عالم البنات النسائي كل ما يخص المرأة العربية من ازياء وجمال والحياة الزوجية والمطبخ
السلام عليكم ورحمة الله وبركاته
حبيت اشكي لكم همي وضيقتي بسبب اني ملكت (تزوجت) وانفصلت (تطلقت)
وتخيلو تقدم لي وانا عمري 19 سنه رجال عمره 22 وموظف بشركه معروفه وسالنا عنه وعن اهله واصله وفصله وطلعت سمعته طيبه ونسبه يشرف بصراحه ما اكذب عليكم…..
وظل خاطبني 6شهور لان كانت عنده ظروف مرض امه
وكان يتصل في ابوى ويسال عنه ويزونا بالبيت فترة الخطوبه ولما تحسنت جاب اهله عندنا
وصارت الملكه (عقد القران)
ويوم الملكه(عقد القران)
جاء المأذون من وراى الباب يسالني اذا انا موافقه وقالي :هل انتي موافقه على ان مهرك( مهر مؤجل ) قدره 40 الف سوف يعطيك اياه قبل الدخول عليك هل انتي موافقه
انا بصراحه تلخبطت وشفت ابوى موافق ووافقت لان بصراحه واثق ابوى فيه بعد ماجلس معه وتكلم معه وسال عنه وعن سمعته لقى كل شئ زين
بس انا كنت خايفه من صغر سنه وان ماله خبره بالمور الحياة
وصارت الملكه ومادفع لي المهر حسيت نفسي اني تضايقت وشلون يجيب اهله ومايدفع المهر وتعذر بظروف انه معه نص المهر وماجمع الباقي وان راح يجيبه في نهايه الشهر
وصدقته انا لما كان يكلمني وقالي هالكلام
تخيلو سافر عند اهله بالديره كلمني عادي ويسولف معي ويقولي كلام حب وغرام وانا صدقته على نياتي
ويوم الاحد كلمني وقعد يعبر عن شوقه لي وانه اول مايرجع من السفر راح يجي البيت يزونا لانه مشتاق لي
ويوم الثاني (يوم الاثنين) ماكلمني استغربت قلت يمكن مشغول مع اهله وارسلت له رساله مارد علي
ويم اللى بعده (يوم الثلاثاء)اتصلت عليه مارد
وارسلت رساله ومارد بعد بصراحه استغربت معقوله مايرد لاعلى اتصال ولارساله غريبه ماهي عادته
ويوم االلى بعده( يوم الاربعاء) نفس الحاله لاحس ولاخبر
اتصلت مارد قلت خليني اتصل على امه واسال عنه
ولما اتصلت سلمت عليها وكلمتها وسالتها عنه قالت اصلا سافر من عندنا من زمان هو عندكم اللحين
تقصد بنفس المنطقه اللى نسكن فيها هو يشتغل فيها
وقعدت اتصل اتصل اتصل مارد على اتصالاتي ولا رسايلي
اكتب له ,,,وينك ليه ماترد؟؟ علي انا بديت اقلق
انا خايف عليك!!!!
والله لاحس ولاخبر وارسلت رساله اخيرة كني حاسه انه بيصير شئ مو زين قلت له حرام اخذت فيني اثم من اللى تسويه فيني
ولا دقيت عليه ابد قلت انتظر لما يتصل فيني …..
واحلم يابنات ذاك الحلم اللى يخوف وحسيت انه راح يصير شئ ………
ويوم الثاني (يوم الخميس )كلم ابوى وقاله انا بروح يوم السبت اطلق بنتك
قاله ابوى وش السبب قال بنتك ماتحترمني ولاتقدرني
تسالني عن المهر وتسالني عن راتبي وين اصرفه
وتتحكم فيني وتقولي لاتسافر اللى وانا معك
ولاتعرف شئ عن امور الحياة الزوجيه وعلاقه الزوجين ((ليلة الدخله ))
وترفع صوتها على لا احترام ولاتقدير
والله يابنات ان جاتني الصدمه لما لقيت ابوى يقولي هالكلام قال لي صحيح ان ك سالتي عن المهر
قلت اولا هو اللى فتح مع الموضوع وعادي قمت اتكلم معه فيه وقلت له لاتتسلف ولا تاخذ قرض من البنك تحمل نفسك ديون وقت ماتجمع المهر جيبه
وسالفه راتبه عادي من حقي اعرف كيف راح يكون حياتي معه
وبعدين هالكلام مازعل منه نتكلم فيه ونتناقش عادي لازعل ولاتضايق ولا شئ علق عليه
وسالفة ما ابيه يسافر قلت لابوى ايه انا قلت له لاتسافر
ليه يسافر الحين ……..نسافر لما اكون معه
وسالني ابوى قال لي صحيح متعرفين عن امور الزواج
قلت لابوى وش عرفني ما كان لي تجربه زواج من قبل عشان اعرف هالامور
حتى ابوى يقوله وانا عمك ماهي اعذار هذي هذا شئ طبيعي يصير اختلاف بين اي شخصين توهم يرتبطون
وتعالي بالبيت نتفاهم الكلام بالتلفون ماينفع
ورفض انه يجي وماكان معطي مجال للتفاهم او حتى نقاش كلمه اخوى ابوى مافيه فايده
كل ساعه تذكر كلامي معه ويتصل ويقوله لابوى مثل الطفل والله العضيم لا ويطلعها قدام ابوى انه هوشه صارت بيني وبينه وهو سوالف عاديه وكلام عادي يصورها قدام ابوى انه خلاف صار مني واني هواشته وقليت من احترامه
تبلى على والله العضيم حتى ابوى يجي ويسالني اقوله هذا الكلام مع السوالف قلته وعااادي الازعل ولا شئ بعدين وش قلت انا فيه غلط مافيه اي غلط
وان بصراحه عارفه نفسي انا ماغلطت عليه بس هو قعد يكبر السوالف انها هوشه سويتها انا …..
وراح ابوى كلم ابوه واخوانه وحلفه بالله اذا احد قاله شئ عنا يخص سمعتنا ولا شرفنا ولا اصلنا
قال ابوه لنا واالله انكم ناس ذهب ونسب وشرف لنا بس ولدي مدري وش فيه انا وبخته وهاوشته واخوانه الكبار بعد بس هو سافر من عندنا على طول ….بس ولدي عندك سو فيه اللى تبي
وكلمتنا امه وهي تبكي حتى صحتها تعبت بالحيل وقعدت تبكي وتقول مايرد على اتصالاتنا ماندري عنه
وحاول يتفاهم ابوى معه يقوله اللى مايخاف الله نتقابل بالمحكمه,,,شين وقوى عين ,,,,
قاله ابوى هذي اخرتها يافلان حشمتك وقدرتك وعزيتك تسوى كذا فيني
ترى بنتي تبي نص المهر من حقها ولا هي متنازله عنه سكر ابوى الخط ,,,,
وفي النهايه قلت لابوى اكيد راح يفسخ العقد(يطلق)لانه انسان ماحس بمسوليه الزواج ولارتباط
مادفع ولا خسر ولا اي شئ على اتفه سبب فسخ العقد(طلق)
حنا اللى خسرنا دفعنا وذبحنا وسوينا عزومه كبيرة
وقعدنا ننتظر الاستدعء من المحكمه ماجاء راح ابوى المحكمه وجاب الورقة
ولما شفت ورقه الطلاق وشفت التاريخ
اثره من يوم الاربعاء فسخ العقد ( طلقني) وصارت ورقتي جاهزة بالمحكمه يوم الخميس كلم ابوى وقاله انا بطلق بنتك يوم السبت
شفتووو الكذاب
دامك مطلق ومنتهي من كل شئ ليه تهين كرامتي قدام ابوى وامي
واهلي كلهم ؟؟؟
ليه ما خاف من ربه على الاقل قدر الناس اللى فتحو لك بيتهم وقدرو ضروفك وحسبوك مثل ولدهم تسوى كذا
صحيح انه انسان مايخاف الله والله انه افترى على بكلام كثير
والمشكله انه ما كان بينا اي زعل او خلاف
بس هو كان ما يبي يسوى لي حفله زواج
وان كنت مصرة على الحفله تدرون اي بنت نفسها تفرح بعمرها ووضحي انه قادر على مصاريف الحفله وكان عارف شروطي قبل الملكه وكان موافق حتى يقول لامي ::راح نسوى زواج ياعمتي فخم
وبعد الملكه كان يحاول ان تكون حفله الزواج عشاء في البيت وخلاص بس صدقوني ماصارحني لو صارحني كان راعيت ظروفه بس اللاسف كان يكذب على وفوق كل هذا افترى على بكلام مزعج بصراحه طلعني قدام اهلي اني بنت غبيه ومعاملتي قاسيه معه وكل عيوب الدنيا حطها فيني
والله اني قعدت ابكي من القهر وادعي ان الله ينصرني عليه
وتخيلو حتى نص المهر ما جابه لي وقلت لاهلي اذا ماجاب بنفسه نص المهر
الله ياخذ حقي منه لانه ظالم وظلمني من غير اي سبب وفترة ملكتي كانت 48يوم يعني حتى لسى ماتعودت عليه
وتخيلو بعد 6شهور من الانفصال رجع يخطب فيني من جديد وقال لابوى انه عين وصابته
وطبعا رفض ابوى وانا بعد رفضت لانه انسان ماهو ثقه
والحين مدري وش اقو ل للناس واقاربي عن سبب الانفصال لاني للحين ماعلنت الخبر ويحسبون ان بتزوج بعد اخلص دراستي
وش اقول انسان طفل وعقله صغير …..
ولا مايبيني …ماشافني بالنظرة الشرعيه ….
ولا احط فيه عيب واشيل ذنبه ويقولون ليه ماسالتو عنه ما اخذتو العبرة من بنتكم الثانيه لما خطبها واحد ماسالتو عنه وخلتوه يملك عليها(عقد قران) واخرتها انفصلت عنه
وحتى لو قلت اني ملكت من غير مهر بيقولون عادي جاب المهر ولا ما جابه ليه بيفسخ العقد (يطلق) اللى فيه سبب
ولا بيقولو اكيد انه شاف شئ بسمعتها او اخلاقها وطلب الانفصال
والله اني متضايق من هالموضوع الحين توني دخلت 20سنه
منفصله من غير اي سبب وكان عمري وقتها 19
وانا من انفصلت لي 8شهور تقريبا
وكل اللى عرف بسالفتي قام يبكي ويقولو لامي
بنتك ماشاء الله عليها حلوة وجمليه واخلاق
لو ان بنتك شكلها عادي كان ماقالنا شئ بس بنتك جميله ليكون حسد صابها او سحر ولا ابن حرام تدخل
قلت بنفسي والله الحرام داخل نفس اللى مايخاف الله اللى افترى علي ما قدر ابوى اللى عنده القلب وامي اللى عنده الضغط والله انها كانت بتموت من اللى صار بس الحمد لله الله ستر
متضايقه مدري وش اقول لاقاربي وش بيقولو عني الناس
حاسه بالالم بداخلي مو عشانه عشااان نفسي والله وسمعتي ولاهو ماهمني
بس حسبنا الله ونعم الوكيل فيه الظالم اللى ما يخاف ربه
الله يبيله بوحده تسوى فيه مثل ما سوى فيني الظالم
ادعولي ان الله يفرج همي
ويعوضني خير وينصرني عليه الظالم
دعواتكم الله يخليكم
الجروحه حيل وصيفة خير
