طفلك فيه أعظيم *تسلخ*مغص*استفراغ*اسهال*حراره تعاااااالي وادعي لي***

اولا يشهدالله اني من زمان وانا ابي انزل هالموضوع لكثره تسائل البنات عن اشياء سبق انها مرت علي فحبيت افيدكم فيها الله العالم
وقبل كل شي جميع هذه الوصفات طبيعيه ميه بالميه وانت تسوينها بدون أي خووووف وانا مجربتها مع بناتي واغلبها من حرمه تعالج الاطفال وهي مره ثقه
ثانيا اتمنى من الاخوات ينتبهون للي اقوله هنا لايسالون على الخاص وانا موضحه كل شي الا اللي يصعب عليها شي تراسلني
1_الطفل اقل من سنه مايعطى عسل نهائي
2_ وصفة الحلب والكمون والاعشاب اللي راح اذكرها تكون لاقل من سنه عدد حبات قليله ولفوق السنه نصف ملعقه صغيره والكبار ملعقه العسل لازم اصلي واذا ماعندك بديل الاصلي عسل الشفاء
زيت السمسم لازم من المعصره وليس المصنع
3- الاطفال اللي فيهم حساسيه صدر او ربو لاسمح الله مايوضع الفيكس نهائي على صدورهم (انتبهوا) علشان ماينكتمون فقط بالحلق والارجل
4- العلاج اسبوع فقط ووقفيه لاتعطينه مره ثانيه الا بعد عشره ايام او اسبوعين وخاصه الصغار مره
اولا راح ابداء ان شالله

بالعظيم او اسقاط الحلق
ادهني كافوخ الطفل بشوي فيكس وتكوني مجهزه شوي حناء علشان يمسك الوصفه بس مع عنزروت مطحون
ومحلب احمسيه واطحنيه وحطيهم بمويه داااافيه وحطيها بس على الكافوخ راح يكون زي الجبس ويرفع العظم ان شالله
وكل مانشف بلليه بمويه بالشتاء مويه دافيه وبالصيف بارده شوي علشان يسحب الحراره باذن الله
دهني حلق الطفل بفيكس من تحت لااعلى ودفييييه عن البرد
هذه الوصفه ممتازه للعظيم والاستفراغ والحراره باذن الله

للاسهال والاستفراغ وانتم بكرامه
النشاء وانا اخذت هالطريقه من وحده ماذكر اسمها الله يجزاها خير من عالم حواء
حطي النشاء بالحليب والزبادي راح يستفرغ بس مع التكرار باذن الله راح يتحسن
وقفي حليب طفلك وجيبي له حليب من الصيدليه خاص بالاسهال
وبرضواء فيه زي السيرلاك بكرتون بنكهة الارز والجزر خاص لهذه الحالات ممتاز بفضل الله
حطيه بالحليب اذا ماتبين تغيرن حليبه او مع مويه مره يمسك البطن
واذا كان طفلك استفراغ بدون اسهال حطي له عنزوروت نقعيه وشربيه
والاولين كانوا يقولون (عطواء بزارينكم عنزروت واجدعوهم وراء البيوت ) بس عاد لاتجدعين بزرك هههههه

الصعوط حلو بس ماعرف طريقته جيبيه من حرمه وعطيهم لمده اسبوع بشروق وغروب الشمس

للحراره
طبعا الخافض والتحاميل افضل شي
والاهم الكمادات بمويه عاديه مع الخل

للكحه والبلغم والحساسيه

ملعقه لكل من زيت السمسم من الطبيعي والعسل والليمون وشربي طفلك 3 مرات باليوم
ودهني جسمه كله بزيت سمسم دافي وارجوله حطي فيها فيكس ولبسيه شرااااااب ودهني حلقه شوي وتحت اذانه
وحطي بالسر شوي فيكس
ملاحظه بنتي الصغيره عندها حساسيه اعطيها بخار مع هالوصفه والحمد لله ماقطعها عنها بس خففها لها ولله الحمد
واهم شي ابعدوا عن الرواااائح والبرد
ايضا علوك المر او اللبان نقعيها بمويه حاره واذا ذابت شربيها الطفل من مرتين الى ثلاث مرات ممتاز للبلغم

الرشاد3 حبات فقط للمواليد و7 حبات للي فوق السنه خليه يبلعها بزبادي او لحسيه انت وطريقتك
المره تنقع مع علوك المر برضوا ممتازه وهي مضاد حيوي بس لاتثقلينها لانها حاره
التهاب الحلق

ملعقه لكل من زيت السمسم والعسل والليمون وشربي طفلك 3 مرات باليوم
مع تمريخ الحلق بالفيكس وتغطيه الحلق بشال او بلوزه

للتسنين
سوي دلوك بنفسك محلب محموس ومطحون مع مره وشوي سكر نبات اطحنيهم ودلكي فمه
او كمون مطحون مره مع زيت زيتون ودلكي فمه ممتاز للشمم والاسنان

لتسلخات الحفاظ نظفي المنطقه بمويه وصابون زين علشان البكتيريا بعد الاسهال
حطي زيت زيتون وكثريه وحطي فوقه نشاء وكثري مره باذن الله مره مرتين وراح يرووووح

لمغص البطن اذا برد على طوووووول كمون
واذا مغص من اكل او حليب كمون مع يانسون
اذا غازات ببطنه يانسون مع بابونج
مع التمريخ بزيت زيتون دافي للبطن والكبار حطي لهم فيكس على البطن ممتاز بحول الله
للمواليد فيه مويه الغريب ممتازه وانا اخلص علبه او اثنين بنفاسي
وفيه نقط بالصيليه للمغص برضوا ممتازات

سكر النبات لاتكثرونه يابنات بس مع العصير شوي او الكمون واليانسون الخ نصف حبه واذا استغنيتي افضل

بناتي سبق وجتهم ولله الحمد على كل شي جرثومة معده فاستخدمت المضادات والحمدلله
ذكروا لي بعض الاهل وصفات مجربه لها منها
الثوم مع الزبادي على الريق
والشاهي الاخضر الصيني
قالولي قروف رمان مع عسل بس ماجربتها
ايضا العسل مع 7 حبات البركه
طبعا ان شالله مايجي اطفالكم جرثومه معده ولا شي بس للفائده ولاني عانيت منها مع بناتي الله يشفيهن ويحفظهن

لكسر الراس اوالشعر بالراس (الله يحفظهم ويستر عليهم )حبيت افيدكم فيها لكثره سقوط الاطفال الصغار على رووسهم
زميلتي بنتها طاحت من المشايه وصار عندها شعر براسها زي الكسر الخفيف وقالهم الدكتور لنه خلاص مالها علاج وراح اذا كبرت تتشنج ويجيها صرع فانتبهوا لها مررره حزنت امها وودتها لطبيبه شعبييه وقالت لها حلقي شعرها اول شي
بعدين سوي هالخلطه ملعقتين حناء وملعقتين عنزروت و ملعقتين حلبه وتخلط ببيضه واحده وتخلط مع بعض وتحطينها زي الطربوش على جمجمته ثلاث ايام متتاليه وتشلينها اليوم الثالث وتحطين نفس الوصفه مره ثانيه لمده تسع ايام للك وانتبهي البرد
وخوذي له اشعه بعد الوصفه وباذن الله راح يجبر الراس

بنات الاهم والاهم والاهم ارقي طفلك بالرقيه الشرعيه واقراي الحمد سبع مرات عليه ووكلي امرك لله

الرقية الشرعية للطفل وغيره فهي : قراءة سورة الفاتحة – وأول خمس آيات من البقرة – وآية الكرسي – وآخر آيتين من البقرة – وسورة الكافرون والإخلاص والفلق والناس – وآخر آيتين من سورة القلم – ودعاء : أسأل الله العظيم رب العرش العظيم أن يشفيك ( سبع مرات ) – ودعاء : أعوذ بكلمات الله التامة من كل شيطان وهامة ومن كل عين لامة ( ثلاث مرات )
وينبغي الحرص على قراءة سورة الإخلاص والناس والفلق في الصباح والمساء وقبل النوم ، والحرص على هذا الذكر صباحا ومساء : بسم الله الذي لا يضر مع اسمه شيء في الأرض ولا في السماء وهو السميع العليم 0
والله أعلم
وايضا لاتنسين العلاج الطبي اذا كانت الحاله قويه استخدميها مع اللي كتبت لك
لانها ويشهد ربي من تربيه اطفال وتعب وسهر تعلمت كثير من هالحياه
فوالله حبيت افيدكم فقط ولاارجو الا دعوه تدعينها لي من القلب
بان الله يصلح لي شاني كله ويحفظ لي زوجي وابنائي واهلي ويلبسنا دوام الصحه والعافيه ويرزقنا الجنه بلا حساب وكل مسلم
كتب بتاريخ 7صفر 1432هـ يوم الثلاثاء
الموضوع والله من اجتهادي وتعبي
من جد تعبت ياليت تثبيت الموضوع ولو لفتره مع جزيل الشكر