبانة مثلا ؟
13-جهينه حيث انهم يزوجون ابنأهم وبناتهم واعمارهم 14و15 سنه والعهده على الراوي ويسكنون سواحل البحر الاحمر وماحوله
>> ازين شي ان العهده على الراوي مسكين ..
14-حرررررب بدون منازعه وبدون مكابره يااخوان هذا شيء واضح وتعيشونه في حياتكم اليوميه
>> ليش جبنة وزيتون مثلا ..
15- البنقاليه والهنود
..>> ما ألومه ..
بعد ما استعرضنا الردود اللي طبعا تعتبر ردود متوسطة لأن هناك ردود وعظية راح أجيب منها نماذج للأمانة فقط لا غير …وهناك ردود لا تليق لا داعي لها …
بالنسبة للفئة العمرية وعلى حسب الردود توضح شيئين / إما إن اصحاب الردود لم يبلغوا 20 عاما … أو انهم بلغوها وشطبوها ولكن عقولهم لازالت تصغر يوما بعد يوم …
حسافة ان كل من هب ودب قام يكتب وينافح وهو أول من يدري بجهله وتخلفه … أنا ما اقدر أصدق ان فيه ناس عايشة على السب والشتم بطريقة لا تليق بنا كمسلمين … ولا اقدر اصدق ان فيه ناس تسأل مثل الأسئلة ذي ؟؟ ولا اتوقع 182 اجابة ؟؟ ولا في آخر كلامه يقول الله اعلم وكلنا اخوان و الدين اساس كل شيء !! طيب يوم الدين اساس كل شيء ليش مستعرض لك بمقدمة كلها كلام بذيء وخرافات وعصبيات وفي النهاية تقول حنا اخوان ؟؟
بصراحة أنا انصدمت من الموضوع لأن النوعيات هذي غطت على المثقفين والواعين والفاهمين من بنات وشباب السعودية …
– سمعت ان فيه ناس تعيش على غير هدف ولا رايه ولا وجهه … لكن ما شفتهم إلا بعد ما شفت السؤال ذا
علشان ما أطول عليكم هذي نماذج من الردود الواعية ..
1-السلام عليكم ياخوان مايصير الكلام ذي الى متى وحنا نتجاهل الاشياء الناس تبدا تتقرب الى الله سبحانه والحين النااس تتطور بالعلم والعقل والحياه الدينه والحياه السياسيه وحنا تونا بالعصبيه ياخواان بكره يوم القيامه الله مراح يسالك عن قبيلتك بيسالكم سؤال والا يجاوب يربح الجنه عرضها السموات والارض الله يجعلنا مما يقولون اخر كلمهم لااله الا الله محمد الرسول الله قولو اميين ياخواان امانه ياشباب عمركم شفتو دكتور ولا مهندسه يقول الاشياء ذي ؟ طبعا لا لانه فاهم الحياه بدون عصبيه وحنا ماخذين عن العصبيه ليش ياخوان قول الرسول صل الله عليه وسلم اتركوها فانها نتنه ولا فرق بين عربي ولا اعجمى الا بتقوى ونعم بجميع القباءل سوى بدوي ولا حضر ع العين والرااس والله ياخوان كلنا من ادم وادم من تراب يعني وانصحكم ياخوان تشيلو الكلام من روسكم واخر كلامي اكثرو من الاستغفااار لقول الله عز وجل ؛ اعوذ بالله من الشيطان الرجيم ؛ < فقلت استغفرو ربكم انه كان غفارا < يرسل السماء عليكم مدرارا < ويمددكم بامول وبنين ويجعل لكم جنات ويجعل لكم انهارا < صدق الله العظيم سبحان الله وبحمده عدد خلقه ورضى نفسه وزنه عرشه ومداد كلماته لااله الا الله محمد الرسول الله رايت التوحيد الله يجمعنا وياكم في جنت الخلد يارب العالمين
>> على بساطة الكلمات وبعض الأخطاء إلا أنه يحمل تفكير سليم وينصح ويوجه … جزاه الله خير ..
2-سألوا سلمان الفارسي رضي الله عنه // من أبوك ؟
قال //
أبي الإسلام لا أب لي سواه إذا افتخروا بقيس أو تميم
قال عمر رضي الله عنه // وأنا أخو سلمان
بعض الردود المتواضعة لكن الفكر فيها راقي وهي قليلة جدا يمكن 3 او 4 فقط …
ختآما / ْ~
سؤال / هل الخلل في هؤلاء ؟ أم الخلل في التربية والتعليم ؟ أم الخلل يأتي من دخول عالم النت وازدواجية الهوية ؟
ومن يتحمل مسؤولية امثال هؤلاء ؟
على فكرة حتى أيام الجاهلية ما احد يتفاخر بذا الشكل !!
سبحانك اللهم وبحمدك أشهد ان لا اله الا انت استغفرك واتوب اليك
ودمتم بود …۔ محبتكم *Am00nA* 
