طفشت من الاتصالات وابي حل

السلام عليكم ورحمه الله وبركاته

ابي نصيحتكم اكلم منو في السالفه؟

المشكله بدت من شهر 10 وانا اراجع اتصالات عشان يركبون elife راجعت كم مره وقالو المنطقه لين الحين مب جاهزه اخر شي بعد شهرين خذو طلبي على اساس انه الالياف توصلت في المنطقه وعطوني البطاقه اللي فيها الرقم السري ، ويو بعد مده جي شهر او شهر ونص ركبو الصندوق الابيض واتريت واتريت واتريت ولا حس ولا خبر ، الانترنت مب مركب ولا شي، اتصلت في 101 مليون مره وكل مره ايقولون بنطرش رساله تذكير و مره ايقولون الطلب مب موجود ومره الريال قالي الطلب موجود وطرش شكوى عاجله للدعم الفني ومن هل الخرابيط واتريت 3 اسابيع ولا حس ولا خبر ،،اتصلت مره ثاني الريال اللي رد علي قالي طلبج مب موجود اتصلت اليوم الثاني قالي الطلب موجود بس اونه شي مشكله مع الالياف الضوئيه ،،،

اللي يغيضني ويخليني اتجلب من الغضب انه اختي في نفس الفريج على نفس الخط نفس الشارع ما طلبو اي لايف واتركب عندهم في خلال 3 ايام ،، طبعا صكيتها بعين واخترب النت ثاني يوم

بس صدق صدق قهر مب عارفه اكلم منو،، اخر واحد كان وقح قلت له عطني حد ابي اشتكي ابي حد ايشوف لي صرفه بس ما طاع يعطني اي رقم ،،،،

انا متأكده اذا رحت المركز الرئيسي بيقولون مب بأيدنا اتصلي 101 لانه صارت لي من قبل ؟

ابي حل ابي نصيحه ،،،،،،