عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
كيفكم ياأمهات وكيف أطفالكم
أنا أم جديده وأبي أعرف شي واحد ,, هل فيه أحد مثلي وإلا أنا حساسة جداً؟؟
راح أدخل بالموضوع وأشكي لكم همي لأني بصراحه إرتحت لكم
أنا عصبيه وماأتحمل وبنتي الله يصلحها ويهديها ويخليها لنا عمرها سنه ونص منرفزتني
أكيد هذا شي طبيعي كل الأطفال بهذا العمر ماتفهمون لهم وحركاتهم كثيره وينخاف عليهم من الخطر الله يستر
بس أنا قاسيه عليها أحيانا تسوي شي تخليني أضربها وأصارخ عليها
وطول اليوم ماأقدر أشتفل ولا أسوي شي منها الله يصلحها
بس اللي مضيق صدري بالليل إذا نامت يضيق صدري وأرحمها وأحس أني قسيت عليها وأجلس أبكي
أحس ودي أصحيها وأضمها تخيلو وأنا جالسة أكتب الموضوع خانقتني العبره
ودي أعرف فيه أحد مثل حالتي وإلا أنا حساسه وقلبي رهيف
والله أني أجلس أبكي بقوه وأحس قلبي يتقطع عليها مع أني أحيانا إذا بكت وتبي شي :Pوماني عارفة وش تبي أحاول أتمالك نفسي وماأصرخ عليها ولا أضربها وأهديها وأضمها
بس مرات أكون متنرفزه وغصب علي أضربها تكفون ساعدوني وش أسوي عشان أتوب عن الضرب
أمي دايم تحلف علي وتدعي علي إذا ضربتها,, أقولها يمه لاتدعين والله شي غصب علي من كثر ماأنا معصبه عليها أضربها
تخيلو زوجي مره لا شعوري ضربتها عنده وهزأني وصار يقول :ليه , فيك عقد نفسيه تطلعينها على بنتي؟؟
والله ماأدري وش أسوي ودي أتوب ومااضربها ➡
وبس إن شاء الله إني ماطولت عليكم
أنا ماأجبركم عالرد بس اللي عندها نفس المشكله تقدر تفضفض ونشوف لنا حل
والله يعطيكم ألف عافيه
الله يخليلنا أطفالنا ويحفظهم من كل سوء ومكروه
