طفلي عمره ست شهور ولسة ماطهرته

بصراحة ماني عارفة كيف اكتب لكم بس اتمنى صاحبات الخبرة يفيدوني .. ويخففو لي همي

ولدي الله يحفظه ويخليه ليا كمل الاسبوع داه ست شهور ..

لما ولدته ماكانت عندي اي خبرة أو خلفية بالختان .. حتى اهلي وماماتي ماكانو يعرفو شئ لأن ولدي هذا اول طفل ذكر في عائلتي .. وقتها ولدت عند أهلي وكان كل من يزورني في الاربعين يسألني طهرتيه طهرتيه .. وانا اقول لسة .. السبب إنه زوجي والوالد كانو مسافرين .. وماكان فيه رجال في البيت ..فماما قالت لي خلاص طهريه لما ترجعي الرياض على الاقل الزوج معاكي عشان يوديكي ويجيبك.. وفعلا انتظرت لحد ما خلصت الاربعين وجاء زوجي وأخذني وعدت للرياض ..

بعد اسبوع من وصولنا رحنا ناخذ له تطعيماته وفي نفس الوقت نحدد موعد مع الدكتور للختان .. وتفاجأت وقت قال لي الدكتور إنه ماينفع تطهروه دحين لأن فيه مشكلة في العضو الذكري .. وقال المفروض تطهروه أول مااتولد … وإن تم تطهيره الآن فراح تضطرو تطهروه مرة ثانية لما يكبر .. انا عن نفسي مافهمت كيف يعني ماينفع وماادري إيه واش معنى .. و قلت هذا شكله دكتور اي كلام .. وبعدها بأسبوع رحنا دكتور ثاني وقال نفس الشئ … وطلب مننا نراجعه بعد شهر

في خلال الفترة هذه جلست اقلب وابحث في النت عن افضل دكاترة الاطفال في الرياض .. ولقيت ورحناله .. وفحص طفلي .. وطلب من طبيب الجراحة في المستشفى إنه يجي يفحصه كمان .. وقالولي نفس الشئ .. إنه ماينفع نطهره الآن … وإن اصرينا وطهرناه فراح يتطهر مرة ثانية لما يكبر … وطلبو نراجعهم ثاني بعد كام شهر

صرنا كل شهر نروح نفحص ولدنا عشان نتأكد إن جاء الوقت المناسب لتطهيره أو لاء .. وكلهم يقولون استنو … طب إلين متى … مرت ست شهور و أنا إلى الآن حاسة نفسي شايلة هم كبير .. وندمانة كل ماافتكر كلام الدكتور الاول لما قال ليه ماطهرتوه اول مااتولد.. ماادري هل هو صادق في كلامه أم لاء

طفلي عمال يكبر قدامي .. والهم يكبر اكثر .. ماني عارفة استنى إلين متى…لأني قريت إنه كل مايكبر الولد يتعذب اكثر وقت نطهره ..